Read כֶּתֶר אֲרָם צוֹבָא - Tanah Aleppo Codex דברי הימים א 11 Bible Online

דברי הימים א 11 - כֶּתֶר אֲרָם צוֹבָא - Tanah Aleppo Codex bible

דברי הימים א 11

¹א ויקבצו כל ישראל אל דויד חברונה לאמר הנה עצמך ובשרך אנחנו

²ב גם תמול גם שלשום גם בהיות שאול מלך--אתה המוציא והמביא את ישראל ויאמר יהוה אלהיך לך אתה תרעה את עמי את ישראל ואתה תהיה נגיד על עמי ישראל

³ג ויבאו כל זקני ישראל אל המלך חברונה ויכרת להם דויד ברית בחברון לפני יהוה וימשחו את דויד למלך על ישראל כדבר יהוה ביד שמואל {ס}

⁴ד וילך דויד וכל ישראל ירושלם היא יבוס ושם היבוסי ישבי הארץ

⁵ה ויאמרו ישבי יבוס לדויד לא תבוא הנה וילכד דויד את מצדת ציון היא עיר דויד

⁶ו ויאמר דויד--כל מכה יבוסי בראשונה יהיה לראש ולשר ויעל בראשונה יואב בן צרויה ויהי לראש

⁷ז וישב דויד במצד על כן קראו לו עיר דויד

⁸ח ויבן העיר מסביב מן המלוא ועד הסביב ויואב יחיה את שאר העיר

⁹ט וילך דויד הלוך וגדול ויהוה צבאות עמו {פ}

¹⁰י ואלה ראשי הגברים אשר לדויד המתחזקים עמו במלכותו עם כל ישראל להמליכו--כדבר יהוה על ישראל {ס}

¹¹יא ואלה מספר הגברים אשר לדויד ישבעם בן חכמוני ראש השלושים (השלישים)--הוא עורר את חניתו על שלש מאות חלל בפעם אחת

¹²יב ואחריו אלעזר בן דודו האחוחי הוא בשלושה הגברים

¹³יג הוא היה עם דויד בפס דמים והפלשתים נאספו שם למלחמה ותהי חלקת השדה מלאה שעורים והעם נסו מפני פלשתים

¹⁴יד ויתיצבו בתוך החלקה ויצילוה ויכו את פלשתים ויושע יהוה תשועה גדולה

¹⁵טו וירדו שלושה מן השלושים ראש על הצר אל דויד--אל מערת עדלם ומחנה פלשתים חנה בעמק רפאים

¹⁶טז ודויד אז במצודה ונציב פלשתים אז בבית לחם

¹⁷יז ויתאו דויד ויאמר מי ישקני מים מבור בית לחם אשר בשער

¹⁸יח ויבקעו השלשה במחנה פלשתים וישאבו מים מבור בית לחם אשר בשער וישאו ויבאו אל דויד ולא אבה דויד לשתותם וינסך אתם ליהוה

¹⁹יט ויאמר חלילה לי מאלהי מעשות זאת הדם האנשים האלה אשתה בנפשותם כי בנפשותם הביאום ולא אבה לשתותם אלה עשו שלשת הגבורים

²⁰כ ואבשי אחי יואב הוא היה ראש השלושה והוא עורר את חניתו על שלש מאות חלל ולא (ולו) שם בשלושה

²¹כא מן השלושה בשנים נכבד ויהי להם לשר ועד השלושה לא בא {ס}

²²כב בניה בן יהוידע בן איש חיל רב פעלים מן קבצאל הוא הכה את שני אריאל מואב והוא ירד והכה את הארי בתוך הבור ביום השלג

²³כג והוא הכה את האיש המצרי איש מדה חמש באמה וביד המצרי חנית כמנור ארגים וירד אליו בשבט ויגזל את החנית מיד המצרי ויהרגהו בחניתו

²⁴כד אלה עשה בניהו בן יהוידע ולו שם בשלושה הגברים

²⁵כה מן השלושים הנו נכבד הוא ואל השלשה לא בא וישימהו דויד על משמעתו {ס}

²⁶כו וגבורי החילים עשהאל {ר} אחי יואב {ס} אלחנן בן דודו מבית לחם {ס}

²⁷כז שמות {ר} ההרורי {ס} חלץ הפלוני {ס}

²⁸כח עירא בן עקש {ר} התקועי {ס} אביעזר הענתותי {ס}

²⁹כט סבכי {ר} החשתי {ס} עילי האחוחי {ס}

³⁰ל מהרי {ר} הנטפתי {ס} חלד בן בענה הנטופתי {ס}

³¹לא איתי {ר} בן ריבי מגבעת בני בנימן {ס} בניה הפרעתני {ס}

³²לב חורי {ר} מנחלי געש {ס} אביאל הערבתי {ס}

³³לג עזמות {ר} הבחרומי {ס} אליחבא השעלבני {ס}

³⁴לד בני השם {ר} הגזוני {ס} יונתן בן שגה ההררי {ס}

³⁵לה אחיאם {ר} בן שכר ההררי {ס} אליפל בן אור {ס}

³⁶לו חפר המכרתי {ר} אחיה הפלני {ס}

³⁷לז חצרו הכרמלי {ס} נערי {ר} בן אזבי {ס}

³⁸לח יואל אחי נתן {ס} מבחר בן {ר} הגרי {ס}

³⁹לט צלק העמוני נחרי הברתי נשא כלי יואב בן {ר} צרויה {ס}

⁴⁰מ עירא היתרי {ס} גרב היתרי {ס}

⁴¹מא אוריה {ר} החתי {ס} זבד בן אחלי {ס}

⁴²מב עדינא בן שיזא הראובני {ר} ראש לראובני--ועליו שלשים {ס}

⁴³מג חנן בן מעכה ויושפט {ר} המתני {ס}

⁴⁴מד עזיא העשתרתי {ס} שמע ויעואל (ויעיאל) {ר} בני חותם הערערי {ס}

⁴⁵מה ידיעאל בן שמרי ויחא אחיו {ר} התיצי {ס}

⁴⁶מו אליאל המחוים ויריבי ויושויה בני אלנעם {ס} ויתמה {ר} המואבי

⁴⁷מז אליאל ועובד {ס} ויעשיאל המצביה {פ}