Read כֶּתֶר אֲרָם צוֹבָא - Tanah Aleppo Codex בראשית 3 Bible Online

בראשית 3 - כֶּתֶר אֲרָם צוֹבָא - Tanah Aleppo Codex bible

בראשית 3

¹א והנחש היה ערום מכל חית השדה אשר עשה יהוה אלהים ויאמר אל האשה אף כי אמר אלהים לא תאכלו מכל עץ הגן

²ב ותאמר האשה אל הנחש מפרי עץ הגן נאכל

³ג ומפרי העץ אשר בתוך הגן--אמר אלהים לא תאכלו ממנו ולא תגעו בו פן תמתון

⁴ד ויאמר הנחש אל האשה לא מות תמתון

⁵ה כי ידע אלהים כי ביום אכלכם ממנו ונפקחו עיניכם והייתם כאלהים ידעי טוב ורע

⁶ו ותרא האשה כי טוב העץ למאכל וכי תאוה הוא לעינים ונחמד העץ להשכיל ותקח מפריו ותאכל ותתן גם לאישה עמה ויאכל

⁷ז ותפקחנה עיני שניהם וידעו כי עירמם הם ויתפרו עלה תאנה ויעשו להם חגרת

⁸ח וישמעו את קול יהוה אלהים מתהלך בגן--לרוח היום ויתחבא האדם ואשתו מפני יהוה אלהים בתוך עץ הגן

⁹ט ויקרא יהוה אלהים אל האדם ויאמר לו איכה

¹⁰י ויאמר את קלך שמעתי בגן ואירא כי עירם אנכי ואחבא

¹¹יא ויאמר--מי הגיד לך כי עירם אתה המן העץ אשר צויתיך לבלתי אכל ממנו--אכלת

¹²יב ויאמר האדם האשה אשר נתתה עמדי הוא נתנה לי מן העץ ואכל

¹³יג ויאמר יהוה אלהים לאשה מה זאת עשית ותאמר האשה הנחש השיאני ואכל

¹⁴יד ויאמר יהוה אלהים אל הנחש כי עשית זאת ארור אתה מכל הבהמה ומכל חית השדה על גחנך תלך ועפר תאכל כל ימי חייך

¹⁵טו ואיבה אשית בינך ובין האשה ובין זרעך ובין זרעה הוא ישופך ראש ואתה תשופנו עקב {ס}

¹⁶טז אל האשה אמר הרבה ארבה עצבונך והרנך--בעצב תלדי בנים ואל אישך תשוקתך והוא ימשל בך {ס}

¹⁷יז ולאדם אמר כי שמעת לקול אשתך ותאכל מן העץ אשר צויתיך לאמר לא תאכל ממנו--ארורה האדמה בעבורך בעצבון תאכלנה כל ימי חייך

¹⁸יח וקוץ ודרדר תצמיח לך ואכלת את עשב השדה

¹⁹יט בזעת אפיך תאכל לחם עד שובך אל האדמה כי ממנה לקחת כי עפר אתה ואל עפר תשוב

²⁰כ ויקרא האדם שם אשתו חוה כי הוא היתה אם כל חי

²¹כא ויעש יהוה אלהים לאדם ולאשתו כתנות עור--וילבשם {פ}

²²כב ויאמר יהוה אלהים הן האדם היה כאחד ממנו לדעת טוב ורע ועתה פן ישלח ידו ולקח גם מעץ החיים ואכל וחי לעלם

²³כג וישלחהו יהוה אלהים מגן עדן--לעבד את האדמה אשר לקח משם

²⁴כד ויגרש את האדם וישכן מקדם לגן עדן את הכרבים ואת להט החרב המתהפכת לשמר את דרך עץ החיים {ס}