Read כֶּתֶר אֲרָם צוֹבָא - Tanah Aleppo Codex בראשית 12 Bible Online

בראשית 12 - כֶּתֶר אֲרָם צוֹבָא - Tanah Aleppo Codex bible

בראשית 12

¹א ויאמר יהוה אל אברם לך לך מארצך וממולדתך ומבית אביך אל הארץ אשר אראך

²ב ואעשך לגוי גדול ואברכך ואגדלה שמך והיה ברכה

³ג ואברכה מברכיך ומקללך אאר ונברכו בך כל משפחת האדמה

⁴ד וילך אברם כאשר דבר אליו יהוה וילך אתו לוט ואברם בן חמש שנים ושבעים שנה בצאתו מחרן

⁵ה ויקח אברם את שרי אשתו ואת לוט בן אחיו ואת כל רכושם אשר רכשו ואת הנפש אשר עשו בחרן ויצאו ללכת ארצה כנען ויבאו ארצה כנען

⁶ו ויעבר אברם בארץ עד מקום שכם עד אלון מורה והכנעני אז בארץ

⁷ז וירא יהוה אל אברם ויאמר לזרעך אתן את הארץ הזאת ויבן שם מזבח ליהוה הנראה אליו

⁸ח ויעתק משם ההרה מקדם לבית אל--ויט אהלה בית אל מים והעי מקדם ויבן שם מזבח ליהוה ויקרא בשם יהוה

⁹ט ויסע אברם הלוך ונסוע הנגבה {פ}

¹⁰י ויהי רעב בארץ וירד אברם מצרימה לגור שם כי כבד הרעב בארץ

¹¹יא ויהי כאשר הקריב לבוא מצרימה ויאמר אל שרי אשתו הנה נא ידעתי כי אשה יפת מראה את

¹²יב והיה כי יראו אתך המצרים ואמרו אשתו זאת והרגו אתי ואתך יחיו

¹³יג אמרי נא אחתי את--למען ייטב לי בעבורך וחיתה נפשי בגללך

¹⁴יד ויהי כבוא אברם מצרימה ויראו המצרים את האשה כי יפה הוא מאד

¹⁵טו ויראו אתה שרי פרעה ויהללו אתה אל פרעה ותקח האשה בית פרעה

¹⁶טז ולאברם היטיב בעבורה ויהי לו צאן ובקר וחמרים ועבדים ושפחת ואתנת וגמלים

¹⁷יז וינגע יהוה את פרעה נגעים גדלים ואת ביתו על דבר שרי אשת אברם

¹⁸יח ויקרא פרעה לאברם ויאמר מה זאת עשית לי למה לא הגדת לי כי אשתך הוא

¹⁹יט למה אמרת אחתי הוא ואקח אתה לי לאשה ועתה הנה אשתך קח ולך

²⁰כ ויצו עליו פרעה אנשים וישלחו אתו ואת אשתו ואת כל אשר לו