Read כֶּתֶר אֲרָם צוֹבָא - Tanah Aleppo Codex בראשית 2 Bible Online

בראשית 2 - כֶּתֶר אֲרָם צוֹבָא - Tanah Aleppo Codex bible

בראשית 2

¹א ויכלו השמים והארץ וכל צבאם

²ב ויכל אלהים ביום השביעי מלאכתו אשר עשה וישבת ביום השביעי מכל מלאכתו אשר עשה

³ג ויברך אלהים את יום השביעי ויקדש אתו כי בו שבת מכל מלאכתו אשר ברא אלהים לעשות {פ}

⁴ד אלה תולדות השמים והארץ בהבראם ביום עשות יהוה אלהים--ארץ ושמים

⁵ה וכל שיח השדה טרם יהיה בארץ וכל עשב השדה טרם יצמח כי לא המטיר יהוה אלהים על הארץ ואדם אין לעבד את האדמה

⁶ו ואד יעלה מן הארץ והשקה את כל פני האדמה

⁷ז וייצר יהוה אלהים את האדם עפר מן האדמה ויפח באפיו נשמת חיים ויהי האדם לנפש חיה

⁸ח ויטע יהוה אלהים גן בעדן--מקדם וישם שם את האדם אשר יצר

⁹ט ויצמח יהוה אלהים מן האדמה כל עץ נחמד למראה וטוב למאכל--ועץ החיים בתוך הגן ועץ הדעת טוב ורע

¹⁰י ונהר יצא מעדן להשקות את הגן ומשם יפרד והיה לארבעה ראשים

¹¹יא שם האחד פישון--הוא הסבב את כל ארץ החוילה אשר שם הזהב

¹²יב וזהב הארץ ההוא טוב שם הבדלח ואבן השהם

¹³יג ושם הנהר השני גיחון--הוא הסובב את כל ארץ כוש

¹⁴יד ושם הנהר השלישי חדקל הוא ההלך קדמת אשור והנהר הרביעי הוא פרת

¹⁵טו ויקח יהוה אלהים את האדם וינחהו בגן עדן לעבדה ולשמרה

¹⁶טז ויצו יהוה אלהים על האדם לאמר מכל עץ הגן אכל תאכל

¹⁷יז ומעץ הדעת טוב ורע--לא תאכל ממנו כי ביום אכלך ממנו--מות תמות

¹⁸יח ויאמר יהוה אלהים לא טוב היות האדם לבדו אעשה לו עזר כנגדו

¹⁹יט ויצר יהוה אלהים מן האדמה כל חית השדה ואת כל עוף השמים ויבא אל האדם לראות מה יקרא לו וכל אשר יקרא לו האדם נפש חיה הוא שמו

²⁰כ ויקרא האדם שמות לכל הבהמה ולעוף השמים ולכל חית השדה ולאדם לא מצא עזר כנגדו

²¹כא ויפל יהוה אלהים תרדמה על האדם ויישן ויקח אחת מצלעתיו ויסגר בשר תחתנה

²²כב ויבן יהוה אלהים את הצלע אשר לקח מן האדם לאשה ויבאה אל האדם

²³כג ויאמר האדם זאת הפעם עצם מעצמי ובשר מבשרי לזאת יקרא אשה כי מאיש לקחה זאת

²⁴כד על כן יעזב איש את אביו ואת אמו ודבק באשתו והיו לבשר אחד

²⁵כה ויהיו שניהם ערומים האדם ואשתו ולא יתבששו