Read כֶּתֶר אֲרָם צוֹבָא - Tanah Aleppo Codex בראשית 8 Bible Online

בראשית 8 - כֶּתֶר אֲרָם צוֹבָא - Tanah Aleppo Codex bible

בראשית 8

¹א ויזכר אלהים את נח ואת כל החיה ואת כל הבהמה אשר אתו בתבה ויעבר אלהים רוח על הארץ וישכו המים

²ב ויסכרו מעינת תהום וארבת השמים ויכלא הגשם מן השמים

³ג וישבו המים מעל הארץ הלוך ושוב ויחסרו המים--מקצה חמשים ומאת יום

⁴ד ותנח התבה בחדש השביעי בשבעה עשר יום לחדש על הרי אררט

⁵ה והמים היו הלוך וחסור עד החדש העשירי בעשירי באחד לחדש נראו ראשי ההרים

⁶ו ויהי מקץ ארבעים יום ויפתח נח את חלון התבה אשר עשה

⁷ז וישלח את הערב ויצא יצוא ושוב עד יבשת המים מעל הארץ

⁸ח וישלח את היונה מאתו--לראות הקלו המים מעל פני האדמה

⁹ט ולא מצאה היונה מנוח לכף רגלה ותשב אליו אל התבה--כי מים על פני כל הארץ וישלח ידו ויקחה ויבא אתה אליו אל התבה

¹⁰י ויחל עוד שבעת ימים אחרים ויסף שלח את היונה מן התבה

¹¹יא ותבא אליו היונה לעת ערב והנה עלה זית טרף בפיה וידע נח כי קלו המים מעל הארץ

¹²יב וייחל עוד שבעת ימים אחרים וישלח את היונה ולא יספה שוב אליו עוד

¹³יג ויהי באחת ושש מאות שנה בראשון באחד לחדש חרבו המים מעל הארץ ויסר נח את מכסה התבה וירא והנה חרבו פני האדמה

¹⁴יד ובחדש השני בשבעה ועשרים יום לחדש--יבשה הארץ {ס}

¹⁵טו וידבר אלהים אל נח לאמר

¹⁶טז צא מן התבה--אתה ואשתך ובניך ונשי בניך אתך

¹⁷יז כל החיה אשר אתך מכל בשר בעוף ובבהמה ובכל הרמש הרמש על הארץ--הוצא (היצא) אתך ושרצו בארץ ופרו ורבו על הארץ

¹⁸יח ויצא נח ובניו ואשתו ונשי בניו אתו

¹⁹יט כל החיה כל הרמש וכל העוף כל רומש על הארץ--למשפחתיהם יצאו מן התבה

²⁰כ ויבן נח מזבח ליהוה ויקח מכל הבהמה הטהרה ומכל העוף הטהור ויעל עלת במזבח

²¹כא וירח יהוה את ריח הניחח ויאמר יהוה אל לבו לא אסף לקלל עוד את האדמה בעבור האדם כי יצר לב האדם רע מנעריו ולא אסף עוד להכות את כל חי כאשר עשיתי

²²כב עד כל ימי הארץ זרע וקציר וקר וחם וקיץ וחרף ויום ולילה--לא ישבתו