Read כֶּתֶר אֲרָם צוֹבָא - Tanah Aleppo Codex בראשית 34 Bible Online

בראשית 34 - כֶּתֶר אֲרָם צוֹבָא - Tanah Aleppo Codex bible

בראשית 34

¹א ותצא דינה בת לאה אשר ילדה ליעקב לראות בבנות הארץ

²ב וירא אתה שכם בן חמור החוי--נשיא הארץ ויקח אתה וישכב אתה ויענה

³ג ותדבק נפשו בדינה בת יעקב ויאהב את הנער וידבר על לב הנער

⁴ד ויאמר שכם אל חמור אביו לאמר קח לי את הילדה הזאת לאשה

⁵ה ויעקב שמע כי טמא את דינה בתו ובניו היו את מקנהו בשדה והחרש יעקב עד באם

⁶ו ויצא חמור אבי שכם אל יעקב לדבר אתו

⁷ז ובני יעקב באו מן השדה כשמעם ויתעצבו האנשים ויחר להם מאד כי נבלה עשה בישראל לשכב את בת יעקב וכן לא יעשה

⁸ח וידבר חמור אתם לאמר שכם בני חשקה נפשו בבתכם--תנו נא אתה לו לאשה

⁹ט והתחתנו אתנו בנתיכם תתנו לנו ואת בנתינו תקחו לכם

¹⁰י ואתנו תשבו והארץ תהיה לפניכם--שבו וסחרוה והאחזו בה

¹¹יא ויאמר שכם אל אביה ואל אחיה אמצא חן בעיניכם ואשר תאמרו אלי אתן

¹²יב הרבו עלי מאד מהר ומתן ואתנה כאשר תאמרו אלי ותנו לי את הנער לאשה

¹³יג ויענו בני יעקב את שכם ואת חמור אביו במרמה--וידברו אשר טמא את דינה אחתם

¹⁴יד ויאמרו אליהם לא נוכל לעשות הדבר הזה--לתת את אחתנו לאיש אשר לו ערלה כי חרפה הוא לנו

¹⁵טו אך בזאת נאות לכם אם תהיו כמנו להמל לכם כל זכר

¹⁶טז ונתנו את בנתינו לכם ואת בנתיכם נקח לנו וישבנו אתכם והיינו לעם אחד

¹⁷יז ואם לא תשמעו אלינו להמול--ולקחנו את בתנו והלכנו

¹⁸יח וייטבו דבריהם בעיני חמור ובעיני שכם בן חמור

¹⁹יט ולא אחר הנער לעשות הדבר כי חפץ בבת יעקב והוא נכבד מכל בית אביו

²⁰כ ויבא חמור ושכם בנו אל שער עירם וידברו אל אנשי עירם לאמר

²¹כא האנשים האלה שלמים הם אתנו וישבו בארץ ויסחרו אתה והארץ הנה רחבת ידים לפניהם את בנתם נקח לנו לנשים ואת בנתינו נתן להם

²²כב אך בזאת יאתו לנו האנשים לשבת אתנו--להיות לעם אחד בהמול לנו כל זכר כאשר הם נמלים

²³כג מקנהם וקנינם וכל בהמתם הלוא לנו הם אך נאותה להם וישבו אתנו

²⁴כד וישמעו אל חמור ואל שכם בנו כל יצאי שער עירו וימלו כל זכר--כל יצאי שער עירו

²⁵כה ויהי ביום השלישי בהיותם כאבים ויקחו שני בני יעקב שמעון ולוי אחי דינה איש חרבו ויבאו על העיר בטח ויהרגו כל זכר

²⁶כו ואת חמור ואת שכם בנו הרגו לפי חרב ויקחו את דינה מבית שכם ויצאו

²⁷כז בני יעקב באו על החללים ויבזו העיר--אשר טמאו אחותם

²⁸כח את צאנם ואת בקרם ואת חמריהם ואת אשר בעיר ואת אשר בשדה לקחו

²⁹כט ואת כל חילם ואת כל טפם ואת נשיהם שבו ויבזו ואת כל אשר בבית

³⁰ל ויאמר יעקב אל שמעון ואל לוי עכרתם אתי להבאישני בישב הארץ בכנעני ובפרזי ואני מתי מספר ונאספו עלי והכוני ונשמדתי אני וביתי

³¹לא ויאמרו הכזונה יעשה את אחותנו {פ}