Read כֶּתֶר אֲרָם צוֹבָא - Tanah Aleppo Codex בראשית 29 Bible Online

בראשית 29 - כֶּתֶר אֲרָם צוֹבָא - Tanah Aleppo Codex bible

בראשית 29

¹א וישא יעקב רגליו וילך ארצה בני קדם

²ב וירא והנה באר בשדה והנה שם שלשה עדרי צאן רבצים עליה--כי מן הבאר ההוא ישקו העדרים והאבן גדלה על פי הבאר

³ג ונאספו שמה כל העדרים וגללו את האבן מעל פי הבאר והשקו את הצאן והשיבו את האבן על פי הבאר למקמה

⁴ד ויאמר להם יעקב אחי מאין אתם ויאמרו מחרן אנחנו

⁵ה ויאמר להם הידעתם את לבן בן נחור ויאמרו ידענו

⁶ו ויאמר להם השלום לו ויאמרו שלום--והנה רחל בתו באה עם הצאן

⁷ז ויאמר הן עוד היום גדול--לא עת האסף המקנה השקו הצאן ולכו רעו

⁸ח ויאמרו לא נוכל עד אשר יאספו כל העדרים וגללו את האבן מעל פי הבאר והשקינו הצאן

⁹ט עודנו מדבר עמם ורחל באה עם הצאן אשר לאביה--כי רעה הוא

¹⁰י ויהי כאשר ראה יעקב את רחל בת לבן אחי אמו ואת צאן לבן אחי אמו ויגש יעקב ויגל את האבן מעל פי הבאר וישק את צאן לבן אחי אמו

¹¹יא וישק יעקב לרחל וישא את קלו ויבך

¹²יב ויגד יעקב לרחל כי אחי אביה הוא וכי בן רבקה הוא ותרץ ותגד לאביה

¹³יג ויהי כשמע לבן את שמע יעקב בן אחתו וירץ לקראתו ויחבק לו וינשק לו ויביאהו אל ביתו ויספר ללבן את כל הדברים האלה

¹⁴יד ויאמר לו לבן אך עצמי ובשרי אתה וישב עמו חדש ימים

¹⁵טו ויאמר לבן ליעקב הכי אחי אתה ועבדתני חנם הגידה לי מה משכרתך

¹⁶טז וללבן שתי בנות שם הגדלה לאה ושם הקטנה רחל

¹⁷יז ועיני לאה רכות ורחל היתה יפת תאר ויפת מראה

¹⁸יח ויאהב יעקב את רחל ויאמר אעבדך שבע שנים ברחל בתך הקטנה

¹⁹יט ויאמר לבן טוב תתי אתה לך מתתי אתה לאיש אחר שבה עמדי

²⁰כ ויעבד יעקב ברחל שבע שנים ויהיו בעיניו כימים אחדים באהבתו אתה

²¹כא ויאמר יעקב אל לבן הבה את אשתי כי מלאו ימי ואבואה אליה

²²כב ויאסף לבן את כל אנשי המקום ויעש משתה

²³כג ויהי בערב--ויקח את לאה בתו ויבא אתה אליו ויבא אליה

²⁴כד ויתן לבן לה את זלפה שפחתו--ללאה בתו שפחה

²⁵כה ויהי בבקר והנה הוא לאה ויאמר אל לבן מה זאת עשית לי--הלא ברחל עבדתי עמך ולמה רמיתני

²⁶כו ויאמר לבן לא יעשה כן במקומנו--לתת הצעירה לפני הבכירה

²⁷כז מלא שבע זאת ונתנה לך גם את זאת בעבדה אשר תעבד עמדי עוד שבע שנים אחרות

²⁸כח ויעש יעקב כן וימלא שבע זאת ויתן לו את רחל בתו לו לאשה

²⁹כט ויתן לבן לרחל בתו את בלהה שפחתו--לה לשפחה

³⁰ל ויבא גם אל רחל ויאהב גם את רחל מלאה ויעבד עמו עוד שבע שנים אחרות

³¹לא וירא יהוה כי שנואה לאה ויפתח את רחמה ורחל עקרה

³²לב ותהר לאה ותלד בן ותקרא שמו ראובן כי אמרה כי ראה יהוה בעניי--כי עתה יאהבני אישי

³³לג ותהר עוד ותלד בן ותאמר כי שמע יהוה כי שנואה אנכי ויתן לי גם את זה ותקרא שמו שמעון

³⁴לד ותהר עוד ותלד בן ותאמר עתה הפעם ילוה אישי אלי כי ילדתי לו שלשה בנים על כן קרא שמו לוי

³⁵לה ותהר עוד ותלד בן ותאמר הפעם אודה את יהוה--על כן קראה שמו יהודה ותעמד מלדת