Read כֶּתֶר אֲרָם צוֹבָא - Tanah Aleppo Codex בראשית 40 Bible Online

בראשית 40 - כֶּתֶר אֲרָם צוֹבָא - Tanah Aleppo Codex bible

בראשית 40

¹א ויהי אחר הדברים האלה חטאו משקה מלך מצרים והאפה--לאדניהם למלך מצרים

²ב ויקצף פרעה על שני סריסיו--על שר המשקים ועל שר האופים

³ג ויתן אתם במשמר בית שר הטבחים--אל בית הסהר מקום אשר יוסף אסור שם

⁴ד ויפקד שר הטבחים את יוסף אתם--וישרת אתם ויהיו ימים במשמר

⁵ה ויחלמו חלום שניהם איש חלמו בלילה אחד--איש כפתרון חלמו המשקה והאפה אשר למלך מצרים אשר אסורים בבית הסהר

⁶ו ויבא אליהם יוסף בבקר וירא אתם והנם זעפים

⁷ז וישאל את סריסי פרעה אשר אתו במשמר בית אדניו--לאמר מדוע פניכם רעים היום

⁸ח ויאמרו אליו--חלום חלמנו ופתר אין אתו ויאמר אלהם יוסף הלוא לאלהים פתרנים--ספרו נא לי

⁹ט ויספר שר המשקים את חלמו ליוסף ויאמר לו--בחלומי והנה גפן לפני

¹⁰י ובגפן שלשה שריגם והוא כפרחת עלתה נצה הבשילו אשכלתיה ענבים

¹¹יא וכוס פרעה בידי ואקח את הענבים ואשחט אתם אל כוס פרעה ואתן את הכוס על כף פרעה

¹²יב ויאמר לו יוסף זה פתרנו שלשת השרגים--שלשת ימים הם

¹³יג בעוד שלשת ימים ישא פרעה את ראשך והשיבך על כנך ונתת כוס פרעה בידו כמשפט הראשון אשר היית משקהו

¹⁴יד כי אם זכרתני אתך כאשר ייטב לך ועשית נא עמדי חסד והזכרתני אל פרעה והוצאתני מן הבית הזה

¹⁵טו כי גנב גנבתי מארץ העברים וגם פה לא עשיתי מאומה כי שמו אתי בבור

¹⁶טז וירא שר האפים כי טוב פתר ויאמר אל יוסף אף אני בחלומי והנה שלשה סלי חרי על ראשי

¹⁷יז ובסל העליון מכל מאכל פרעה--מעשה אפה והעוף אכל אתם מן הסל--מעל ראשי

¹⁸יח ויען יוסף ויאמר זה פתרנו שלשת הסלים--שלשת ימים הם

¹⁹יט בעוד שלשת ימים ישא פרעה את ראשך מעליך ותלה אותך על עץ ואכל העוף את בשרך מעליך

²⁰כ ויהי ביום השלישי יום הלדת את פרעה ויעש משתה לכל עבדיו וישא את ראש שר המשקים ואת ראש שר האפים--בתוך עבדיו

²¹כא וישב את שר המשקים על משקהו ויתן הכוס על כף פרעה

²²כב ואת שר האפים תלה כאשר פתר להם יוסף

²³כג ולא זכר שר המשקים את יוסף וישכחהו {פ}