Read כֶּתֶר אֲרָם צוֹבָא - Tanah Aleppo Codex בראשית 13 Bible Online

בראשית 13 - כֶּתֶר אֲרָם צוֹבָא - Tanah Aleppo Codex bible

בראשית 13

¹א ויעל אברם ממצרים הוא ואשתו וכל אשר לו ולוט עמו--הנגבה

²ב ואברם כבד מאד במקנה בכסף ובזהב

³ג וילך למסעיו מנגב ועד בית אל--עד המקום אשר היה שם אהלה בתחלה בין בית אל ובין העי

⁴ד אל מקום המזבח אשר עשה שם בראשנה ויקרא שם אברם בשם יהוה

⁵ה וגם ללוט--ההלך את אברם היה צאן ובקר ואהלים

⁶ו ולא נשא אתם הארץ לשבת יחדו כי היה רכושם רב ולא יכלו לשבת יחדו

⁷ז ויהי ריב בין רעי מקנה אברם ובין רעי מקנה לוט והכנעני והפרזי אז ישב בארץ

⁸ח ויאמר אברם אל לוט אל נא תהי מריבה ביני ובינך ובין רעי ובין רעיך כי אנשים אחים אנחנו

⁹ט הלא כל הארץ לפניך הפרד נא מעלי אם השמאל ואימנה ואם הימין ואשמאילה

¹⁰י וישא לוט את עיניו וירא את כל ככר הירדן כי כלה משקה--לפני שחת יהוה את סדם ואת עמרה כגן יהוה כארץ מצרים באכה צער

¹¹יא ויבחר לו לוט את כל ככר הירדן ויסע לוט מקדם ויפרדו איש מעל אחיו

¹²יב אברם ישב בארץ כנען ולוט ישב בערי הככר ויאהל עד סדם

¹³יג ואנשי סדם רעים וחטאים ליהוה מאד

¹⁴יד ויהוה אמר אל אברם אחרי הפרד לוט מעמו שא נא עיניך וראה מן המקום אשר אתה שם--צפנה ונגבה וקדמה וימה

¹⁵טו כי את כל הארץ אשר אתה ראה לך אתננה ולזרעך עד עולם

¹⁶טז ושמתי את זרעך כעפר הארץ אשר אם יוכל איש למנות את עפר הארץ--גם זרעך ימנה

¹⁷יז קום התהלך בארץ לארכה ולרחבה כי לך אתננה

¹⁸יח ויאהל אברם ויבא וישב באלני ממרא--אשר בחברון ויבן שם מזבח ליהוה {פ}