Read Talaud 1 SAMUEL 7 Bible Online

1 SAMUEL 7 - Talaud bible

1 SAMUEL 7

¹Ne tumana'u Kiryat-Yearim nangal᷊appe Wantallu Paairen MAWU udde ana see niapidde sulal᷊ummu wal᷊en sangkatou taumata aranne i Abinadab; wal᷊en udde addone su wowon buidda. Wua'udde i mangitou namilete si Eleazar wuṛṛu si Abinadab, niapariaga Wantallu Pa'aire udde.

²Mal᷊annu lai Wantallu Pa'airen MAWU udde sasahipunanna su Kiryat-Yearim, iraṛṛangngo ruan pul᷊o su tonnane. Su al᷊annune udde anambon walahannu Israel sussal᷊ande ma'iontolla su MAWU.

³Ana see i Samuel nabbisarate walahannu Israel, “Amungkangu i yamiu mabelengnga ringannu MAWU wuṛṛu massubba si Tou ringannu ahewallu naungngu, ṛinone i yamiu mandammen anambon monganna wakku, wuṛṛu paal᷊uanni Dewi Asytoret. Tantil᷊a'e watangannu sarangkanambone udde su MAWU wuṛṛu tumba'u pattaṛṛamawu si Tou sassane, ne i yamiu sarun ipallossu MAWU wuassu taṛṛinon taumatan Filistin.”

⁴Nariaddi taumatan Israel nandammen manga paal᷊uannu Monganni Baal wuṛṛu paal᷊uannu Monganni Asytoret, ana tumba'u mattaṛṛamawu su MAWU sassane.

⁵Wua'udde i Samuel nabbisarate, “Ammul᷊a'e anambon walahannu Israel su Mizpa, ne i yamiu ta'u ial᷊iomanna su MAWU.”

⁶Ana see i mangitou sarangkanambone naammulle su Mizpa. I mangitou nania ua'e ana see nilal᷊inna maola'a sambau sasamba su MAWU, see lai i mangitou nappuasa su al᷊o'engngu allo udde. I mangitou nabbisara, “Yami buatte na'ola'a rosa su saruannu MAWU.” (Su Mizpa udde i Samuel nanattakke nanginsue hatton pabbawawul᷊on taumatan Israel.)

⁷Napawe taumatan Filistin naaringikka manungku taumatan Israel uaammulle su Mizpa, siri lima ratun Filistin inaite poiaroddi ringannu tantaran mangitou mamangalo taumatan Israel. Taumatan Israel naaringikka watti'a udde mangke nata'utta.

⁸I mangitou nabbisara si Samuel, “Arie pangillol᷊o umal᷊iomanna su MAWU Ruatan kite, tadea'u i ite iapasal᷊amatta wuassu taumatan Filistin.”

⁹Ana waugu udde i Samuel naṛṛata sambau domba anangnge, ana see nionggola maola'a sambau sasamba itattambunna su MAWU. Wua'udde i tou niumal᷊iomanna tadea'u MAWU mantul᷊ungngu taumatan Israel, ne aal᷊iomanne udde niraringiṛṛanna.

¹⁰Sutempo i Samuel tantal᷊anna mangngonggollu sasamba itattambunna udde, taumatan Filistin mannattakke mammangalo; arawe su orassa udde lai MAWU nirumallu'a wuassu langitta su lantakki mangitou. I mangitou nassal᷊iawukka ana see walate atal᷊angnge.

¹¹Tantaran Israel sinumabbangke wuassu Mizpa ana see nangenggenna taumatan Filistin udde araune sara Bet-Kar, wuṛṛu namaddon mangitou.

¹²Wua'udde i Samuel napararisikku sambau watu, su passarannu Mizpa wuṛṛu Sen. I tou nabbisara, “MAWU buatte nantul᷊ungngi ite sarangakanambone.” — ana see watu udde nissagone “Watun Tatul᷊ungnga.”

¹³Etearoddi taumatan Filistin niawaddo. MAWU tawe namalan mangitou sumutta apia su leta'a wageangngu Israel, suapawe i Samuel ta'e wiakka.

¹⁴Anambon soan Israel apan buatte niparentannu taumatan Filistin, manattakka wuassu Ekron maddatingngu Gat, niul᷊e apia su Israel. Nariaddi Israel naasomba apia ahewallu wageangngu letangnge. Taumatan Israel wuṛṛu taumatan Kanaan mabbiakka suadio'a ringannu paddarame.

¹⁵Samuel uaparenta Israel su al᷊o'engngu pabbiaṛṛanne.

¹⁶Santonna paassa i tou u'amatta mammal᷊iwutta watukku Betel, Gilgal wuṛṛu Mizpa. Wuṛṛu su manga tampa udde i tou mangnginsue hatton patatiakka.

¹⁷Wua' isudde i tou sidutu mappul᷊e watukku wal᷊ene su Rama. Poiaroddi i tou naola'a mallaṛṛuungngu taumatan Israel wuṛṛu lai nallanginnu sambau mezbah su MAWU.