Read Talaud 1 SAMUEL 22 Bible Online

1 SAMUEL 22 - Talaud bible

1 SAMUEL 22

¹Wua'udde i Daud nanantangngu soa Gat wuṛṛu na'imbuni su loṛṛangnga maranin soa Adulam. Sutempo manga iaangnge wuṛṛu anambon balahanne naaringikka manungku i tou isudde, i mangitou nirumanta ringanni Daud.

²Wuṛṛu lai manga taumata apan niallangnga, taumata apan pia awallassa, wuṛṛu ingana'a apan mammendamma tawe mal᷊uassa, sarangkanambone naammulli Daud, wuṛṛu i Daud nabbal᷊i piaṛṛa'i mangitou. Reengannu mallal᷊aṛenggenni Daud iraṛṛangngo 400 su atoune.

³Wuassu loṛṛangnga udde i Daud inaite watukku Mizpa su Moab wuṛṛu nabbisarate si ratun Moab, “Wala'awe iamangku wuṛṛu inangngu allangngu matana'a ringanni Tuangku, ma'oman sara allangngu maasingkatta apa pandumannu Ruata su saruannu allangngu.”

⁴Wua'udde hagurangnge udde niapidde ringannu ratun banua Moab, wuṛṛu i mangitou sidutu uatana'a poiaroddi al᷊annune i Daud ma'imbuni su loṛṛangnga.

⁵Su allo sambau sangkatou nabi aranne i Gad nirumanta ringanni Daud wuṛṛu nabbisara, “Ariete pa'atana'a su loṛṛangnga indi, inaite paal᷊ihakka watukku leta'u Yehuda.” Ne i Daud inaite wuṛṛu sinumuṛṛite su mahurangngu Keret.

⁶Su allo sambau i Saul tantal᷊anna ua'ianna su al᷊ungngu alu tamariska su wowon buiddu Gibea; i tou uaagassa sambeangnga wuṛṛu anambon tembonannu tantarane uarisikka uapal᷊iwutta si tou. Sutempo i tou naaringikka manungku tampan Daud wuṛṛu mallal᷊aṛenggenne niasingkatante,

⁷i tou nabbisara su manga tembonannu tantarane udde, “Paddaringikka, ei manga taumatan Benyamin! Apa i Daud udde sarun mangonggollu wawail᷊anna wuṛṛu waillu anggore si yamiu? Apa i yamiu sarangkanambone sarun pileanna maola'a tembonanne sulal᷊ummu tantarane?

⁸Ete ana waugu udde i yamiu nabbaidda lumawangnga si ya'u manungku ana'u sassane buatte nanamba'a si Daud? Tawe saran sangkatou suwallatti yamiu maṛṛingiddu watangangku ara'e namasingkatta si ya'u manungku i Daud, mallal᷊aṛenggengku sassane, su orassa indi uaṛṛangattu tempone mamate si ya'u, wuṛṛu ana'u i Yonatan buatte nangonggollu sasasa si tou!”

⁹Doëg tembonannu mallal᷊u'addu winatangngi Saul, isudde lai ringannu manga tembonannu tantaran Saul, ana see i Doëg nabbisara, “Allangngu buatte naasilo si Daud nirumanta ringanni Ahimelekh ana'i Ahitub su Nob.

¹⁰Ahimelekh naddorongnga tatantiro su MAWU, su ola'u apa apan sarun olaanni Daud. Wua'udde lai i Daud nionggol᷊annu wal᷊unna anna wuṛṛu nionggolla lai si tou hal᷊elen Goliat, taumatan Filistin udde.”

¹¹Ana see ratu nandolokka niapawago si Imam Ahimelekh wuṛṛu anambon walahanne apan naola'a imam su Nob; ne i mangitou sinumaruante si tou.

¹²i Saul nabbisara si Ahimelekh, “Paddaringikka, ei ana'i Ahitub!” I tou sinumimbakka, “Ore, Tuangnga.”

¹³I Saul naiwal᷊o si tou, “Anio i'o nabbaiddi Daud lumawangnga si ya'u? Anio i'o nangonggollu hal᷊ele wuṛṛu i'o lai naddorongnga tatantiro wuassu Ruata? Nariaddi, orassa indi i tou lumawangnga si ya'u wuṛṛu ete uaaṛṛangattu tempone mamate si ya'u.”

¹⁴Ana see i Ahimelekh sinumimbakka, “Arawe wal᷊inewe i Daud tembonannu tantaran Tuangnga apan atuṛṛutanne? Ete i tou mananambon Tuangnga, wuṛṛu lembon a'addatannu anambon taumata sulal᷊ummu wal᷊en araratuanni Tuangnga.

¹⁵Atonna, allangngu buatte naddorongnga tatantiro su Ruata hunan Daud, arawe wal᷊inewe wakkute pa'assa allangngu na'ola'a udde. Su ola'u pabbawaidda lumawangnga si Tuangnga, arie i Tuangnga mangansilla allangngu ara'e sangkatou sulal᷊ummu walahannu allangngu. Allangngu mangke wagga su hatto udde!”

¹⁶Arawe ratu nabbisara, “Ahimelekh! I'o wuṛṛu manga tuṛṛangngu sarangkanambone sarun mate.”

¹⁷Ana see i tou namarenta manga mandariaga apan uarisikka maranine, “Otte, patete manga imam wuassu MAWU udde! I mangitou na'ammulen Daud. I mangitou masingkatta manungku i Daud tinumal᷊angnga, arawe i mangitou maddiri mamasingkatta si ya'u.” Arawe manga mandariaga udde maddiri mamate manga imam wuassu MAWU udde.

¹⁸Ana waugu udde i Saul nabbisarate si Doëg, “Otte paal᷊ihakka! I'ote pamate si mangitou!” Ne i Doëg namatete manga imam udde. Su allo udde lai i tou namate ual᷊u pul᷊o l᷊ima su atoune imam apan pia taṛṛino malluṛṛen efod.

¹⁹I Saul namarenta lai iapapate anambon tumana'u Nob, soan imam udde; esakka, wawine, al᷊aṛṛana'a, ana'a maradio'a, see lai sapi, keledai wuṛṛu domba, sarangkanambone niinsue niawane.

²⁰Tumba'u i Abyatar, sangkatou wuassu ana'i Ahimelekh apan naatal᷊angnga. I tou tinumal᷊angnga ringanni Daud,

²¹ana see namasingkatta manungku i Saul buatte namate manga imam wuassu MAWU.

²²Ne i Daud nabbisarate si tou, “Sutempo ya'u naasilo si Doëg poiaroddi su allo udde, ya'u masingkatte ringannu atonna manungku i tou sarun mangalae si Saul. Nariaddi ete ya'u apan uapasanna winabbawa udde ana waugu apapaten anambon manga tuṛṛangngu.

²³Atana'e suadio'a ringangku, wuṛṛu arie pa'ata'utta. I Saul maapulu mamate si'o, arawe i tou maapulu mamate si ya'u lai. Nariaddi i'o sarun matammudda su tampa'u indi.”