Read כֶּתֶר אֲרָם צוֹבָא - Tanah Aleppo Codex בראשית 17 Bible Online

בראשית 17 - כֶּתֶר אֲרָם צוֹבָא - Tanah Aleppo Codex bible

בראשית 17

¹א ויהי אברם בן תשעים שנה ותשע שנים וירא יהוה אל אברם ויאמר אליו אני אל שדי--התהלך לפני והיה תמים

²ב ואתנה בריתי ביני ובינך וארבה אותך במאד מאד

³ג ויפל אברם על פניו וידבר אתו אלהים לאמר

⁴ד אני הנה בריתי אתך והיית לאב המון גוים

⁵ה ולא יקרא עוד את שמך אברם והיה שמך אברהם כי אב המון גוים נתתיך

⁶ו והפרתי אתך במאד מאד ונתתיך לגוים ומלכים ממך יצאו

⁷ז והקמתי את בריתי ביני ובינך ובין זרעך אחריך לדרתם--לברית עולם להיות לך לאלהים ולזרעך אחריך

⁸ח ונתתי לך ולזרעך אחריך את ארץ מגריך את כל ארץ כנען לאחזת עולם והייתי להם לאלהים

⁹ט ויאמר אלהים אל אברהם ואתה את בריתי תשמר--אתה וזרעך אחריך לדרתם

¹⁰י זאת בריתי אשר תשמרו ביני וביניכם ובין זרעך אחריך המול לכם כל זכר

¹¹יא ונמלתם את בשר ערלתכם והיה לאות ברית ביני וביניכם

¹²יב ובן שמנת ימים ימול לכם כל זכר--לדרתיכם יליד בית--ומקנת כסף מכל בן נכר אשר לא מזרעך הוא

¹³יג המול ימול יליד ביתך ומקנת כספך והיתה בריתי בבשרכם לברית עולם

¹⁴יד וערל זכר אשר לא ימול את בשר ערלתו--ונכרתה הנפש ההוא מעמיה את בריתי הפר {ס}

¹⁵טו ויאמר אלהים אל אברהם שרי אשתך לא תקרא את שמה שרי כי שרה שמה

¹⁶טז וברכתי אתה וגם נתתי ממנה לך בן וברכתיה והיתה לגוים מלכי עמים ממנה יהיו

¹⁷יז ויפל אברהם על פניו ויצחק ויאמר בלבו הלבן מאה שנה יולד ואם שרה הבת תשעים שנה תלד

¹⁸יח ויאמר אברהם אל האלהים לו ישמעאל יחיה לפניך

¹⁹יט ויאמר אלהים אבל שרה אשתך ילדת לך בן וקראת את שמו יצחק והקמתי את בריתי אתו לברית עולם לזרעו אחריו

²⁰כ ולישמעאל שמעתיך--הנה ברכתי אתו והפריתי אתו והרביתי אתו במאד מאד שנים עשר נשיאם יוליד ונתתיו לגוי גדול

²¹כא ואת בריתי אקים את יצחק אשר תלד לך שרה למועד הזה בשנה האחרת

²²כב ויכל לדבר אתו ויעל אלהים מעל אברהם

²³כג ויקח אברהם את ישמעאל בנו ואת כל ילידי ביתו ואת כל מקנת כספו--כל זכר באנשי בית אברהם וימל את בשר ערלתם בעצם היום הזה כאשר דבר אתו אלהים

²⁴כד ואברהם--בן תשעים ותשע שנה בהמלו בשר ערלתו

²⁵כה וישמעאל בנו בן שלש עשרה שנה בהמלו--את בשר ערלתו

²⁶כו בעצם היום הזה נמול אברהם וישמעאל בנו

²⁷כז וכל אנשי ביתו יליד בית ומקנת כסף מאת בן נכר--נמלו אתו {פ}