Read כֶּתֶר אֲרָם צוֹבָא - Tanah Aleppo Codex בראשית 27 Bible Online

בראשית 27 - כֶּתֶר אֲרָם צוֹבָא - Tanah Aleppo Codex bible

בראשית 27

¹א ויהי כי זקן יצחק ותכהין עיניו מראת ויקרא את עשו בנו הגדל ויאמר אליו בני ויאמר אליו הנני

²ב ויאמר הנה נא זקנתי לא ידעתי יום מותי

³ג ועתה שא נא כליך תליך וקשתך וצא השדה וצודה לי צידה (ציד)

⁴ד ועשה לי מטעמים כאשר אהבתי והביאה לי--ואכלה בעבור תברכך נפשי בטרם אמות

⁵ה ורבקה שמעת--בדבר יצחק אל עשו בנו וילך עשו השדה לצוד ציד להביא

⁶ו ורבקה אמרה אל יעקב בנה לאמר הנה שמעתי את אביך מדבר אל עשו אחיך לאמר

⁷ז הביאה לי ציד ועשה לי מטעמים ואכלה ואברככה לפני יהוה לפני מותי

⁸ח ועתה בני שמע בקלי--לאשר אני מצוה אתך

⁹ט לך נא אל הצאן וקח לי משם שני גדיי עזים טבים ואעשה אתם מטעמים לאביך כאשר אהב

¹⁰י והבאת לאביך ואכל בעבר אשר יברכך לפני מותו

¹¹יא ויאמר יעקב אל רבקה אמו הן עשו אחי איש שער ואנכי איש חלק

¹²יב אולי ימשני אבי והייתי בעיניו כמתעתע והבאתי עלי קללה ולא ברכה

¹³יג ותאמר לו אמו עלי קללתך בני אך שמע בקלי ולך קח לי

¹⁴יד וילך ויקח ויבא לאמו ותעש אמו מטעמים כאשר אהב אביו

¹⁵טו ותקח רבקה את בגדי עשו בנה הגדל החמדת אשר אתה בבית ותלבש את יעקב בנה הקטן

¹⁶טז ואת ערת גדיי העזים הלבישה על ידיו--ועל חלקת צואריו

¹⁷יז ותתן את המטעמים ואת הלחם אשר עשתה ביד יעקב בנה

¹⁸יח ויבא אל אביו ויאמר אבי ויאמר הנני מי אתה בני

¹⁹יט ויאמר יעקב אל אביו אנכי עשו בכרך--עשיתי כאשר דברת אלי קום נא שבה ואכלה מצידי--בעבור תברכני נפשך

²⁰כ ויאמר יצחק אל בנו מה זה מהרת למצא בני ויאמר כי הקרה יהוה אלהיך לפני

²¹כא ויאמר יצחק אל יעקב גשה נא ואמשך בני האתה זה בני עשו אם לא

²²כב ויגש יעקב אל יצחק אביו וימשהו ויאמר הקל קול יעקב והידים ידי עשו

²³כג ולא הכירו--כי היו ידיו כידי עשו אחיו שערת ויברכהו

²⁴כד ויאמר אתה זה בני עשו ויאמר אני

²⁵כה ויאמר הגשה לי ואכלה מציד בני--למען תברכך נפשי ויגש לו ויאכל ויבא לו יין וישת

²⁶כו ויאמר אליו יצחק אביו גשה נא ושקה לי בני

²⁷כז ויגש וישק לו וירח את ריח בגדיו ויברכהו ויאמר ראה ריח בני כריח שדה אשר ברכו יהוה

²⁸כח ויתן לך האלהים מטל השמים ומשמני הארץ--ורב דגן ותירש

²⁹כט יעבדוך עמים וישתחו (וישתחוו) לך לאמים--הוה גביר לאחיך וישתחוו לך בני אמך ארריך ארור ומברכיך ברוך

³⁰ל ויהי כאשר כלה יצחק לברך את יעקב ויהי אך יצא יצא יעקב מאת פני יצחק אביו ועשו אחיו בא מצידו

³¹לא ויעש גם הוא מטעמים ויבא לאביו ויאמר לאביו יקם אבי ויאכל מציד בנו--בעבר תברכני נפשך

³²לב ויאמר לו יצחק אביו מי אתה ויאמר אני בנך בכרך עשו

³³לג ויחרד יצחק חרדה גדלה עד מאד ויאמר מי אפוא הוא הצד ציד ויבא לי ואכל מכל בטרם תבוא ואברכהו גם ברוך יהיה

³⁴לד כשמע עשו את דברי אביו ויצעק צעקה גדלה ומרה עד מאד ויאמר לאביו ברכני גם אני אבי

³⁵לה ויאמר בא אחיך במרמה ויקח ברכתך

³⁶לו ויאמר הכי קרא שמו יעקב ויעקבני זה פעמים--את בכרתי לקח והנה עתה לקח ברכתי ויאמר הלא אצלת לי ברכה

³⁷לז ויען יצחק ויאמר לעשו הן גביר שמתיו לך ואת כל אחיו נתתי לו לעבדים ודגן ותירש סמכתיו ולכה אפוא מה אעשה בני

³⁸לח ויאמר עשו אל אביו הברכה אחת הוא לך אבי--ברכני גם אני אבי וישא עשו קלו ויבך

³⁹לט ויען יצחק אביו ויאמר אליו הנה משמני הארץ יהיה מושבך ומטל השמים מעל

⁴⁰מ ועל חרבך תחיה ואת אחיך תעבד והיה כאשר תריד ופרקת עלו מעל צוארך

⁴¹מא וישטם עשו את יעקב על הברכה אשר ברכו אביו ויאמר עשו בלבו יקרבו ימי אבל אבי ואהרגה את יעקב אחי

⁴²מב ויגד לרבקה את דברי עשו בנה הגדל ותשלח ותקרא ליעקב בנה הקטן ותאמר אליו הנה עשו אחיך מתנחם לך להרגך

⁴³מג ועתה בני שמע בקלי וקום ברח לך אל לבן אחי חרנה

⁴⁴מד וישבת עמו ימים אחדים--עד אשר תשוב חמת אחיך

⁴⁵מה עד שוב אף אחיך ממך ושכח את אשר עשית לו ושלחתי ולקחתיך משם למה אשכל גם שניכם יום אחד

⁴⁶מו ותאמר רבקה אל יצחק קצתי בחיי מפני בנות חת אם לקח יעקב אשה מבנות חת כאלה מבנות הארץ--למה לי חיים