Read כֶּתֶר אֲרָם צוֹבָא - Tanah Aleppo Codex בראשית 49 Bible Online

בראשית 49 - כֶּתֶר אֲרָם צוֹבָא - Tanah Aleppo Codex bible

בראשית 49

¹א ויקרא יעקב אל בניו ויאמר האספו ואגידה לכם את אשר יקרא אתכם באחרית הימים

²ב הקבצו ושמעו בני יעקב ושמעו אל ישראל אביכם

³ג ראובן בכרי אתה כחי וראשית אוני--יתר שאת ויתר עז

⁴ד פחז כמים אל תותר כי עלית משכבי אביך אז חללת יצועי עלה {פ}

⁵ה שמעון ולוי אחים--כלי חמס מכרתיהם

⁶ו בסדם אל תבא נפשי בקהלם אל תחד כבדי כי באפם הרגו איש וברצנם עקרו שור

⁷ז ארור אפם כי עז ועברתם כי קשתה אחלקם ביעקב ואפיצם בישראל {פ}

⁸ח יהודה אתה יודוך אחיך--ידך בערף איביך ישתחוו לך בני אביך

⁹ט גור אריה יהודה מטרף בני עלית כרע רבץ כאריה וכלביא מי יקימנו

¹⁰י לא יסור שבט מיהודה ומחקק מבין רגליו עד כי יבא שילה ולו יקהת עמים

¹¹יא אסרי לגפן עירה ולשרקה בני אתנו כבס ביין לבשו ובדם ענבים סותה

¹²יב חכלילי עינים מיין ולבן שנים מחלב {פ}

¹³יג זבולן לחוף ימים ישכן והוא לחוף אנית וירכתו על צידן {פ}

¹⁴יד יששכר חמר גרם--רבץ בין המשפתים

¹⁵טו וירא מנחה כי טוב ואת הארץ כי נעמה ויט שכמו לסבל ויהי למס עבד {ס}

¹⁶טז דן ידין עמו--כאחד שבטי ישראל

¹⁷יז יהי דן נחש עלי דרך שפיפן עלי ארח--הנשך עקבי סוס ויפל רכבו אחור

¹⁸יח לישועתך קויתי יהוה {ס}

¹⁹יט גד גדוד יגודנו והוא יגד עקב {ס}

²⁰כ מאשר שמנה לחמו והוא יתן מעדני מלך {ס}

²¹כא נפתלי אילה שלחה--הנתן אמרי שפר {ס}

²²כב בן פרת יוסף בן פרת עלי עין בנות צעדה עלי שור

²³כג וימררהו ורבו וישטמהו בעלי חצים

²⁴כד ותשב באיתן קשתו ויפזו זרעי ידיו מידי אביר יעקב משם רעה אבן ישראל

²⁵כה מאל אביך ויעזרך ואת שדי ויברכך ברכת שמים מעל ברכת תהום רבצת תחת ברכת שדים ורחם

²⁶כו ברכת אביך גברו על ברכת הורי עד תאות גבעת עולם תהיין לראש יוסף ולקדקד נזיר אחיו {פ}

²⁷כז בנימין זאב יטרף בבקר יאכל עד ולערב יחלק שלל

²⁸כח כל אלה שבטי ישראל שנים עשר וזאת אשר דבר להם אביהם ויברך אותם--איש אשר כברכתו ברך אתם

²⁹כט ויצו אותם ויאמר אלהם אני נאסף אל עמי--קברו אתי אל אבתי אל המערה--אשר בשדה עפרון החתי

³⁰ל במערה אשר בשדה המכפלה אשר על פני ממרא--בארץ כנען אשר קנה אברהם את השדה מאת עפרן החתי--לאחזת קבר

³¹לא שמה קברו את אברהם ואת שרה אשתו שמה קברו את יצחק ואת רבקה אשתו ושמה קברתי את לאה

³²לב מקנה השדה והמערה אשר בו מאת בני חת

³³לג ויכל יעקב לצות את בניו ויאסף רגליו אל המטה ויגוע ויאסף אל עמיו