Read כֶּתֶר אֲרָם צוֹבָא - Tanah Aleppo Codex שמואל ב 22 Bible Online

שמואל ב 22 - כֶּתֶר אֲרָם צוֹבָא - Tanah Aleppo Codex bible

שמואל ב 22

¹א וידבר דוד ליהוה את דברי השירה הזאת {ס} ביום הציל יהוה אתו {ר} מכף כל איביו ומכף שאול {ס}

²ב ויאמר יהוה סלעי ומצדתי {ר} ומפלטי לי

³ג אלהי צורי אחסה בו {ס} מגני וקרן ישעי {ר} משגבי ומנוסי {ס} משעי מחמס תשעני {ר}

⁴ד מהלל אקרא יהוה {ס} ומאיבי אושע {ר}

⁵ה כי אפפני משברי מות {ס} נחלי בליעל יבעתני {ר}

⁶ו חבלי שאול סבני {ס} קדמני מקשי מות {ר}

⁷ז בצר לי אקרא יהוה ואל אלהי אקרא {ס} וישמע מהיכלו קולי ושועתי באזניו {ר}

⁸ח ותגעש (ויתגעש) ותרעש הארץ {ס} מוסדות השמים ירגזו ויתגעשו כי חרה לו {ר}

⁹ט עלה עשן באפו ואש מפיו תאכל {ס} גחלים בערו ממנו {ר}

¹⁰י ויט שמים וירד {ס} וערפל תחת רגליו {ר}

¹¹יא וירכב על כרוב ויעף {ס} וירא על כנפי רוח {ר}

¹²יב וישת חשך סביבתיו סכות {ס} חשרת מים עבי שחקים {ר}

¹³יג מנגה נגדו בערו גחלי אש {ס}

¹⁴יד ירעם מן שמים יהוה {ר} ועליון יתן קולו {ס}

¹⁵טו וישלח חצים ויפיצם ברק ויהמם (ויהם) {ר}

¹⁶טז ויראו אפקי ים יגלו מסדות תבל {ס} בגערת יהוה מנשמת רוח אפו {ר}

¹⁷יז ישלח ממרום יקחני {ס} ימשני ממים רבים {ר}

¹⁸יח יצילני מאיבי עז {ס} משנאי כי אמצו ממני {ר}

¹⁹יט יקדמני ביום אידי ויהי יהוה משען לי {ס}

²⁰כ ויצא למרחב אתי {ר} יחלצני כי חפץ בי {ס}

²¹כא יגמלני יהוה כצדקתי {ר} כבר ידי ישיב לי {ס}

²²כב כי שמרתי דרכי יהוה {ר} ולא רשעתי מאלהי {ס}

²³כג כי כל משפטו לנגדי וחקתיו לא אסור ממנה {ר}

²⁴כד ואהיה תמים לו {ס} ואשתמרה מעוני {ר}

²⁵כה וישב יהוה לי כצדקתי {ס} כברי לנגד עיניו {ר}

²⁶כו עם חסיד תתחסד {ס} עם גבור תמים תתמם {ר}

²⁷כז עם נבר תתבר {ס} ועם עקש תתפל {ר}

²⁸כח ואת עם עני תושיע {ס} ועיניך על רמים תשפיל {ר}

²⁹כט כי אתה נירי יהוה {ס} ויהוה יגיה חשכי {ר}

³⁰ל כי בכה ארוץ גדוד {ס} באלהי אדלג שור {ר}

³¹לא האל תמים דרכו אמרת יהוה צרופה-- {ס} מגן הוא לכל החסים בו {ר}

³²לב כי מי אל מבלעדי יהוה {ס} ומי צור מבלעדי אלהינו {ר}

³³לג האל מעוזי חיל {ס} ויתר תמים דרכו (דרכי) {ר}

³⁴לד משוה רגליו (רגלי) כאילות {ס} ועל במתי יעמדני {ר}

³⁵לה מלמד ידי למלחמה {ס} ונחת קשת נחושה זרעתי {ר}

³⁶לו ותתן לי מגן ישעך וענתך תרבני {ס}

³⁷לז תרחיב צעדי תחתני ולא מעדו קרסלי {ר}

³⁸לח ארדפה איבי ואשמידם {ס} ולא אשוב עד כלותם {ר}

³⁹לט ואכלם ואמחצם ולא יקומון {ס} ויפלו תחת רגלי {ר}

⁴⁰מ ותזרני חיל למלחמה {ס} תכריע קמי תחתני {ר}

⁴¹מא ואיבי תתה לי ערף משנאי ואצמיתם {ס}

⁴²מב ישעו ואין משיע אל יהוה ולא ענם {ר}

⁴³מג ואשחקם כעפר ארץ {ס} כטיט חוצות אדקם ארקעם {ר}

⁴⁴מד ותפלטני מריבי עמי תשמרני לראש גוים {ס} עם לא ידעתי יעבדני {ר}

⁴⁵מה בני נכר יתכחשו לי לשמוע אזן ישמעו לי {ס}

⁴⁶מו בני נכר יבלו ויחגרו ממסגרותם {ר}

⁴⁷מז חי יהוה וברוך צורי {ס} וירם אלהי צור ישעי {ר}

⁴⁸מח האל הנתן נקמת לי {ס} ומריד עמים תחתני {ר}

⁴⁹מט ומוציאי מאיבי ומקמי תרוממני {ס} מאיש חמסים תצילני {ר}

⁵⁰נ על כן אודך יהוה בגוים {ס} ולשמך אזמר {ר}

⁵¹נא מגדיל (מגדול) ישועות מלכו ועשה חסד למשיחו {ס} לדוד ולזרעו עד עולם {ר} {ש}