Read כֶּתֶר אֲרָם צוֹבָא - Tanah Aleppo Codex בראשית 23 Bible Online

בראשית 23 - כֶּתֶר אֲרָם צוֹבָא - Tanah Aleppo Codex bible

בראשית 23

¹א ויהיו חיי שרה מאה שנה ועשרים שנה ושבע שנים--שני חיי שרה

²ב ותמת שרה בקרית ארבע הוא חברון--בארץ כנען ויבא אברהם לספד לשרה ולבכתה

³ג ויקם אברהם מעל פני מתו וידבר אל בני חת לאמר

⁴ד גר ותושב אנכי עמכם תנו לי אחזת קבר עמכם ואקברה מתי מלפני

⁵ה ויענו בני חת את אברהם לאמר לו

⁶ו שמענו אדני נשיא אלהים אתה בתוכנו--במבחר קברינו קבר את מתך איש ממנו את קברו לא יכלה ממך מקבר מתך

⁷ז ויקם אברהם וישתחו לעם הארץ לבני חת

⁸ח וידבר אתם לאמר אם יש את נפשכם לקבר את מתי מלפני--שמעוני ופגעו לי בעפרון בן צחר

⁹ט ויתן לי את מערת המכפלה אשר לו אשר בקצה שדהו בכסף מלא יתננה לי בתוככם--לאחזת קבר

¹⁰י ועפרון ישב בתוך בני חת ויען עפרון החתי את אברהם באזני בני חת לכל באי שער עירו לאמר

¹¹יא לא אדני שמעני--השדה נתתי לך והמערה אשר בו לך נתתיה לעיני בני עמי נתתיה לך קבר מתך

¹²יב וישתחו אברהם לפני עם הארץ

¹³יג וידבר אל עפרון באזני עם הארץ לאמר אך אם אתה לו שמעני נתתי כסף השדה קח ממני ואקברה את מתי שמה

¹⁴יד ויען עפרון את אברהם לאמר לו

¹⁵טו אדני שמעני ארץ ארבע מאת שקל כסף ביני ובינך מה הוא ואת מתך קבר

¹⁶טז וישמע אברהם אל עפרון וישקל אברהם לעפרן את הכסף אשר דבר באזני בני חת--ארבע מאות שקל כסף עבר לסחר

¹⁷יז ויקם שדה עפרון אשר במכפלה אשר לפני ממרא השדה והמערה אשר בו וכל העץ אשר בשדה אשר בכל גבלו סביב

¹⁸יח לאברהם למקנה לעיני בני חת בכל באי שער עירו

¹⁹יט ואחרי כן קבר אברהם את שרה אשתו אל מערת שדה המכפלה על פני ממרא--הוא חברון בארץ כנען

²⁰כ ויקם השדה והמערה אשר בו לאברהם--לאחזת קבר מאת בני חת {ס}