Read כֶּתֶר אֲרָם צוֹבָא - Tanah Aleppo Codex בראשית 44 Bible Online

בראשית 44 - כֶּתֶר אֲרָם צוֹבָא - Tanah Aleppo Codex bible

בראשית 44

¹א ויצו את אשר על ביתו לאמר מלא את אמתחת האנשים אכל כאשר יוכלון שאת ושים כסף איש בפי אמתחתו

²ב ואת גביעי גביע הכסף תשים בפי אמתחת הקטן ואת כסף שברו ויעש כדבר יוסף אשר דבר

³ג הבקר אור והאנשים שלחו המה וחמריהם

⁴ד הם יצאו את העיר לא הרחיקו ויוסף אמר לאשר על ביתו קום רדף אחרי האנשים והשגתם ואמרת אלהם למה שלמתם רעה תחת טובה

⁵ה הלוא זה אשר ישתה אדני בו והוא נחש ינחש בו הרעתם אשר עשיתם

⁶ו וישגם וידבר אלהם את הדברים האלה

⁷ז ויאמרו אליו--למה ידבר אדני כדברים האלה חלילה לעבדיך מעשות כדבר הזה

⁸ח הן כסף אשר מצאנו בפי אמתחתינו--השיבנו אליך מארץ כנען ואיך נגנב מבית אדניך כסף או זהב

⁹ט אשר ימצא אתו מעבדיך ומת וגם אנחנו נהיה לאדני לעבדים

¹⁰י ויאמר גם עתה כדבריכם כן הוא אשר ימצא אתו יהיה לי עבד ואתם תהיו נקים

¹¹יא וימהרו ויורדו איש את אמתחתו--ארצה ויפתחו איש אמתחתו

¹²יב ויחפש--בגדול החל ובקטן כלה וימצא הגביע באמתחת בנימן

¹³יג ויקרעו שמלתם ויעמס איש על חמרו וישבו העירה

¹⁴יד ויבא יהודה ואחיו ביתה יוסף והוא עודנו שם ויפלו לפניו ארצה

¹⁵טו ויאמר להם יוסף מה המעשה הזה אשר עשיתם הלוא ידעתם כי נחש ינחש איש אשר כמני

¹⁶טז ויאמר יהודה מה נאמר לאדני מה נדבר ומה נצטדק האלהים מצא את עון עבדיך--הננו עבדים לאדני גם אנחנו גם אשר נמצא הגביע בידו

¹⁷יז ויאמר--חלילה לי מעשות זאת האיש אשר נמצא הגביע בידו הוא יהיה לי עבד ואתם עלו לשלום אל אביכם {ס}

¹⁸יח ויגש אליו יהודה ויאמר בי אדני ידבר נא עבדך דבר באזני אדני ואל יחר אפך בעבדך כי כמוך כפרעה

¹⁹יט אדני שאל את עבדיו לאמר היש לכם אב או אח

²⁰כ ונאמר אל אדני יש לנו אב זקן וילד זקנים קטן ואחיו מת ויותר הוא לבדו לאמו ואביו אהבו

²¹כא ותאמר אל עבדיך הורדהו אלי ואשימה עיני עליו

²²כב ונאמר אל אדני לא יוכל הנער לעזב את אביו ועזב את אביו ומת

²³כג ותאמר אל עבדיך אם לא ירד אחיכם הקטן אתכם--לא תספון לראות פני

²⁴כד ויהי כי עלינו אל עבדך אבי ונגד לו--את דברי אדני

²⁵כה ויאמר אבינו שבו שברו לנו מעט אכל

²⁶כו ונאמר לא נוכל לרדת אם יש אחינו הקטן אתנו וירדנו--כי לא נוכל לראות פני האיש ואחינו הקטן איננו אתנו

²⁷כז ויאמר עבדך אבי אלינו אתם ידעתם כי שנים ילדה לי אשתי

²⁸כח ויצא האחד מאתי ואמר אך טרף טרף ולא ראיתיו עד הנה

²⁹כט ולקחתם גם את זה מעם פני וקרהו אסון--והורדתם את שיבתי ברעה שאלה

³⁰ל ועתה כבאי אל עבדך אבי והנער איננו אתנו ונפשו קשורה בנפשו

³¹לא והיה כראותו כי אין הנער--ומת והורידו עבדיך את שיבת עבדך אבינו ביגון--שאלה

³²לב כי עבדך ערב את הנער מעם אבי לאמר אם לא אביאנו אליך וחטאתי לאבי כל הימים

³³לג ועתה ישב נא עבדך תחת הנער--עבד לאדני והנער יעל עם אחיו

³⁴לד כי איך אעלה אל אבי והנער איננו אתי פן אראה ברע אשר ימצא את אבי