Read כֶּתֶר אֲרָם צוֹבָא - Tanah Aleppo Codex בראשית 41 Bible Online

בראשית 41 - כֶּתֶר אֲרָם צוֹבָא - Tanah Aleppo Codex bible

בראשית 41

¹א ויהי מקץ שנתים ימים ופרעה חלם והנה עמד על היאר

²ב והנה מן היאר עלת שבע פרות יפות מראה ובריאת בשר ותרעינה באחו

³ג והנה שבע פרות אחרות עלות אחריהן מן היאר רעות מראה ודקות בשר ותעמדנה אצל הפרות על שפת היאר

⁴ד ותאכלנה הפרות רעות המראה ודקת הבשר את שבע הפרות יפת המראה והבריאת וייקץ פרעה

⁵ה ויישן ויחלם שנית והנה שבע שבלים עלות בקנה אחד--בריאות וטבות

⁶ו והנה שבע שבלים דקות ושדופת קדים--צמחות אחריהן

⁷ז ותבלענה השבלים הדקות את שבע השבלים הבריאות והמלאות וייקץ פרעה והנה חלום

⁸ח ויהי בבקר ותפעם רוחו וישלח ויקרא את כל חרטמי מצרים ואת כל חכמיה ויספר פרעה להם את חלמו ואין פותר אותם לפרעה

⁹ט וידבר שר המשקים את פרעה לאמר את חטאי אני מזכיר היום

¹⁰י פרעה קצף על עבדיו ויתן אתי במשמר בית שר הטבחים--אתי ואת שר האפים

¹¹יא ונחלמה חלום בלילה אחד אני והוא איש כפתרון חלמו חלמנו

¹²יב ושם אתנו נער עברי עבד לשר הטבחים ונספר לו ויפתר לנו את חלמתינו איש כחלמו פתר

¹³יג ויהי כאשר פתר לנו כן היה אתי השיב על כני ואתו תלה

¹⁴יד וישלח פרעה ויקרא את יוסף ויריצהו מן הבור ויגלח ויחלף שמלתיו ויבא אל פרעה

¹⁵טו ויאמר פרעה אל יוסף חלום חלמתי ופתר אין אתו ואני שמעתי עליך לאמר תשמע חלום לפתר אתו

¹⁶טז ויען יוסף את פרעה לאמר בלעדי אלהים יענה את שלום פרעה

¹⁷יז וידבר פרעה אל יוסף בחלמי הנני עמד על שפת היאר

¹⁸יח והנה מן היאר עלת שבע פרות בריאות בשר ויפת תאר ותרעינה באחו

¹⁹יט והנה שבע פרות אחרות עלות אחריהן דלות ורעות תאר מאד ורקות בשר לא ראיתי כהנה בכל ארץ מצרים לרע

²⁰כ ותאכלנה הפרות הרקות והרעות--את שבע הפרות הראשנות הבריאת

²¹כא ותבאנה אל קרבנה ולא נודע כי באו אל קרבנה ומראיהן רע כאשר בתחלה ואיקץ

²²כב וארא בחלמי והנה שבע שבלים עלת בקנה אחד--מלאת וטבות

²³כג והנה שבע שבלים צנמות דקות שדפות קדים--צמחות אחריהם

²⁴כד ותבלען השבלים הדקת את שבע השבלים הטבות ואמר אל החרטמים ואין מגיד לי

²⁵כה ויאמר יוסף אל פרעה חלום פרעה אחד הוא את אשר האלהים עשה הגיד לפרעה

²⁶כו שבע פרת הטבת שבע שנים הנה ושבע השבלים הטבת שבע שנים הנה חלום אחד הוא

²⁷כז ושבע הפרות הרקות והרעת העלת אחריהן שבע שנים הנה ושבע השבלים הרקות שדפות הקדים--יהיו שבע שני רעב

²⁸כח הוא הדבר אשר דברתי אל פרעה אשר האלהים עשה הראה את פרעה

²⁹כט הנה שבע שנים באות--שבע גדול בכל ארץ מצרים

³⁰ל וקמו שבע שני רעב אחריהן ונשכח כל השבע בארץ מצרים וכלה הרעב את הארץ

³¹לא ולא יודע השבע בארץ מפני הרעב ההוא אחרי כן כי כבד הוא מאד

³²לב ועל השנות החלום אל פרעה פעמים--כי נכון הדבר מעם האלהים וממהר האלהים לעשתו

³³לג ועתה ירא פרעה איש נבון וחכם וישיתהו על ארץ מצרים

³⁴לד יעשה פרעה ויפקד פקדים על הארץ וחמש את ארץ מצרים בשבע שני השבע

³⁵לה ויקבצו את כל אכל השנים הטבות הבאת האלה ויצברו בר תחת יד פרעה אכל בערים--ושמרו

³⁶לו והיה האכל לפקדון לארץ לשבע שני הרעב אשר תהיין בארץ מצרים ולא תכרת הארץ ברעב

³⁷לז וייטב הדבר בעיני פרעה ובעיני כל עבדיו

³⁸לח ויאמר פרעה אל עבדיו הנמצא כזה--איש אשר רוח אלהים בו

³⁹לט ויאמר פרעה אל יוסף אחרי הודיע אלהים אותך את כל זאת אין נבון וחכם כמוך

⁴⁰מ אתה תהיה על ביתי ועל פיך ישק כל עמי רק הכסא אגדל ממך

⁴¹מא ויאמר פרעה אל יוסף ראה נתתי אתך על כל ארץ מצרים

⁴²מב ויסר פרעה את טבעתו מעל ידו ויתן אתה על יד יוסף וילבש אתו בגדי שש וישם רבד הזהב על צוארו

⁴³מג וירכב אתו במרכבת המשנה אשר לו ויקראו לפניו אברך ונתון אתו על כל ארץ מצרים

⁴⁴מד ויאמר פרעה אל יוסף אני פרעה ובלעדיך לא ירים איש את ידו ואת רגלו--בכל ארץ מצרים

⁴⁵מה ויקרא פרעה שם יוסף צפנת פענח ויתן לו את אסנת בת פוטי פרע כהן אן לאשה ויצא יוסף על ארץ מצרים

⁴⁶מו ויוסף בן שלשים שנה בעמדו לפני פרעה מלך מצרים ויצא יוסף מלפני פרעה ויעבר בכל ארץ מצרים

⁴⁷מז ותעש הארץ בשבע שני השבע--לקמצים

⁴⁸מח ויקבץ את כל אכל שבע שנים אשר היו בארץ מצרים ויתן אכל בערים אכל שדה העיר אשר סביבתיה נתן בתוכה

⁴⁹מט ויצבר יוסף בר כחול הים הרבה מאד--עד כי חדל לספר כי אין מספר

⁵⁰נ וליוסף ילד שני בנים בטרם תבוא שנת הרעב אשר ילדה לו אסנת בת פוטי פרע כהן און

⁵¹נא ויקרא יוסף את שם הבכור מנשה כי נשני אלהים את כל עמלי ואת כל בית אבי

⁵²נב ואת שם השני קרא אפרים כי הפרני אלהים בארץ עניי

⁵³נג ותכלינה שבע שני השבע אשר היה בארץ מצרים

⁵⁴נד ותחלינה שבע שני הרעב לבוא כאשר אמר יוסף ויהי רעב בכל הארצות ובכל ארץ מצרים היה לחם

⁵⁵נה ותרעב כל ארץ מצרים ויצעק העם אל פרעה ללחם ויאמר פרעה לכל מצרים לכו אל יוסף אשר יאמר לכם תעשו

⁵⁶נו והרעב היה על כל פני הארץ ויפתח יוסף את כל אשר בהם וישבר למצרים ויחזק הרעב בארץ מצרים

⁵⁷נז וכל הארץ באו מצרימה לשבר אל יוסף כי חזק הרעב בכל הארץ