Read כֶּתֶר אֲרָם צוֹבָא - Tanah Aleppo Codex בראשית 35 Bible Online

בראשית 35 - כֶּתֶר אֲרָם צוֹבָא - Tanah Aleppo Codex bible

בראשית 35

¹א ויאמר אלהים אל יעקב קום עלה בית אל ושב שם ועשה שם מזבח--לאל הנראה אליך בברחך מפני עשו אחיך

²ב ויאמר יעקב אל ביתו ואל כל אשר עמו הסרו את אלהי הנכר אשר בתככם והטהרו והחליפו שמלתיכם

³ג ונקומה ונעלה בית אל ואעשה שם מזבח לאל הענה אתי ביום צרתי ויהי עמדי בדרך אשר הלכתי

⁴ד ויתנו אל יעקב את כל אלהי הנכר אשר בידם ואת הנזמים אשר באזניהם ויטמן אתם יעקב תחת האלה אשר עם שכם

⁵ה ויסעו ויהי חתת אלהים על הערים אשר סביבותיהם ולא רדפו אחרי בני יעקב

⁶ו ויבא יעקב לוזה אשר בארץ כנען--הוא בית אל הוא וכל העם אשר עמו

⁷ז ויבן שם מזבח ויקרא למקום אל בית אל כי שם נגלו אליו האלהים בברחו מפני אחיו

⁸ח ותמת דברה מינקת רבקה ותקבר מתחת לבית אל תחת האלון ויקרא שמו אלון בכות {פ}

⁹ט וירא אלהים אל יעקב עוד בבאו מפדן ארם ויברך אתו

¹⁰י ויאמר לו אלהים שמך יעקב לא יקרא שמך עוד יעקב כי אם ישראל יהיה שמך ויקרא את שמו ישראל

¹¹יא ויאמר לו אלהים אני אל שדי פרה ורבה--גוי וקהל גוים יהיה ממך ומלכים מחלציך יצאו

¹²יב ואת הארץ אשר נתתי לאברהם וליצחק--לך אתננה ולזרעך אחריך אתן את הארץ

¹³יג ויעל מעליו אלהים במקום אשר דבר אתו

¹⁴יד ויצב יעקב מצבה במקום אשר דבר אתו--מצבת אבן ויסך עליה נסך ויצק עליה שמן

¹⁵טו ויקרא יעקב את שם המקום אשר דבר אתו שם אלהים--בית אל

¹⁶טז ויסעו מבית אל ויהי עוד כברת הארץ לבוא אפרתה ותלד רחל ותקש בלדתה

¹⁷יז ויהי בהקשתה בלדתה ותאמר לה המילדת אל תיראי כי גם זה לך בן

¹⁸יח ויהי בצאת נפשה כי מתה ותקרא שמו בן אוני ואביו קרא לו בנימין

¹⁹יט ותמת רחל ותקבר בדרך אפרתה הוא בית לחם

²⁰כ ויצב יעקב מצבה על קברתה--הוא מצבת קברת רחל עד היום

²¹כא ויסע ישראל ויט אהלה מהלאה למגדל עדר

²²כב ויהי בשכן ישראל בארץ ההוא וילך ראובן וישכב את בלהה פילגש אביו וישמע ישראל {פ} ויהיו בני יעקב שנים עשר

²³כג בני לאה בכור יעקב ראובן ושמעון ולוי ויהודה ויששכר וזבלון

²⁴כד בני רחל יוסף ובנימן

²⁵כה ובני בלהה שפחת רחל דן ונפתלי

²⁶כו ובני זלפה שפחת לאה גד ואשר אלה בני יעקב אשר ילד לו בפדן ארם

²⁷כז ויבא יעקב אל יצחק אביו ממרא קרית הארבע--הוא חברון אשר גר שם אברהם ויצחק

²⁸כח ויהיו ימי יצחק--מאת שנה ושמנים שנה

²⁹כט ויגוע יצחק וימת ויאסף אל עמיו זקן ושבע ימים ויקברו אתו עשו ויעקב בניו {פ}