Read כֶּתֶר אֲרָם צוֹבָא - Tanah Aleppo Codex בראשית 24 Bible Online

בראשית 24 - כֶּתֶר אֲרָם צוֹבָא - Tanah Aleppo Codex bible

בראשית 24

¹א ואברהם זקן בא בימים ויהוה ברך את אברהם בכל

²ב ויאמר אברהם אל עבדו זקן ביתו המשל בכל אשר לו שים נא ידך תחת ירכי

³ג ואשביעך--ביהוה אלהי השמים ואלהי הארץ אשר לא תקח אשה לבני מבנות הכנעני אשר אנכי יושב בקרבו

⁴ד כי אל ארצי ואל מולדתי תלך ולקחת אשה לבני ליצחק

⁵ה ויאמר אליו העבד אולי לא תאבה האשה ללכת אחרי אל הארץ הזאת ההשב אשיב את בנך אל הארץ אשר יצאת משם

⁶ו ויאמר אליו אברהם השמר לך פן תשיב את בני שמה

⁷ז יהוה אלהי השמים אשר לקחני מבית אבי ומארץ מולדתי ואשר דבר לי ואשר נשבע לי לאמר לזרעך אתן את הארץ הזאת--הוא ישלח מלאכו לפניך ולקחת אשה לבני משם

⁸ח ואם לא תאבה האשה ללכת אחריך--ונקית משבעתי זאת רק את בני לא תשב שמה

⁹ט וישם העבד את ידו תחת ירך אברהם אדניו וישבע לו על הדבר הזה

¹⁰י ויקח העבד עשרה גמלים מגמלי אדניו וילך וכל טוב אדניו בידו ויקם וילך אל ארם נהרים--אל עיר נחור

¹¹יא ויברך הגמלים מחוץ לעיר אל באר המים לעת ערב לעת צאת השאבת

¹²יב ויאמר--יהוה אלהי אדני אברהם הקרה נא לפני היום ועשה חסד עם אדני אברהם

¹³יג הנה אנכי נצב על עין המים ובנות אנשי העיר יצאת לשאב מים

¹⁴יד והיה הנער אשר אמר אליה הטי נא כדך ואשתה ואמרה שתה וגם גמליך אשקה--אתה הכחת לעבדך ליצחק ובה אדע כי עשית חסד עם אדני

¹⁵טו ויהי הוא טרם כלה לדבר והנה רבקה יצאת אשר ילדה לבתואל בן מלכה אשת נחור אחי אברהם וכדה על שכמה

¹⁶טז והנער טבת מראה מאד--בתולה ואיש לא ידעה ותרד העינה ותמלא כדה ותעל

¹⁷יז וירץ העבד לקראתה ויאמר הגמיאיני נא מעט מים מכדך

¹⁸יח ותאמר שתה אדני ותמהר ותרד כדה על ידה--ותשקהו

¹⁹יט ותכל להשקתו ותאמר גם לגמליך אשאב עד אם כלו לשתת

²⁰כ ותמהר ותער כדה אל השקת ותרץ עוד אל הבאר לשאב ותשאב לכל גמליו

²¹כא והאיש משתאה לה מחריש--לדעת ההצליח יהוה דרכו אם לא

²²כב ויהי כאשר כלו הגמלים לשתות ויקח האיש נזם זהב בקע משקלו--ושני צמידים על ידיה עשרה זהב משקלם

²³כג ויאמר בת מי את הגידי נא לי היש בית אביך מקום לנו ללין

²⁴כד ותאמר אליו בת בתואל אנכי--בן מלכה אשר ילדה לנחור

²⁵כה ותאמר אליו גם תבן גם מספוא רב עמנו--גם מקום ללון

²⁶כו ויקד האיש וישתחו ליהוה

²⁷כז ויאמר ברוך יהוה אלהי אדני אברהם אשר לא עזב חסדו ואמתו מעם אדני אנכי בדרך נחני יהוה בית אחי אדני

²⁸כח ותרץ הנער ותגד לבית אמה--כדברים האלה

²⁹כט ולרבקה אח ושמו לבן וירץ לבן אל האיש החוצה אל העין

³⁰ל ויהי כראת את הנזם ואת הצמדים על ידי אחתו וכשמעו את דברי רבקה אחתו לאמר כה דבר אלי האיש ויבא אל האיש והנה עמד על הגמלים על העין

³¹לא ויאמר בוא ברוך יהוה למה תעמד בחוץ ואנכי פניתי הבית ומקום לגמלים

³²לב ויבא האיש הביתה ויפתח הגמלים ויתן תבן ומספוא לגמלים ומים לרחץ רגליו ורגלי האנשים אשר אתו

³³לג ויישם (ויושם) לפניו לאכל ויאמר לא אכל עד אם דברתי דברי ויאמר דבר

³⁴לד ויאמר עבד אברהם אנכי

³⁵לה ויהוה ברך את אדני מאד--ויגדל ויתן לו צאן ובקר וכסף וזהב ועבדם ושפחת וגמלים וחמרים

³⁶לו ותלד שרה אשת אדני בן לאדני אחרי זקנתה ויתן לו את כל אשר לו

³⁷לז וישבעני אדני לאמר לא תקח אשה לבני מבנות הכנעני אשר אנכי ישב בארצו

³⁸לח אם לא אל בית אבי תלך ואל משפחתי ולקחת אשה לבני

³⁹לט ואמר אל אדני אלי לא תלך האשה אחרי

⁴⁰מ ויאמר אלי יהוה אשר התהלכתי לפניו ישלח מלאכו אתך והצליח דרכך ולקחת אשה לבני ממשפחתי ומבית אבי

⁴¹מא אז תנקה מאלתי כי תבוא אל משפחתי ואם לא יתנו לך והיית נקי מאלתי

⁴²מב ואבא היום אל העין ואמר יהוה אלהי אדני אברהם אם ישך נא מצליח דרכי אשר אנכי הלך עליה

⁴³מג הנה אנכי נצב על עין המים והיה העלמה היצאת לשאב ואמרתי אליה השקיני נא מעט מים מכדך

⁴⁴מד ואמרה אלי גם אתה שתה וגם לגמליך אשאב--הוא האשה אשר הכיח יהוה לבן אדני

⁴⁵מה אני טרם אכלה לדבר אל לבי והנה רבקה יצאת וכדה על שכמה ותרד העינה ותשאב ואמר אליה השקיני נא

⁴⁶מו ותמהר ותורד כדה מעליה ותאמר שתה וגם גמליך אשקה ואשת וגם הגמלים השקתה

⁴⁷מז ואשאל אתה ואמר בת מי את ותאמר בת בתואל בן נחור אשר ילדה לו מלכה ואשם הנזם על אפה והצמידים על ידיה

⁴⁸מח ואקד ואשתחוה ליהוה ואברך את יהוה אלהי אדני אברהם אשר הנחני בדרך אמת לקחת את בת אחי אדני לבנו

⁴⁹מט ועתה אם ישכם עשים חסד ואמת את אדני--הגידו לי ואם לא--הגידו לי ואפנה על ימין או על שמאל

⁵⁰נ ויען לבן ובתואל ויאמרו מיהוה יצא הדבר לא נוכל דבר אליך רע או טוב

⁵¹נא הנה רבקה לפניך קח ולך ותהי אשה לבן אדניך כאשר דבר יהוה

⁵²נב ויהי כאשר שמע עבד אברהם את דבריהם וישתחו ארצה ליהוה

⁵³נג ויוצא העבד כלי כסף וכלי זהב ובגדים ויתן לרבקה ומגדנת--נתן לאחיה ולאמה

⁵⁴נד ויאכלו וישתו הוא והאנשים אשר עמו--וילינו ויקומו בבקר ויאמר שלחני לאדני

⁵⁵נה ויאמר אחיה ואמה תשב הנער אתנו ימים או עשור אחר תלך

⁵⁶נו ויאמר אלהם אל תאחרו אתי ויהוה הצליח דרכי שלחוני ואלכה לאדני

⁵⁷נז ויאמרו נקרא לנער ונשאלה את פיה

⁵⁸נח ויקראו לרבקה ויאמרו אליה התלכי עם האיש הזה ותאמר אלך

⁵⁹נט וישלחו את רבקה אחתם ואת מנקתה ואת עבד אברהם ואת אנשיו

⁶⁰ס ויברכו את רבקה ויאמרו לה--אחתנו את היי לאלפי רבבה ויירש זרעך את שער שנאיו

⁶¹סא ותקם רבקה ונערתיה ותרכבנה על הגמלים ותלכנה אחרי האיש ויקח העבד את רבקה וילך

⁶²סב ויצחק בא מבוא באר לחי ראי והוא יושב בארץ הנגב

⁶³סג ויצא יצחק לשוח בשדה לפנות ערב וישא עיניו וירא והנה גמלים באים

⁶⁴סד ותשא רבקה את עיניה ותרא את יצחק ותפל מעל הגמל

⁶⁵סה ותאמר אל העבד מי האיש הלזה ההלך בשדה לקראתנו ויאמר העבד הוא אדני ותקח הצעיף ותתכס

⁶⁶סו ויספר העבד ליצחק את כל הדברים אשר עשה

⁶⁷סז ויבאה יצחק האהלה שרה אמו ויקח את רבקה ותהי לו לאשה ויאהבה וינחם יצחק אחרי אמו {פ}