Read כֶּתֶר אֲרָם צוֹבָא - Tanah Aleppo Codex בראשית 25 Bible Online

בראשית 25 - כֶּתֶר אֲרָם צוֹבָא - Tanah Aleppo Codex bible

בראשית 25

¹א ויסף אברהם ויקח אשה ושמה קטורה

²ב ותלד לו את זמרן ואת יקשן ואת מדן ואת מדין--ואת ישבק ואת שוח

³ג ויקשן ילד את שבא ואת דדן ובני דדן היו אשורם ולטושם ולאמים

⁴ד ובני מדין עיפה ועפר וחנך ואבידע ואלדעה כל אלה בני קטורה

⁵ה ויתן אברהם את כל אשר לו ליצחק

⁶ו ולבני הפילגשים אשר לאברהם נתן אברהם מתנת וישלחם מעל יצחק בנו בעודנו חי קדמה אל ארץ קדם

⁷ז ואלה ימי שני חיי אברהם--אשר חי מאת שנה ושבעים שנה וחמש שנים

⁸ח ויגוע וימת אברהם בשיבה טובה זקן ושבע ויאסף אל עמיו

⁹ט ויקברו אתו יצחק וישמעאל בניו אל מערת המכפלה אל שדה עפרן בן צחר החתי אשר על פני ממרא

¹⁰י השדה אשר קנה אברהם מאת בני חת--שמה קבר אברהם ושרה אשתו

¹¹יא ויהי אחרי מות אברהם ויברך אלהים את יצחק בנו וישב יצחק עם באר לחי ראי {פ}

¹²יב ואלה תלדת ישמעאל בן אברהם אשר ילדה הגר המצרית שפחת שרה--לאברהם

¹³יג ואלה שמות בני ישמעאל בשמתם לתולדתם בכר ישמעאל נבית וקדר ואדבאל ומבשם

¹⁴יד ומשמע ודומה ומשא

¹⁵טו חדד ותימא יטור נפיש וקדמה

¹⁶טז אלה הם בני ישמעאל ואלה שמתם בחצריהם ובטירתם--שנים עשר נשיאם לאמתם

¹⁷יז ואלה שני חיי ישמעאל--מאת שנה ושלשים שנה ושבע שנים ויגוע וימת ויאסף אל עמיו

¹⁸יח וישכנו מחוילה עד שור אשר על פני מצרים באכה אשורה על פני כל אחיו נפל {פ}

¹⁹יט ואלה תולדת יצחק בן אברהם אברהם הוליד את יצחק

²⁰כ ויהי יצחק בן ארבעים שנה בקחתו את רבקה בת בתואל הארמי מפדן ארם--אחות לבן הארמי לו לאשה

²¹כא ויעתר יצחק ליהוה לנכח אשתו כי עקרה הוא ויעתר לו יהוה ותהר רבקה אשתו

²²כב ויתרצצו הבנים בקרבה ותאמר אם כן למה זה אנכי ותלך לדרש את יהוה

²³כג ויאמר יהוה לה שני גיים (גוים) בבטנך ושני לאמים ממעיך יפרדו ולאם מלאם יאמץ ורב יעבד צעיר

²⁴כד וימלאו ימיה ללדת והנה תומם בבטנה

²⁵כה ויצא הראשון אדמוני כלו כאדרת שער ויקראו שמו עשו

²⁶כו ואחרי כן יצא אחיו וידו אחזת בעקב עשו ויקרא שמו יעקב ויצחק בן ששים שנה בלדת אתם

²⁷כז ויגדלו הנערים ויהי עשו איש ידע ציד איש שדה ויעקב איש תם ישב אהלים

²⁸כח ויאהב יצחק את עשו כי ציד בפיו ורבקה אהבת את יעקב

²⁹כט ויזד יעקב נזיד ויבא עשו מן השדה והוא עיף

³⁰ל ויאמר עשו אל יעקב הלעיטני נא מן האדם האדם הזה--כי עיף אנכי על כן קרא שמו אדום

³¹לא ויאמר יעקב מכרה כיום את בכרתך לי

³²לב ויאמר עשו הנה אנכי הולך למות ולמה זה לי בכרה

³³לג ויאמר יעקב השבעה לי כיום וישבע לו וימכר את בכרתו ליעקב

³⁴לד ויעקב נתן לעשו לחם ונזיד עדשים ויאכל וישת ויקם וילך ויבז עשו את הבכרה {פ}