Read כֶּתֶר אֲרָם צוֹבָא - Tanah Aleppo Codex בראשית 20 Bible Online

בראשית 20 - כֶּתֶר אֲרָם צוֹבָא - Tanah Aleppo Codex bible

בראשית 20

¹א ויסע משם אברהם ארצה הנגב וישב בין קדש ובין שור ויגר בגרר

²ב ויאמר אברהם אל שרה אשתו אחתי הוא וישלח אבימלך מלך גרר ויקח את שרה

³ג ויבא אלהים אל אבימלך בחלום הלילה ויאמר לו הנך מת על האשה אשר לקחת והוא בעלת בעל

⁴ד ואבימלך לא קרב אליה ויאמר--אדני הגוי גם צדיק תהרג

⁵ה הלא הוא אמר לי אחתי הוא והיא גם הוא אמרה אחי הוא בתם לבבי ובנקין כפי עשיתי זאת

⁶ו ויאמר אליו האלהים בחלם גם אנכי ידעתי כי בתם לבבך עשית זאת ואחשך גם אנכי אותך מחטו לי על כן לא נתתיך לנגע אליה

⁷ז ועתה השב אשת האיש כי נביא הוא ויתפלל בעדך וחיה ואם אינך משיב--דע כי מות תמות אתה וכל אשר לך

⁸ח וישכם אבימלך בבקר ויקרא לכל עבדיו וידבר את כל הדברים האלה באזניהם וייראו האנשים מאד

⁹ט ויקרא אבימלך לאברהם ויאמר לו מה עשית לנו ומה חטאתי לך כי הבאת עלי ועל ממלכתי חטאה גדלה מעשים אשר לא יעשו עשית עמדי

¹⁰י ויאמר אבימלך אל אברהם מה ראית כי עשית את הדבר הזה

¹¹יא ויאמר אברהם כי אמרתי רק אין יראת אלהים במקום הזה והרגוני על דבר אשתי

¹²יב וגם אמנה אחתי בת אבי הוא--אך לא בת אמי ותהי לי לאשה

¹³יג ויהי כאשר התעו אתי אלהים מבית אבי ואמר לה זה חסדך אשר תעשי עמדי אל כל המקום אשר נבוא שמה אמרי לי אחי הוא

¹⁴יד ויקח אבימלך צאן ובקר ועבדים ושפחת ויתן לאברהם וישב לו את שרה אשתו

¹⁵טו ויאמר אבימלך הנה ארצי לפניך בטוב בעיניך שב

¹⁶טז ולשרה אמר הנה נתתי אלף כסף לאחיך--הנה הוא לך כסות עינים לכל אשר אתך ואת כל ונכחת

¹⁷יז ויתפלל אברהם אל האלהים וירפא אלהים את אבימלך ואת אשתו ואמהתיו--וילדו

¹⁸יח כי עצר עצר יהוה בעד כל רחם לבית אבימלך על דבר שרה אשת אברהם {ס}