Read כֶּתֶר אֲרָם צוֹבָא - Tanah Aleppo Codex בראשית 31 Bible Online

בראשית 31 - כֶּתֶר אֲרָם צוֹבָא - Tanah Aleppo Codex bible

בראשית 31

¹א וישמע את דברי בני לבן לאמר לקח יעקב את כל אשר לאבינו ומאשר לאבינו--עשה את כל הכבד הזה

²ב וירא יעקב את פני לבן והנה איננו עמו כתמול שלשום

³ג ויאמר יהוה אל יעקב שוב אל ארץ אבותיך ולמולדתך ואהיה עמך

⁴ד וישלח יעקב ויקרא לרחל וללאה השדה אל צאנו

⁵ה ויאמר להן ראה אנכי את פני אביכן כי איננו אלי כתמל שלשם ואלהי אבי היה עמדי

⁶ו ואתנה ידעתן כי בכל כחי עבדתי את אביכן

⁷ז ואביכן התל בי והחלף את משכרתי עשרת מנים ולא נתנו אלהים להרע עמדי

⁸ח אם כה יאמר נקדים יהיה שכרך--וילדו כל הצאן נקדים ואם כה יאמר עקדים יהיה שכרך--וילדו כל הצאן עקדים

⁹ט ויצל אלהים את מקנה אביכם ויתן לי

¹⁰י ויהי בעת יחם הצאן ואשא עיני וארא בחלום והנה העתדים העלים על הצאן עקדים נקדים וברדים

¹¹יא ויאמר אלי מלאך האלהים בחלום--יעקב ואמר הנני

¹²יב ויאמר שא נא עיניך וראה כל העתדים העלים על הצאן עקדים נקדים וברדים כי ראיתי את כל אשר לבן עשה לך

¹³יג אנכי האל בית אל אשר משחת שם מצבה אשר נדרת לי שם נדר עתה קום צא מן הארץ הזאת ושוב אל ארץ מולדתך

¹⁴יד ותען רחל ולאה ותאמרנה לו העוד לנו חלק ונחלה בבית אבינו

¹⁵טו הלוא נכריות נחשבנו לו כי מכרנו ויאכל גם אכול את כספנו

¹⁶טז כי כל העשר אשר הציל אלהים מאבינו--לנו הוא ולבנינו ועתה כל אשר אמר אלהים אליך--עשה

¹⁷יז ויקם יעקב וישא את בניו ואת נשיו על הגמלים

¹⁸יח וינהג את כל מקנהו ואת כל רכשו אשר רכש--מקנה קנינו אשר רכש בפדן ארם לבוא אל יצחק אביו ארצה כנען

¹⁹יט ולבן הלך לגזז את צאנו ותגנב רחל את התרפים אשר לאביה

²⁰כ ויגנב יעקב את לב לבן הארמי--על בלי הגיד לו כי ברח הוא

²¹כא ויברח הוא וכל אשר לו ויקם ויעבר את הנהר וישם את פניו הר הגלעד

²²כב ויגד ללבן ביום השלישי כי ברח יעקב

²³כג ויקח את אחיו עמו וירדף אחריו דרך שבעת ימים וידבק אתו בהר הגלעד

²⁴כד ויבא אלהים אל לבן הארמי בחלם הלילה ויאמר לו השמר לך פן תדבר עם יעקב--מטוב עד רע

²⁵כה וישג לבן את יעקב ויעקב תקע את אהלו בהר ולבן תקע את אחיו בהר הגלעד

²⁶כו ויאמר לבן ליעקב מה עשית ותגנב את לבבי ותנהג את בנתי כשביות חרב

²⁷כז למה נחבאת לברח ותגנב אתי ולא הגדת לי ואשלחך בשמחה ובשרים בתף ובכנור

²⁸כח ולא נטשתני לנשק לבני ולבנתי עתה הסכלת עשו

²⁹כט יש לאל ידי לעשות עמכם רע ואלהי אביכם אמש אמר אלי לאמר השמר לך מדבר עם יעקב--מטוב עד רע

³⁰ל ועתה הלך הלכת כי נכסף נכספתה לבית אביך למה גנבת את אלהי

³¹לא ויען יעקב ויאמר ללבן כי יראתי--כי אמרתי פן תגזל את בנותיך מעמי

³²לב עם אשר תמצא את אלהיך לא יחיה--נגד אחינו הכר לך מה עמדי וקח לך ולא ידע יעקב כי רחל גנבתם

³³לג ויבא לבן באהל יעקב ובאהל לאה ובאהל שתי האמהת--ולא מצא ויצא מאהל לאה ויבא באהל רחל

³⁴לד ורחל לקחה את התרפים ותשמם בכר הגמל--ותשב עליהם וימשש לבן את כל האהל ולא מצא

³⁵לה ותאמר אל אביה אל יחר בעיני אדני כי לוא אוכל לקום מפניך כי דרך נשים לי ויחפש ולא מצא את התרפים

³⁶לו ויחר ליעקב וירב בלבן ויען יעקב ויאמר ללבן מה פשעי מה חטאתי כי דלקת אחרי

³⁷לז כי מששת את כל כלי מה מצאת מכל כלי ביתך--שים כה נגד אחי ואחיך ויוכיחו בין שנינו

³⁸לח זה עשרים שנה אנכי עמך רחליך ועזיך לא שכלו ואילי צאנך לא אכלתי

³⁹לט טרפה לא הבאתי אליך--אנכי אחטנה מידי תבקשנה גנבתי יום וגנבתי לילה

⁴⁰מ הייתי ביום אכלני חרב וקרח בלילה ותדד שנתי מעיני

⁴¹מא זה לי עשרים שנה בביתך עבדתיך ארבע עשרה שנה בשתי בנתיך ושש שנים בצאנך ותחלף את משכרתי עשרת מנים

⁴²מב לולי אלהי אבי אלהי אברהם ופחד יצחק היה לי--כי עתה ריקם שלחתני את עניי ואת יגיע כפי ראה אלהים--ויוכח אמש

⁴³מג ויען לבן ויאמר אל יעקב הבנות בנתי והבנים בני והצאן צאני וכל אשר אתה ראה לי הוא ולבנתי מה אעשה לאלה היום או לבניהן אשר ילדו

⁴⁴מד ועתה לכה נכרתה ברית--אני ואתה והיה לעד ביני ובינך

⁴⁵מה ויקח יעקב אבן וירימה מצבה

⁴⁶מו ויאמר יעקב לאחיו לקטו אבנים ויקחו אבנים ויעשו גל ויאכלו שם על הגל

⁴⁷מז ויקרא לו לבן יגר שהדותא ויעקב קרא לו גלעד

⁴⁸מח ויאמר לבן הגל הזה עד ביני ובינך היום על כן קרא שמו גלעד

⁴⁹מט והמצפה אשר אמר יצף יהוה ביני ובינך כי נסתר איש מרעהו

⁵⁰נ אם תענה את בנתי ואם תקח נשים על בנתי--אין איש עמנו ראה אלהים עד ביני ובינך

⁵¹נא ויאמר לבן ליעקב הנה הגל הזה והנה המצבה אשר יריתי ביני ובינך

⁵²נב עד הגל הזה ועדה המצבה אם אני לא אעבר אליך את הגל הזה ואם אתה לא תעבר אלי את הגל הזה ואת המצבה הזאת לרעה

⁵³נג אלהי אברהם ואלהי נחור ישפטו בינינו--אלהי אביהם וישבע יעקב בפחד אביו יצחק

⁵⁴נד ויזבח יעקב זבח בהר ויקרא לאחיו לאכל לחם ויאכלו לחם וילינו בהר