Read כֶּתֶר אֲרָם צוֹבָא - Tanah Aleppo Codex שמואל ב 1 Bible Online

שמואל ב 1 - כֶּתֶר אֲרָם צוֹבָא - Tanah Aleppo Codex bible

שמואל ב 1

¹א ויהי אחרי מות שאול ודוד שב מהכות את העמלק וישב דוד בצקלג ימים שנים

²ב ויהי ביום השלישי והנה איש בא מן המחנה מעם שאול ובגדיו קרעים ואדמה על ראשו ויהי בבאו אל דוד ויפל ארצה וישתחו

³ג ויאמר לו דוד אי מזה תבוא ויאמר אליו ממחנה ישראל נמלטתי

⁴ד ויאמר אליו דוד מה היה הדבר הגד נא לי ויאמר אשר נס העם מן המלחמה וגם הרבה נפל מן העם וימתו וגם שאול ויהונתן בנו מתו

⁵ה ויאמר דוד אל הנער המגיד לו איך ידעת כי מת שאול ויהונתן בנו

⁶ו ויאמר הנער המגיד לו נקרא נקריתי בהר הגלבע והנה שאול נשען על חניתו והנה הרכב ובעלי הפרשים הדבקהו

⁷ז ויפן אחריו ויראני ויקרא אלי ואמר הנני

⁸ח ויאמר לי מי אתה ויאמר (ואמר) אליו עמלקי אנכי

⁹ט ויאמר אלי עמד נא עלי ומתתני--כי אחזני השבץ כי כל עוד נפשי בי

¹⁰י ואעמד עליו ואמתתהו--כי ידעתי כי לא יחיה אחרי נפלו ואקח הנזר אשר על ראשו ואצעדה אשר על זרעו ואביאם אל אדני הנה

¹¹יא ויחזק דוד בבגדו ויקרעם וגם כל האנשים אשר אתו

¹²יב ויספדו ויבכו ויצמו עד הערב על שאול ועל יהונתן בנו ועל עם יהוה ועל בית ישראל--כי נפלו בחרב {פ}

¹³יג ויאמר דוד אל הנער המגיד לו אי מזה אתה ויאמר בן איש גר עמלקי אנכי

¹⁴יד ויאמר אליו דוד איך לא יראת לשלח ידך לשחת את משיח יהוה

¹⁵טו ויקרא דוד לאחד מהנערים ויאמר גש פגע בו ויכהו וימת

¹⁶טז ויאמר אליו דוד דמיך (דמך) על ראשך כי פיך ענה בך לאמר אנכי מתתי את משיח יהוה {פ}

¹⁷יז ויקנן דוד את הקינה הזאת על שאול ועל יהונתן בנו

¹⁸יח ויאמר ללמד בני יהודה קשת הנה כתובה על ספר הישר

¹⁹יט הצבי ישראל על במותיך חלל איך נפלו גבורים

²⁰כ אל תגידו בגת אל תבשרו בחוצת אשקלון פן תשמחנה בנות פלשתים פן תעלזנה בנות הערלים

²¹כא הרי בגלבע אל טל ואל מטר עליכם--ושדי תרומת כי שם נגעל מגן גבורים--מגן שאול בלי משיח בשמן

²²כב מדם חללים מחלב גבורים--קשת יהונתן לא נשוג אחור וחרב שאול לא תשוב ריקם

²³כג שאול ויהונתן הנאהבים והנעימם בחייהם ובמותם לא נפרדו מנשרים קלו מאריות גברו

²⁴כד בנות ישראל--אל שאול בכינה המלבשכם שני עם עדנים המעלה עדי זהב על לבושכן

²⁵כה איך נפלו גברים בתוך המלחמה--יהונתן על במותיך חלל

²⁶כו צר לי עליך אחי יהונתן--נעמת לי מאד נפלאתה אהבתך לי מאהבת נשים

²⁷כז איך נפלו גבורים ויאבדו כלי מלחמה {פ}