Read כֶּתֶר אֲרָם צוֹבָא - Tanah Aleppo Codex בראשית 26 Bible Online

בראשית 26 - כֶּתֶר אֲרָם צוֹבָא - Tanah Aleppo Codex bible

בראשית 26

¹א ויהי רעב בארץ מלבד הרעב הראשון אשר היה בימי אברהם וילך יצחק אל אבימלך מלך פלשתים גררה

²ב וירא אליו יהוה ויאמר אל תרד מצרימה שכן בארץ אשר אמר אליך

³ג גור בארץ הזאת ואהיה עמך ואברכך כי לך ולזרעך אתן את כל הארצת האל והקמתי את השבעה אשר נשבעתי לאברהם אביך

⁴ד והרביתי את זרעך ככוכבי השמים ונתתי לזרעך את כל הארצת האל והתברכו בזרעך כל גויי הארץ

⁵ה עקב אשר שמע אברהם בקלי וישמר משמרתי מצותי חקותי ותורתי

⁶ו וישב יצחק בגרר

⁷ז וישאלו אנשי המקום לאשתו ויאמר אחתי הוא כי ירא לאמר אשתי פן יהרגני אנשי המקום על רבקה כי טובת מראה הוא

⁸ח ויהי כי ארכו לו שם הימים וישקף אבימלך מלך פלשתים בעד החלון וירא והנה יצחק מצחק את רבקה אשתו

⁹ט ויקרא אבימלך ליצחק ויאמר אך הנה אשתך הוא ואיך אמרת אחתי הוא ויאמר אליו יצחק כי אמרתי פן אמות עליה

¹⁰י ויאמר אבימלך מה זאת עשית לנו כמעט שכב אחד העם את אשתך והבאת עלינו אשם

¹¹יא ויצו אבימלך את כל העם לאמר הנגע באיש הזה ובאשתו--מות יומת

¹²יב ויזרע יצחק בארץ ההוא וימצא בשנה ההוא מאה שערים ויברכהו יהוה

¹³יג ויגדל האיש וילך הלוך וגדל עד כי גדל מאד

¹⁴יד ויהי לו מקנה צאן ומקנה בקר ועבדה רבה ויקנאו אתו פלשתים

¹⁵טו וכל הבארת אשר חפרו עבדי אביו בימי אברהם אביו--סתמום פלשתים וימלאום עפר

¹⁶טז ויאמר אבימלך אל יצחק לך מעמנו כי עצמת ממנו מאד

¹⁷יז וילך משם יצחק ויחן בנחל גרר וישב שם

¹⁸יח וישב יצחק ויחפר את בארת המים אשר חפרו בימי אברהם אביו ויסתמום פלשתים אחרי מות אברהם ויקרא להן שמות כשמת אשר קרא להן אביו

¹⁹יט ויחפרו עבדי יצחק בנחל וימצאו שם--באר מים חיים

²⁰כ ויריבו רעי גרר עם רעי יצחק לאמר--לנו המים ויקרא שם הבאר עשק כי התעשקו עמו

²¹כא ויחפרו באר אחרת ויריבו גם עליה ויקרא שמה שטנה

²²כב ויעתק משם ויחפר באר אחרת ולא רבו עליה ויקרא שמה רחבות ויאמר כי עתה הרחיב יהוה לנו ופרינו בארץ

²³כג ויעל משם באר שבע

²⁴כד וירא אליו יהוה בלילה ההוא ויאמר אנכי אלהי אברהם אביך אל תירא כי אתך אנכי וברכתיך והרביתי את זרעך בעבור אברהם עבדי

²⁵כה ויבן שם מזבח ויקרא בשם יהוה ויט שם אהלו ויכרו שם עבדי יצחק באר

²⁶כו ואבימלך הלך אליו מגרר ואחזת מרעהו ופיכל שר צבאו

²⁷כז ויאמר אלהם יצחק מדוע באתם אלי ואתם שנאתם אתי ותשלחוני מאתכם

²⁸כח ויאמרו ראו ראינו כי היה יהוה עמך ונאמר תהי נא אלה בינותינו בינינו ובינך ונכרתה ברית עמך

²⁹כט אם תעשה עמנו רעה כאשר לא נגענוך וכאשר עשינו עמך רק טוב ונשלחך בשלום אתה עתה ברוך יהוה

³⁰ל ויעש להם משתה ויאכלו וישתו

³¹לא וישכימו בבקר וישבעו איש לאחיו וישלחם יצחק וילכו מאתו בשלום

³²לב ויהי ביום ההוא ויבאו עבדי יצחק ויגדו לו על אדות הבאר אשר חפרו ויאמרו לו מצאנו מים

³³לג ויקרא אתה שבעה על כן שם העיר באר שבע עד היום הזה {ס}

³⁴לד ויהי עשו בן ארבעים שנה ויקח אשה את יהודית בת בארי החתי--ואת בשמת בת אילן החתי

³⁵לה ותהיין מרת רוח ליצחק ולרבקה {ס}