Read כֶּתֶר אֲרָם צוֹבָא - Tanah Aleppo Codex בראשית 28 Bible Online

בראשית 28 - כֶּתֶר אֲרָם צוֹבָא - Tanah Aleppo Codex bible

בראשית 28

¹א ויקרא יצחק אל יעקב ויברך אתו ויצוהו ויאמר לו לא תקח אשה מבנות כנען

²ב קום לך פדנה ארם ביתה בתואל אבי אמך וקח לך משם אשה מבנות לבן אחי אמך

³ג ואל שדי יברך אתך ויפרך וירבך והיית לקהל עמים

⁴ד ויתן לך את ברכת אברהם לך ולזרעך אתך--לרשתך את ארץ מגריך אשר נתן אלהים לאברהם

⁵ה וישלח יצחק את יעקב וילך פדנה ארם--אל לבן בן בתואל הארמי אחי רבקה אם יעקב ועשו

⁶ו וירא עשו כי ברך יצחק את יעקב ושלח אתו פדנה ארם לקחת לו משם אשה בברכו אתו--ויצו עליו לאמר לא תקח אשה מבנות כנען

⁷ז וישמע יעקב אל אביו ואל אמו וילך פדנה ארם

⁸ח וירא עשו כי רעות בנות כנען בעיני יצחק אביו

⁹ט וילך עשו אל ישמעאל ויקח את מחלת בת ישמעאל בן אברהם אחות נביות על נשיו--לו לאשה {ס}

¹⁰י ויצא יעקב מבאר שבע וילך חרנה

¹¹יא ויפגע במקום וילן שם כי בא השמש ויקח מאבני המקום וישם מראשתיו וישכב במקום ההוא

¹²יב ויחלם והנה סלם מצב ארצה וראשו מגיע השמימה והנה מלאכי אלהים עלים וירדים בו

¹³יג והנה יהוה נצב עליו ויאמר אני יהוה אלהי אברהם אביך ואלהי יצחק הארץ אשר אתה שכב עליה--לך אתננה ולזרעך

¹⁴יד והיה זרעך כעפר הארץ ופרצת ימה וקדמה וצפנה ונגבה ונברכו בך כל משפחת האדמה ובזרעך

¹⁵טו והנה אנכי עמך ושמרתיך בכל אשר תלך והשבתיך אל האדמה הזאת כי לא אעזבך עד אשר אם עשיתי את אשר דברתי לך

¹⁶טז וייקץ יעקב משנתו ויאמר אכן יש יהוה במקום הזה ואנכי לא ידעתי

¹⁷יז ויירא ויאמר מה נורא המקום הזה אין זה כי אם בית אלהים וזה שער השמים

¹⁸יח וישכם יעקב בבקר ויקח את האבן אשר שם מראשתיו וישם אתה מצבה ויצק שמן על ראשה

¹⁹יט ויקרא את שם המקום ההוא בית אל ואולם לוז שם העיר לראשנה

²⁰כ וידר יעקב נדר לאמר אם יהיה אלהים עמדי ושמרני בדרך הזה אשר אנכי הולך ונתן לי לחם לאכל ובגד ללבש

²¹כא ושבתי בשלום אל בית אבי והיה יהוה לי לאלהים

²²כב והאבן הזאת אשר שמתי מצבה--יהיה בית אלהים וכל אשר תתן לי עשר אעשרנו לך