Read כֶּתֶר אֲרָם צוֹבָא - Tanah Aleppo Codex בראשית 14 Bible Online

בראשית 14 - כֶּתֶר אֲרָם צוֹבָא - Tanah Aleppo Codex bible

בראשית 14

¹א ויהי בימי אמרפל מלך שנער אריוך מלך אלסר כדרלעמר מלך עילם ותדעל מלך גוים

²ב עשו מלחמה את ברע מלך סדם ואת ברשע מלך עמרה שנאב מלך אדמה ושמאבר מלך צביים ומלך בלע היא צער

³ג כל אלה חברו אל עמק השדים הוא ים המלח

⁴ד שתים עשרה שנה עבדו את כדרלעמר ושלש עשרה שנה מרדו

⁵ה ובארבע עשרה שנה בא כדרלעמר והמלכים אשר אתו ויכו את רפאים בעשתרת קרנים ואת הזוזים בהם ואת האימים בשוה קריתים

⁶ו ואת החרי בהררם שעיר עד איל פארן אשר על המדבר

⁷ז וישבו ויבאו אל עין משפט הוא קדש ויכו את כל שדה העמלקי--וגם את האמרי הישב בחצצן תמר

⁸ח ויצא מלך סדם ומלך עמרה ומלך אדמה ומלך צביים ומלך בלע הוא צער ויערכו אתם מלחמה בעמק השדים

⁹ט את כדרלעמר מלך עילם ותדעל מלך גוים ואמרפל מלך שנער ואריוך מלך אלסר--ארבעה מלכים את החמשה

¹⁰י ועמק השדים בארת בארת חמר וינסו מלך סדם ועמרה ויפלו שמה והנשארים הרה נסו

¹¹יא ויקחו את כל רכש סדם ועמרה ואת כל אכלם--וילכו

¹²יב ויקחו את לוט ואת רכשו בן אחי אברם וילכו והוא ישב בסדם

¹³יג ויבא הפליט ויגד לאברם העברי והוא שכן באלני ממרא האמרי אחי אשכל ואחי ענר והם בעלי ברית אברם

¹⁴יד וישמע אברם כי נשבה אחיו וירק את חניכיו ילידי ביתו שמנה עשר ושלש מאות וירדף עד דן

¹⁵טו ויחלק עליהם לילה הוא ועבדיו ויכם וירדפם עד חובה אשר משמאל לדמשק

¹⁶טז וישב את כל הרכש וגם את לוט אחיו ורכשו השיב וגם את הנשים ואת העם

¹⁷יז ויצא מלך סדם לקראתו אחרי שובו מהכות את כדרלעמר ואת המלכים אשר אתו--אל עמק שוה הוא עמק המלך

¹⁸יח ומלכי צדק מלך שלם הוציא לחם ויין והוא כהן לאל עליון

¹⁹יט ויברכהו ויאמר ברוך אברם לאל עליון קנה שמים וארץ

²⁰כ וברוך אל עליון אשר מגן צריך בידך ויתן לו מעשר מכל

²¹כא ויאמר מלך סדם אל אברם תן לי הנפש והרכש קח לך

²²כב ויאמר אברם אל מלך סדם הרמתי ידי אל יהוה אל עליון קנה שמים וארץ

²³כג אם מחוט ועד שרוך נעל ואם אקח מכל אשר לך ולא תאמר אני העשרתי את אברם

²⁴כד בלעדי רק אשר אכלו הנערים וחלק האנשים אשר הלכו אתי ענר אשכל וממרא הם יקחו חלקם {ס}