Read כֶּתֶר אֲרָם צוֹבָא - Tanah Aleppo Codex בראשית 21 Bible Online

בראשית 21 - כֶּתֶר אֲרָם צוֹבָא - Tanah Aleppo Codex bible

בראשית 21

¹א ויהוה פקד את שרה כאשר אמר ויעש יהוה לשרה כאשר דבר

²ב ותהר ותלד שרה לאברהם בן לזקניו למועד אשר דבר אתו אלהים

³ג ויקרא אברהם את שם בנו הנולד לו אשר ילדה לו שרה--יצחק

⁴ד וימל אברהם את יצחק בנו בן שמנת ימים כאשר צוה אתו אלהים

⁵ה ואברהם בן מאת שנה בהולד לו את יצחק בנו

⁶ו ותאמר שרה--צחק עשה לי אלהים כל השמע יצחק לי

⁷ז ותאמר מי מלל לאברהם היניקה בנים שרה כי ילדתי בן לזקניו

⁸ח ויגדל הילד ויגמל ויעש אברהם משתה גדול ביום הגמל את יצחק

⁹ט ותרא שרה את בן הגר המצרית אשר ילדה לאברהם--מצחק

¹⁰י ותאמר לאברהם גרש האמה הזאת ואת בנה כי לא יירש בן האמה הזאת עם בני עם יצחק

¹¹יא וירע הדבר מאד בעיני אברהם על אודת בנו

¹²יב ויאמר אלהים אל אברהם אל ירע בעיניך על הנער ועל אמתך--כל אשר תאמר אליך שרה שמע בקלה כי ביצחק יקרא לך זרע

¹³יג וגם את בן האמה לגוי אשימנו כי זרעך הוא

¹⁴יד וישכם אברהם בבקר ויקח לחם וחמת מים ויתן אל הגר שם על שכמה ואת הילד--וישלחה ותלך ותתע במדבר באר שבע

¹⁵טו ויכלו המים מן החמת ותשלך את הילד תחת אחד השיחם

¹⁶טז ותלך ותשב לה מנגד הרחק כמטחוי קשת כי אמרה אל אראה במות הילד ותשב מנגד ותשא את קלה ותבך

¹⁷יז וישמע אלהים את קול הנער ויקרא מלאך אלהים אל הגר מן השמים ויאמר לה מה לך הגר אל תיראי כי שמע אלהים אל קול הנער באשר הוא שם

¹⁸יח קומי שאי את הנער והחזיקי את ידך בו כי לגוי גדול אשימנו

¹⁹יט ויפקח אלהים את עיניה ותרא באר מים ותלך ותמלא את החמת מים ותשק את הנער

²⁰כ ויהי אלהים את הנער ויגדל וישב במדבר ויהי רבה קשת

²¹כא וישב במדבר פארן ותקח לו אמו אשה מארץ מצרים {פ}

²²כב ויהי בעת ההוא ויאמר אבימלך ופיכל שר צבאו אל אברהם לאמר אלהים עמך בכל אשר אתה עשה

²³כג ועתה השבעה לי באלהים הנה אם תשקר לי ולניני ולנכדי כחסד אשר עשיתי עמך תעשה עמדי ועם הארץ אשר גרתה בה

²⁴כד ויאמר אברהם אנכי אשבע

²⁵כה והוכח אברהם את אבימלך על אדות באר המים אשר גזלו עבדי אבימלך

²⁶כו ויאמר אבימלך--לא ידעתי מי עשה את הדבר הזה וגם אתה לא הגדת לי וגם אנכי לא שמעתי--בלתי היום

²⁷כז ויקח אברהם צאן ובקר ויתן לאבימלך ויכרתו שניהם ברית

²⁸כח ויצב אברהם את שבע כבשת הצאן--לבדהן

²⁹כט ויאמר אבימלך אל אברהם מה הנה שבע כבשת האלה אשר הצבת לבדנה

³⁰ל ויאמר--כי את שבע כבשת תקח מידי בעבור תהיה לי לעדה כי חפרתי את הבאר הזאת

³¹לא על כן קרא למקום ההוא--באר שבע כי שם נשבעו שניהם

³²לב ויכרתו ברית בבאר שבע ויקם אבימלך ופיכל שר צבאו וישבו אל ארץ פלשתים

³³לג ויטע אשל בבאר שבע ויקרא שם--בשם יהוה אל עולם

³⁴לד ויגר אברהם בארץ פלשתים ימים רבים {פ}