Read כֶּתֶר אֲרָם צוֹבָא - Tanah Aleppo Codex בראשית 15 Bible Online

בראשית 15 - כֶּתֶר אֲרָם צוֹבָא - Tanah Aleppo Codex bible

בראשית 15

¹א אחר הדברים האלה היה דבר יהוה אל אברם במחזה לאמר אל תירא אברם אנכי מגן לך--שכרך הרבה מאד

²ב ויאמר אברם אדני יהוה מה תתן לי ואנכי הולך ערירי ובן משק ביתי הוא דמשק אליעזר

³ג ויאמר אברם--הן לי לא נתתה זרע והנה בן ביתי יורש אתי

⁴ד והנה דבר יהוה אליו לאמר לא יירשך זה כי אם אשר יצא ממעיך הוא יירשך

⁵ה ויוצא אתו החוצה ויאמר הבט נא השמימה וספר הכוכבים--אם תוכל לספר אתם ויאמר לו כה יהיה זרעך

⁶ו והאמן ביהוה ויחשבה לו צדקה

⁷ז ויאמר אליו אני יהוה אשר הוצאתיך מאור כשדים--לתת לך את הארץ הזאת לרשתה

⁸ח ויאמר אדני יהוה במה אדע כי אירשנה

⁹ט ויאמר אליו קחה לי עגלה משלשת ועז משלשת ואיל משלש ותר וגוזל

¹⁰י ויקח לו את כל אלה ויבתר אתם בתוך ויתן איש בתרו לקראת רעהו ואת הצפר לא בתר

¹¹יא וירד העיט על הפגרים וישב אתם אברם

¹²יב ויהי השמש לבוא ותרדמה נפלה על אברם והנה אימה חשכה גדלה נפלת עליו

¹³יג ויאמר לאברם ידע תדע כי גר יהיה זרעך בארץ לא להם ועבדום וענו אתם--ארבע מאות שנה

¹⁴יד וגם את הגוי אשר יעבדו דן אנכי ואחרי כן יצאו ברכש גדול

¹⁵טו ואתה תבוא אל אבתיך בשלום תקבר בשיבה טובה

¹⁶טז ודור רביעי ישובו הנה כי לא שלם עון האמרי עד הנה

¹⁷יז ויהי השמש באה ועלטה היה והנה תנור עשן ולפיד אש אשר עבר בין הגזרים האלה

¹⁸יח ביום ההוא כרת יהוה את אברם--ברית לאמר לזרעך נתתי את הארץ הזאת מנהר מצרים עד הנהר הגדל נהר פרת

¹⁹יט את הקיני ואת הקנזי ואת הקדמני

²⁰כ ואת החתי ואת הפרזי ואת הרפאים

²¹כא ואת האמרי ואת הכנעני ואת הגרגשי ואת היבוסי {ס}