Read Talaud 1 SAMUEL 27 Bible Online

1 SAMUEL 27 - Talaud bible

1 SAMUEL 27

¹I Daud maṛṛingidda sulal᷊ummu naungnge, “Salaiwe ereapa su sambau allo i Saul sarun mamate si ya'u. Nariaddi ya'u tawe dal᷊anna waine, tumba'u tumal᷊angke watukku wanuan Filistin. Ringannu aroddi i Saul tate maddea'a si ya'u lai su Israel, wuṛṛu ya'u lai matammudde.”

²Ana see i Daud wuṛṛu siri annummu ṛasutta tantarane inaite ringanni Akhis ana'i Maokh, ratun soa Gat.

³Ne i tou natana'e suadio'a ringannu tantarane su Gat, samba'u-samba'u ringannu amonanni mangitou. I Daud uaapiddu awingnge ruan katou, eteudde i Ahinoam wawine wuassu Yizreel, wuṛṛu i Abigail, inawal᷊uannu Nabal wawinen Karmel.

⁴Napawe i Saul naaringikka manungku i Daud tinumal᷊angke watukku Gat, i tou tate lai mattinsahadda manametta si tou.

⁵Ana see i Daud naddorongnga si Akhis, “Amungkangu i Tuangnga maapendamma mal᷊uassa ringannu allangngu, onggol᷊a'e su allangngu sambau soa addio'a su ul᷊une maola'a tampa atatanaanna, ma'oman sara allangngu indi tate uatana'a ringanni Tuangnga su soa wahewalla indi.”

⁶Ana see i Akhis nangonggollu soa Ziklag si Daud, ne ana waugu udde Ziklag naola'a pussa'an manga ratun Yehuda naddatingngu orassa indi.

⁷I Daud uatana'a su wanuan Filistin al᷊annune santonna appattu wul᷊anna.

⁸Sutempo al᷊annune udde i Daud wuṛṛu tantarane masokka lai mamangalo taumatan Gesur, taumatan Girzi, wuṛṛu taumatan Amalek; manga walahanna udde mal᷊annute uatana'a su wageangngu leta'a udde. I tou mammangalo su leta'a udde araune naddatingngu Sur, wuṛṛu nasal᷊a watukku Mesir.

⁹I tou namate anambon taumata esakka wuṛṛu wawine lapiddu nangaṛṛo domba, sapi, keledai, unta, ewe'e laubba lai. Wua'udde i tou nabelengnga wuṛṛu sinumaruanna si Akhis.

¹⁰Napawe i Akhis naiwal᷊o si tou, “Watukkuapa i yamiu namangalo paassa indi?” Ne i Daud nabbal᷊o si Akhis manungku i tou buatte namangalo su wageangngu leta'u Yehuda samba'a timukka, ara'e su wageangngu leta'u taumatan Yerahmeel ara'e su wageangngu leta'a atatanaannu taumatan Keni.

¹¹Tawe saran sangkatou taumata su wageangngu leta'a apan nipangaloanne udde niwalane wiakka, tadea'u arie pia taumata wuassu manga wageangngu leta'a udde wotongnge inai watukku Gat mangalaen sarangkanambone apan buatte niola'i Daud wuṛṛu tantarane. Etearoddi inolaanni Daud, su al᷊annune i tou uatana'a su wanua Filistin.

¹²Arawe i Akhis mangngimanna si Daud wuṛṛu maṛṛingidda sulal᷊ummu naungnge, “I tou tumaniten aroddi ipaddantinnu pabbawalage sassane, na'oman sara i tou mangke maola'a allangku su al᷊o'engngu pabbiaṛṛanne.”