Read כֶּתֶר אֲרָם צוֹבָא - Tanah Aleppo Codex בראשית 30 Bible Online

בראשית 30 - כֶּתֶר אֲרָם צוֹבָא - Tanah Aleppo Codex bible

בראשית 30

¹א ותרא רחל כי לא ילדה ליעקב ותקנא רחל באחתה ותאמר אל יעקב הבה לי בנים ואם אין מתה אנכי

²ב ויחר אף יעקב ברחל ויאמר התחת אלהים אנכי אשר מנע ממך פרי בטן

³ג ותאמר הנה אמתי בלהה בא אליה ותלד על ברכי ואבנה גם אנכי ממנה

⁴ד ותתן לו את בלהה שפחתה לאשה ויבא אליה יעקב

⁵ה ותהר בלהה ותלד ליעקב בן

⁶ו ותאמר רחל דנני אלהים וגם שמע בקלי ויתן לי בן על כן קראה שמו דן

⁷ז ותהר עוד--ותלד בלהה שפחת רחל בן שני ליעקב

⁸ח ותאמר רחל נפתולי אלהים נפתלתי עם אחתי--גם יכלתי ותקרא שמו נפתלי

⁹ט ותרא לאה כי עמדה מלדת ותקח את זלפה שפחתה ותתן אתה ליעקב לאשה

¹⁰י ותלד זלפה שפחת לאה--ליעקב בן

¹¹יא ותאמר לאה בגד (בא גד) ותקרא את שמו גד

¹²יב ותלד זלפה שפחת לאה בן שני ליעקב

¹³יג ותאמר לאה--באשרי כי אשרוני בנות ותקרא את שמו אשר

¹⁴יד וילך ראובן בימי קציר חטים וימצא דודאים בשדה ויבא אתם אל לאה אמו ותאמר רחל אל לאה תני נא לי מדודאי בנך

¹⁵טו ותאמר לה המעט קחתך את אישי ולקחת גם את דודאי בני ותאמר רחל לכן ישכב עמך הלילה תחת דודאי בנך

¹⁶טז ויבא יעקב מן השדה בערב ותצא לאה לקראתו ותאמר אלי תבוא כי שכר שכרתיך בדודאי בני וישכב עמה בלילה הוא

¹⁷יז וישמע אלהים אל לאה ותהר ותלד ליעקב בן חמישי

¹⁸יח ותאמר לאה נתן אלהים שכרי אשר נתתי שפחתי לאישי ותקרא שמו יששכר

¹⁹יט ותהר עוד לאה ותלד בן ששי ליעקב

²⁰כ ותאמר לאה זבדני אלהים אתי זבד טוב--הפעם יזבלני אישי כי ילדתי לו ששה בנים ותקרא את שמו זבלון

²¹כא ואחר ילדה בת ותקרא את שמה דינה

²²כב ויזכר אלהים את רחל וישמע אליה אלהים ויפתח את רחמה

²³כג ותהר ותלד בן ותאמר אסף אלהים את חרפתי

²⁴כד ותקרא את שמו יוסף לאמר יסף יהוה לי בן אחר

²⁵כה ויהי כאשר ילדה רחל את יוסף ויאמר יעקב אל לבן שלחני ואלכה אל מקומי ולארצי

²⁶כו תנה את נשי ואת ילדי אשר עבדתי אתך בהן--ואלכה כי אתה ידעת את עבדתי אשר עבדתיך

²⁷כז ויאמר אליו לבן אם נא מצאתי חן בעיניך נחשתי ויברכני יהוה בגללך

²⁸כח ויאמר נקבה שכרך עלי ואתנה

²⁹כט ויאמר אליו--אתה ידעת את אשר עבדתיך ואת אשר היה מקנך אתי

³⁰ל כי מעט אשר היה לך לפני ויפרץ לרב ויברך יהוה אתך לרגלי ועתה מתי אעשה גם אנכי--לביתי

³¹לא ויאמר מה אתן לך ויאמר יעקב לא תתן לי מאומה--אם תעשה לי הדבר הזה אשובה ארעה צאנך אשמר

³²לב אעבר בכל צאנך היום הסר משם כל שה נקד וטלוא וכל שה חום בכשבים וטלוא ונקד בעזים והיה שכרי

³³לג וענתה בי צדקתי ביום מחר כי תבוא על שכרי לפניך כל אשר איננו נקד וטלוא בעזים וחום בכשבים--גנוב הוא אתי

³⁴לד ויאמר לבן הן לו יהי כדברך

³⁵לה ויסר ביום ההוא את התישים העקדים והטלאים ואת כל העזים הנקדות והטלאת כל אשר לבן בו וכל חום בכשבים ויתן ביד בניו

³⁶לו וישם דרך שלשת ימים בינו ובין יעקב ויעקב רעה את צאן לבן--הנותרת

³⁷לז ויקח לו יעקב מקל לבנה לח--ולוז וערמון ויפצל בהן פצלות לבנות--מחשף הלבן אשר על המקלות

³⁸לח ויצג את המקלות אשר פצל ברהטים בשקתות המים--אשר תבאן הצאן לשתות לנכח הצאן ויחמנה בבאן לשתות

³⁹לט ויחמו הצאן אל המקלות ותלדן הצאן עקדים נקדים וטלאים

⁴⁰מ והכשבים הפריד יעקב ויתן פני הצאן אל עקד וכל חום בצאן לבן וישת לו עדרים לבדו ולא שתם על צאן לבן

⁴¹מא והיה בכל יחם הצאן המקשרות ושם יעקב את המקלות לעיני הצאן ברהטים--ליחמנה במקלות

⁴²מב ובהעטיף הצאן לא ישים והיה העטפים ללבן והקשרים ליעקב

⁴³מג ויפרץ האיש מאד מאד ויהי לו צאן רבות ושפחות ועבדים וגמלים וחמרים