Read כֶּתֶר אֲרָם צוֹבָא - Tanah Aleppo Codex שמואל ב 23 Bible Online

שמואל ב 23 - כֶּתֶר אֲרָם צוֹבָא - Tanah Aleppo Codex bible

שמואל ב 23

¹א ואלה דברי דוד האחרנים נאם דוד בן ישי ונאם הגבר הקם על--משיח אלהי יעקב ונעים זמרות ישראל

²ב רוח יהוה דבר בי ומלתו על לשוני

³ג אמר אלהי ישראל לי דבר צור ישראל מושל באדם--צדיק מושל יראת אלהים

⁴ד וכאור בקר יזרח שמש בקר לא עבות מנגה ממטר דשא מארץ

⁵ה כי לא כן ביתי עם אל כי ברית עולם שם לי ערוכה בכל ושמרה--כי כל ישעי וכל חפץ כי לא יצמיח

⁶ו ובליעל כקוץ מנד כלהם כי לא ביד יקחו

⁷ז ואיש יגע בהם ימלא ברזל ועץ חנית ובאש שרוף ישרפו בשבת {פ}

⁸ח אלה שמות הגברים אשר לדוד ישב בשבת תחכמני ראש השלשי הוא עדינו העצנו (העצני)--על שמנה מאות חלל בפעם אחד (אחת) {ס}

⁹ט ואחרו אלעזר בן דדי (דדו) בן אחחי בשלשה גברים (הגברים) עם דוד בחרפם בפלשתים נאספו שם למלחמה ויעלו איש ישראל

¹⁰י הוא קם ויך בפלשתים עד כי יגעה ידו ותדבק ידו אל החרב ויעש יהוה תשועה גדולה ביום ההוא והעם ישבו אחריו אך לפשט {ס}

¹¹יא ואחריו שמה בן אגא הררי ויאספו פלשתים לחיה ותהי שם חלקת השדה מלאה עדשים והעם נס מפני פלשתים

¹²יב ויתיצב בתוך החלקה ויצילה ויך את פלשתים ויעש יהוה תשועה גדולה {ס}

¹³יג וירדו שלשים (שלשה) מהשלשים ראש ויבאו אל קציר אל דוד--אל מערת עדלם וחית פלשתים חנה בעמק רפאים

¹⁴יד ודוד אז במצודה ומצב פלשתים אז בית לחם

¹⁵טו ויתאוה דוד ויאמר מי ישקני מים מבאר בית לחם אשר בשער {ס}

¹⁶טז ויבקעו שלשת הגברים במחנה פלשתים וישאבו מים מבאר בית לחם אשר בשער וישאו ויבאו אל דוד ולא אבה לשתותם ויסך אתם ליהוה

¹⁷יז ויאמר חלילה לי יהוה מעשתי זאת הדם האנשים ההלכים בנפשותם ולא אבה לשתותם אלה עשו שלשת הגברים {ס}

¹⁸יח ואבישי אחי יואב בן צרויה הוא ראש השלשי (השלשה) והוא עורר את חניתו על שלש מאות חלל ולו שם בשלשה

¹⁹יט מן השלשה הכי נכבד ויהי להם לשר ועד השלשה לא בא {ס}

²⁰כ ובניהו בן יהוידע בן איש חי (חיל) רב פעלים מקבצאל הוא הכה את שני אראל מואב והוא ירד והכה את האריה (הארי) בתוך הבאר ביום השלג

²¹כא והוא הכה את איש מצרי אשר (איש) מראה וביד המצרי חנית וירד אליו בשבט ויגזל את החנית מיד המצרי ויהרגהו בחניתו

²²כב אלה עשה בניהו בן יהוידע ולו שם בשלשה הגברים

²³כג מן השלשים נכבד ואל השלשה לא בא וישמהו דוד {ר} אל משמעתו {ס}

²⁴כד עשהאל אחי יואב בשלשים אלחנן בן דדו {ר} בית לחם {ס}

²⁵כה שמה החרדי {ס} אליקא {ר} החרדי {ס}

²⁶כו חלץ הפלטי {ס} עירא {ר} בן עקש {ס} התקועי {ס}

²⁷כז אביעזר {ר} הענתתי {ס} מבני החשתי {ס}

²⁸כח צלמון {ר} האחחי {ס} מהרי הנטפתי {ס}

²⁹כט חלב בן בענה {ר} הנטפתי {ס} אתי בן ריבי מגבעת בני בנימן {ס}

³⁰ל בניהו {ר} פרעתני {ס} הדי מנחלי געש {ס}

³¹לא אבי עלבון {ר} הערבתי {ס} עזמות הברחמי {ס}

³²לב אליחבא {ר} השעלבני {ס} בני ישן יהונתן {ס}

³³לג שמה {ר} ההררי {ס} אחיאם בן שרר האררי {ס}

³⁴לד אליפלט {ר} בן אחסבי בן המעכתי {ס} אליעם בן אחיתפל {ר} הגלני {ס}

³⁵לה חצרו (חצרי) הכרמלי {ס} פערי {ר} הארבי {ס}

³⁶לו יגאל בן נתן מצבה {ס} בני {ר} הגדי {ס}

³⁷לז צלק העמני {ס} נחרי {ר} הבארתי--נשאי (נשא) כלי יואב בן צריה {ס}

³⁸לח עירא {ר} היתרי {ס} גרב היתרי {ס}

³⁹לט אוריה {ר} החתי--כל שלשים ושבעה {פ}