Read כֶּתֶר אֲרָם צוֹבָא - Tanah Aleppo Codex בראשית 11 Bible Online

בראשית 11 - כֶּתֶר אֲרָם צוֹבָא - Tanah Aleppo Codex bible

בראשית 11

¹א ויהי כל הארץ שפה אחת ודברים אחדים

²ב ויהי בנסעם מקדם וימצאו בקעה בארץ שנער וישבו שם

³ג ויאמרו איש אל רעהו הבה נלבנה לבנים ונשרפה לשרפה ותהי להם הלבנה לאבן והחמר היה להם לחמר

⁴ד ויאמרו הבה נבנה לנו עיר ומגדל וראשו בשמים ונעשה לנו שם פן נפוץ על פני כל הארץ

⁵ה וירד יהוה לראת את העיר ואת המגדל אשר בנו בני האדם

⁶ו ויאמר יהוה הן עם אחד ושפה אחת לכלם וזה החלם לעשות ועתה לא יבצר מהם כל אשר יזמו לעשות

⁷ז הבה נרדה ונבלה שם שפתם--אשר לא ישמעו איש שפת רעהו

⁸ח ויפץ יהוה אתם משם על פני כל הארץ ויחדלו לבנת העיר

⁹ט על כן קרא שמה בבל כי שם בלל יהוה שפת כל הארץ ומשם הפיצם יהוה על פני כל הארץ {פ}

¹⁰י אלה תולדת שם--שם בן מאת שנה ויולד את ארפכשד שנתים אחר המבול

¹¹יא ויחי שם אחרי הולידו את ארפכשד חמש מאות שנה ויולד בנים ובנות {ס}

¹²יב וארפכשד חי חמש ושלשים שנה ויולד את שלח

¹³יג ויחי ארפכשד אחרי הולידו את שלח שלש שנים וארבע מאות שנה ויולד בנים ובנות {ס}

¹⁴יד ושלח חי שלשים שנה ויולד את עבר

¹⁵טו ויחי שלח אחרי הולידו את עבר שלש שנים וארבע מאות שנה ויולד בנים ובנות {ס}

¹⁶טז ויחי עבר ארבע ושלשים שנה ויולד את פלג

¹⁷יז ויחי עבר אחרי הולידו את פלג שלשים שנה וארבע מאות שנה ויולד בנים ובנות {ס}

¹⁸יח ויחי פלג שלשים שנה ויולד את רעו

¹⁹יט ויחי פלג אחרי הולידו את רעו תשע שנים ומאתים שנה ויולד בנים ובנות {ס}

²⁰כ ויחי רעו שתים ושלשים שנה ויולד את שרוג

²¹כא ויחי רעו אחרי הולידו את שרוג שבע שנים ומאתים שנה ויולד בנים ובנות {ס}

²²כב ויחי שרוג שלשים שנה ויולד את נחור

²³כג ויחי שרוג אחרי הולידו את נחור--מאתים שנה ויולד בנים ובנות {ס}

²⁴כד ויחי נחור תשע ועשרים שנה ויולד את תרח

²⁵כה ויחי נחור אחרי הולידו את תרח תשע עשרה שנה ומאת שנה ויולד בנים ובנות {ס}

²⁶כו ויחי תרח שבעים שנה ויולד את אברם את נחור ואת הרן

²⁷כז ואלה תולדת תרח--תרח הוליד את אברם את נחור ואת הרן והרן הוליד את לוט

²⁸כח וימת הרן על פני תרח אביו בארץ מולדתו באור כשדים

²⁹כט ויקח אברם ונחור להם נשים שם אשת אברם שרי ושם אשת נחור מלכה בת הרן אבי מלכה ואבי יסכה

³⁰ל ותהי שרי עקרה אין לה ולד

³¹לא ויקח תרח את אברם בנו ואת לוט בן הרן בן בנו ואת שרי כלתו אשת אברם בנו ויצאו אתם מאור כשדים ללכת ארצה כנען ויבאו עד חרן וישבו שם

³²לב ויהיו ימי תרח חמש שנים ומאתים שנה וימת תרח בחרן {פ}