Read כֶּתֶר אֲרָם צוֹבָא - Tanah Aleppo Codex בראשית 46 Bible Online

בראשית 46 - כֶּתֶר אֲרָם צוֹבָא - Tanah Aleppo Codex bible

בראשית 46

¹א ויסע ישראל וכל אשר לו ויבא בארה שבע ויזבח זבחים לאלהי אביו יצחק

²ב ויאמר אלהים לישראל במראת הלילה ויאמר יעקב יעקב ויאמר הנני

³ג ויאמר אנכי האל אלהי אביך אל תירא מרדה מצרימה כי לגוי גדול אשימך שם

⁴ד אנכי ארד עמך מצרימה ואנכי אעלך גם עלה ויוסף ישית ידו על עיניך

⁵ה ויקם יעקב מבאר שבע וישאו בני ישראל את יעקב אביהם ואת טפם ואת נשיהם בעגלות אשר שלח פרעה לשאת אתו

⁶ו ויקחו את מקניהם ואת רכושם אשר רכשו בארץ כנען ויבאו מצרימה יעקב וכל זרעו אתו

⁷ז בניו ובני בניו אתו בנתיו ובנות בניו וכל זרעו--הביא אתו מצרימה {ס}

⁸ח ואלה שמות בני ישראל הבאים מצרימה יעקב ובניו בכר יעקב ראובן

⁹ט ובני ראובן--חנוך ופלוא וחצרן וכרמי

¹⁰י ובני שמעון ימואל וימין ואהד--ויכין וצחר ושאול בן הכנענית

¹¹יא ובני לוי--גרשון קהת ומררי

¹²יב ובני יהודה ער ואונן ושלה--ופרץ וזרח וימת ער ואונן בארץ כנען ויהיו בני פרץ חצרן וחמול

¹³יג ובני יששכר--תולע ופוה ויוב ושמרן

¹⁴יד ובני זבלון--סרד ואלון ויחלאל

¹⁵טו אלה בני לאה אשר ילדה ליעקב בפדן ארם ואת דינה בתו כל נפש בניו ובנותיו שלשים ושלש

¹⁶טז ובני גד צפיון וחגי שוני ואצבן ערי וארודי ואראלי

¹⁷יז ובני אשר ימנה וישוה וישוי ובריעה--ושרח אחתם ובני בריעה חבר ומלכיאל

¹⁸יח אלה בני זלפה אשר נתן לבן ללאה בתו ותלד את אלה ליעקב שש עשרה נפש

¹⁹יט בני רחל אשת יעקב יוסף ובנימן

²⁰כ ויולד ליוסף בארץ מצרים אשר ילדה לו אסנת בת פוטי פרע כהן אן--את מנשה ואת אפרים

²¹כא ובני בנימן בלע ובכר ואשבל גרא ונעמן אחי וראש מפים וחפים וארד

²²כב אלה בני רחל אשר ילד ליעקב--כל נפש ארבעה עשר

²³כג ובני דן חשים

²⁴כד ובני נפתלי--יחצאל וגוני ויצר ושלם

²⁵כה אלה בני בלהה אשר נתן לבן לרחל בתו ותלד את אלה ליעקב כל נפש שבעה

²⁶כו כל הנפש הבאה ליעקב מצרימה יצאי ירכו מלבד נשי בני יעקב--כל נפש ששים ושש

²⁷כז ובני יוסף אשר ילד לו במצרים נפש שנים כל הנפש לבית יעקב הבאה מצרימה שבעים {ס}

²⁸כח ואת יהודה שלח לפניו אל יוסף להורת לפניו גשנה ויבאו ארצה גשן

²⁹כט ויאסר יוסף מרכבתו ויעל לקראת ישראל אביו גשנה וירא אליו ויפל על צואריו ויבך על צואריו עוד

³⁰ל ויאמר ישראל אל יוסף אמותה הפעם אחרי ראותי את פניך כי עודך חי

³¹לא ויאמר יוסף אל אחיו ואל בית אביו אעלה ואגידה לפרעה ואמרה אליו אחי ובית אבי אשר בארץ כנען באו אלי

³²לב והאנשים רעי צאן כי אנשי מקנה היו וצאנם ובקרם וכל אשר להם הביאו

³³לג והיה כי יקרא לכם פרעה ואמר מה מעשיכם

³⁴לד ואמרתם אנשי מקנה היו עבדיך מנעורינו ועד עתה--גם אנחנו גם אבתינו בעבור תשבו בארץ גשן כי תועבת מצרים כל רעה צאן