Read כֶּתֶר אֲרָם צוֹבָא - Tanah Aleppo Codex בראשית 9 Bible Online

בראשית 9 - כֶּתֶר אֲרָם צוֹבָא - Tanah Aleppo Codex bible

בראשית 9

¹א ויברך אלהים את נח ואת בניו ויאמר להם פרו ורבו ומלאו את הארץ

²ב ומוראכם וחתכם יהיה על כל חית הארץ ועל כל עוף השמים בכל אשר תרמש האדמה ובכל דגי הים בידכם נתנו

³ג כל רמש אשר הוא חי לכם יהיה לאכלה כירק עשב נתתי לכם את כל

⁴ד אך בשר בנפשו דמו לא תאכלו

⁵ה ואך את דמכם לנפשתיכם אדרש מיד כל חיה אדרשנו ומיד האדם מיד איש אחיו--אדרש את נפש האדם

⁶ו שפך דם האדם באדם דמו ישפך כי בצלם אלהים עשה את האדם

⁷ז ואתם פרו ורבו שרצו בארץ ורבו בה {ס}

⁸ח ויאמר אלהים אל נח ואל בניו אתו לאמר

⁹ט ואני הנני מקים את בריתי אתכם ואת זרעכם אחריכם

¹⁰י ואת כל נפש החיה אשר אתכם בעוף בבהמה ובכל חית הארץ אתכם מכל יצאי התבה לכל חית הארץ

¹¹יא והקמתי את בריתי אתכם ולא יכרת כל בשר עוד ממי המבול ולא יהיה עוד מבול לשחת הארץ

¹²יב ויאמר אלהים זאת אות הברית אשר אני נתן ביני וביניכם ובין כל נפש חיה אשר אתכם--לדרת עולם

¹³יג את קשתי נתתי בענן והיתה לאות ברית ביני ובין הארץ

¹⁴יד והיה בענני ענן על הארץ ונראתה הקשת בענן

¹⁵טו וזכרתי את בריתי אשר ביני וביניכם ובין כל נפש חיה בכל בשר ולא יהיה עוד המים למבול לשחת כל בשר

¹⁶טז והיתה הקשת בענן וראיתיה לזכר ברית עולם בין אלהים ובין כל נפש חיה בכל בשר אשר על הארץ

¹⁷יז ויאמר אלהים אל נח זאת אות הברית אשר הקמתי ביני ובין כל בשר אשר על הארץ {פ}

¹⁸יח ויהיו בני נח היצאים מן התבה--שם וחם ויפת וחם הוא אבי כנען

¹⁹יט שלשה אלה בני נח ומאלה נפצה כל הארץ

²⁰כ ויחל נח איש האדמה ויטע כרם

²¹כא וישת מן היין וישכר ויתגל בתוך אהלה

²²כב וירא חם אבי כנען את ערות אביו ויגד לשני אחיו בחוץ

²³כג ויקח שם ויפת את השמלה וישימו על שכם שניהם וילכו אחרנית ויכסו את ערות אביהם ופניהם אחרנית וערות אביהם לא ראו

²⁴כד וייקץ נח מיינו וידע את אשר עשה לו בנו הקטן

²⁵כה ויאמר ארור כנען עבד עבדים יהיה לאחיו

²⁶כו ויאמר ברוך יהוה אלהי שם ויהי כנען עבד למו

²⁷כז יפת אלהים ליפת וישכן באהלי שם ויהי כנען עבד למו

²⁸כח ויחי נח אחר המבול שלש מאות שנה וחמשים שנה

²⁹כט ויהיו כל ימי נח תשע מאות שנה וחמשים שנה וימת {פ}