Read כֶּתֶר אֲרָם צוֹבָא - Tanah Aleppo Codex בראשית 37 Bible Online

בראשית 37 - כֶּתֶר אֲרָם צוֹבָא - Tanah Aleppo Codex bible

בראשית 37

¹א וישב יעקב בארץ מגורי אביו--בארץ כנען

²ב אלה תלדות יעקב יוסף בן שבע עשרה שנה היה רעה את אחיו בצאן והוא נער את בני בלהה ואת בני זלפה נשי אביו ויבא יוסף את דבתם רעה אל אביהם

³ג וישראל אהב את יוסף מכל בניו--כי בן זקנים הוא לו ועשה לו כתנת פסים

⁴ד ויראו אחיו כי אתו אהב אביהם מכל אחיו--וישנאו אתו ולא יכלו דברו לשלם

⁵ה ויחלם יוסף חלום ויגד לאחיו ויוספו עוד שנא אתו

⁶ו ויאמר אליהם שמעו נא החלום הזה אשר חלמתי

⁷ז והנה אנחנו מאלמים אלמים בתוך השדה והנה קמה אלמתי וגם נצבה והנה תסבינה אלמתיכם ותשתחוין לאלמתי

⁸ח ויאמרו לו אחיו המלך תמלך עלינו אם משול תמשל בנו ויוספו עוד שנא אתו על חלמתיו ועל דבריו

⁹ט ויחלם עוד חלום אחר ויספר אתו לאחיו ויאמר הנה חלמתי חלום עוד והנה השמש והירח ואחד עשר כוכבים משתחוים לי

¹⁰י ויספר אל אביו ואל אחיו ויגער בו אביו ויאמר לו מה החלום הזה אשר חלמת הבוא נבוא אני ואמך ואחיך להשתחות לך ארצה

¹¹יא ויקנאו בו אחיו ואביו שמר את הדבר

¹²יב וילכו אחיו לרעות את צאן אביהם בשכם

¹³יג ויאמר ישראל אל יוסף הלוא אחיך רעים בשכם--לכה ואשלחך אליהם ויאמר לו הנני

¹⁴יד ויאמר לו לך נא ראה את שלום אחיך ואת שלום הצאן והשבני דבר וישלחהו מעמק חברון ויבא שכמה

¹⁵טו וימצאהו איש והנה תעה בשדה וישאלהו האיש לאמר מה תבקש

¹⁶טז ויאמר את אחי אנכי מבקש הגידה נא לי איפה הם רעים

¹⁷יז ויאמר האיש נסעו מזה--כי שמעתי אמרים נלכה דתינה וילך יוסף אחר אחיו וימצאם בדתן

¹⁸יח ויראו אתו מרחק ובטרם יקרב אליהם ויתנכלו אתו להמיתו

¹⁹יט ויאמרו איש אל אחיו הנה בעל החלמות הלזה--בא

²⁰כ ועתה לכו ונהרגהו ונשלכהו באחד הברות ואמרנו חיה רעה אכלתהו ונראה מה יהיו חלמתיו

²¹כא וישמע ראובן ויצלהו מידם ויאמר לא נכנו נפש

²²כב ויאמר אלהם ראובן אל תשפכו דם--השליכו אתו אל הבור הזה אשר במדבר ויד אל תשלחו בו למען הציל אתו מידם להשיבו אל אביו

²³כג ויהי כאשר בא יוסף אל אחיו ויפשיטו את יוסף את כתנתו את כתנת הפסים אשר עליו

²⁴כד ויקחהו--וישלכו אתו הברה והבור רק אין בו מים

²⁵כה וישבו לאכל לחם וישאו עיניהם ויראו והנה ארחת ישמעאלים באה מגלעד וגמליהם נשאים נכאת וצרי ולט--הולכים להוריד מצרימה

²⁶כו ויאמר יהודה אל אחיו מה בצע כי נהרג את אחינו וכסינו את דמו

²⁷כז לכו ונמכרנו לישמעאלים וידנו אל תהי בו כי אחינו בשרנו הוא וישמעו אחיו

²⁸כח ויעברו אנשים מדינים סחרים וימשכו ויעלו את יוסף מן הבור וימכרו את יוסף לישמעאלים בעשרים כסף ויביאו את יוסף מצרימה

²⁹כט וישב ראובן אל הבור והנה אין יוסף בבור ויקרע את בגדיו

³⁰ל וישב אל אחיו ויאמר הילד איננו ואני אנה אני בא

³¹לא ויקחו את כתנת יוסף וישחטו שעיר עזים ויטבלו את הכתנת בדם

³²לב וישלחו את כתנת הפסים ויביאו אל אביהם ויאמרו זאת מצאנו הכר נא הכתנת בנך הוא--אם לא

³³לג ויכירה ויאמר כתנת בני חיה רעה אכלתהו טרף טרף יוסף

³⁴לד ויקרע יעקב שמלתיו וישם שק במתניו ויתאבל על בנו ימים רבים

³⁵לה ויקמו כל בניו וכל בנתיו לנחמו וימאן להתנחם ויאמר כי ארד אל בני אבל שאלה ויבך אתו אביו

³⁶לו והמדנים--מכרו אתו אל מצרים לפוטיפר סריס פרעה שר הטבחים {פ}