Read כֶּתֶר אֲרָם צוֹבָא - Tanah Aleppo Codex בראשית 6 Bible Online

בראשית 6 - כֶּתֶר אֲרָם צוֹבָא - Tanah Aleppo Codex bible

בראשית 6

¹א ויהי כי החל האדם לרב על פני האדמה ובנות ילדו להם

²ב ויראו בני האלהים את בנות האדם כי טבת הנה ויקחו להם נשים מכל אשר בחרו

³ג ויאמר יהוה לא ידון רוחי באדם לעלם בשגם הוא בשר והיו ימיו מאה ועשרים שנה

⁴ד הנפלים היו בארץ בימים ההם וגם אחרי כן אשר יבאו בני האלהים אל בנות האדם וילדו להם המה הגברים אשר מעולם אנשי השם {פ}

⁵ה וירא יהוה כי רבה רעת האדם בארץ וכל יצר מחשבת לבו רק רע כל היום

⁶ו וינחם יהוה כי עשה את האדם בארץ ויתעצב אל לבו

⁷ז ויאמר יהוה אמחה את האדם אשר בראתי מעל פני האדמה מאדם עד בהמה עד רמש ועד עוף השמים כי נחמתי כי עשיתם

⁸ח ונח מצא חן בעיני יהוה {פ}

⁹ט אלה תולדת נח--נח איש צדיק תמים היה בדרתיו את האלהים התהלך נח

¹⁰י ויולד נח שלשה בנים--את שם את חם ואת יפת

¹¹יא ותשחת הארץ לפני האלהים ותמלא הארץ חמס

¹²יב וירא אלהים את הארץ והנה נשחתה כי השחית כל בשר את דרכו על הארץ {ס}

¹³יג ויאמר אלהים לנח קץ כל בשר בא לפני--כי מלאה הארץ חמס מפניהם והנני משחיתם את הארץ

¹⁴יד עשה לך תבת עצי גפר קנים תעשה את התבה וכפרת אתה מבית ומחוץ בכפר

¹⁵טו וזה אשר תעשה אתה שלש מאות אמה ארך התבה חמשים אמה רחבה ושלשים אמה קומתה

¹⁶טז צהר תעשה לתבה ואל אמה תכלנה מלמעלה ופתח התבה בצדה תשים תחתים שנים ושלשים תעשה

¹⁷יז ואני הנני מביא את המבול מים על הארץ לשחת כל בשר אשר בו רוח חיים מתחת השמים כל אשר בארץ יגוע

¹⁸יח והקמתי את בריתי אתך ובאת אל התבה--אתה ובניך ואשתך ונשי בניך אתך

¹⁹יט ומכל החי מכל בשר שנים מכל תביא אל התבה--להחית אתך זכר ונקבה יהיו

²⁰כ מהעוף למינהו ומן הבהמה למינה מכל רמש האדמה למינהו--שנים מכל יבאו אליך להחיות

²¹כא ואתה קח לך מכל מאכל אשר יאכל ואספת אליך והיה לך ולהם לאכלה

²²כב ויעש נח ככל אשר צוה אתו אלהים--כן עשה