Read כֶּתֶר אֲרָם צוֹבָא - Tanah Aleppo Codex בראשית 18 Bible Online

בראשית 18 - כֶּתֶר אֲרָם צוֹבָא - Tanah Aleppo Codex bible

בראשית 18

¹א וירא אליו יהוה באלני ממרא והוא ישב פתח האהל כחם היום

²ב וישא עיניו וירא והנה שלשה אנשים נצבים עליו וירא וירץ לקראתם מפתח האהל וישתחו ארצה

³ג ויאמר אדני אם נא מצאתי חן בעיניך--אל נא תעבר מעל עבדך

⁴ד יקח נא מעט מים ורחצו רגליכם והשענו תחת העץ

⁵ה ואקחה פת לחם וסעדו לבכם אחר תעברו--כי על כן עברתם על עבדכם ויאמרו כן תעשה כאשר דברת

⁶ו וימהר אברהם האהלה אל שרה ויאמר מהרי שלש סאים קמח סלת--לושי ועשי עגות

⁷ז ואל הבקר רץ אברהם ויקח בן בקר רך וטוב ויתן אל הנער וימהר לעשות אתו

⁸ח ויקח חמאה וחלב ובן הבקר אשר עשה ויתן לפניהם והוא עמד עליהם תחת העץ ויאכלו

⁹ט ויאמרו אליו איה שרה אשתך ויאמר הנה באהל

¹⁰י ויאמר שוב אשוב אליך כעת חיה והנה בן לשרה אשתך ושרה שמעת פתח האהל והוא אחריו

¹¹יא ואברהם ושרה זקנים באים בימים חדל להיות לשרה ארח כנשים

¹²יב ותצחק שרה בקרבה לאמר אחרי בלתי היתה לי עדנה ואדני זקן

¹³יג ויאמר יהוה אל אברהם למה זה צחקה שרה לאמר האף אמנם אלד--ואני זקנתי

¹⁴יד היפלא מיהוה דבר למועד אשוב אליך כעת חיה--ולשרה בן

¹⁵טו ותכחש שרה לאמר לא צחקתי כי יראה ויאמר לא כי צחקת

¹⁶טז ויקמו משם האנשים וישקפו על פני סדם ואברהם--הלך עמם לשלחם

¹⁷יז ויהוה אמר המכסה אני מאברהם אשר אני עשה

¹⁸יח ואברהם--היו יהיה לגוי גדול ועצום ונברכו בו--כל גויי הארץ

¹⁹יט כי ידעתיו למען אשר יצוה את בניו ואת ביתו אחריו ושמרו דרך יהוה לעשות צדקה ומשפט--למען הביא יהוה על אברהם את אשר דבר עליו

²⁰כ ויאמר יהוה זעקת סדם ועמרה כי רבה וחטאתם--כי כבדה מאד

²¹כא ארדה נא ואראה הכצעקתה הבאה אלי עשו כלה ואם לא אדעה

²²כב ויפנו משם האנשים וילכו סדמה ואברהם--עודנו עמד לפני יהוה

²³כג ויגש אברהם ויאמר האף תספה צדיק עם רשע

²⁴כד אולי יש חמשים צדיקם בתוך העיר האף תספה ולא תשא למקום למען חמשים הצדיקם אשר בקרבה

²⁵כה חללה לך מעשת כדבר הזה להמית צדיק עם רשע והיה כצדיק כרשע חללה לך--השפט כל הארץ לא יעשה משפט

²⁶כו ויאמר יהוה אם אמצא בסדם חמשים צדיקם בתוך העיר--ונשאתי לכל המקום בעבורם

²⁷כז ויען אברהם ויאמר הנה נא הואלתי לדבר אל אדני ואנכי עפר ואפר

²⁸כח אולי יחסרון חמשים הצדיקם חמשה--התשחית בחמשה את כל העיר ויאמר לא אשחית אם אמצא שם ארבעים וחמשה

²⁹כט ויסף עוד לדבר אליו ויאמר אולי ימצאון שם ארבעים ויאמר לא אעשה בעבור הארבעים

³⁰ל ויאמר אל נא יחר לאדני ואדברה--אולי ימצאון שם שלשים ויאמר לא אעשה אם אמצא שם שלשים

³¹לא ויאמר הנה נא הואלתי לדבר אל אדני--אולי ימצאון שם עשרים ויאמר לא אשחית בעבור העשרים

³²לב ויאמר אל נא יחר לאדני ואדברה אך הפעם--אולי ימצאון שם עשרה ויאמר לא אשחית בעבור העשרה

³³לג וילך יהוה--כאשר כלה לדבר אל אברהם ואברהם שב למקמו