Read כֶּתֶר אֲרָם צוֹבָא - Tanah Aleppo Codex דברי הימים א 13 Bible Online

דברי הימים א 13 - כֶּתֶר אֲרָם צוֹבָא - Tanah Aleppo Codex bible

דברי הימים א 13

¹א ויועץ דויד עם שרי האלפים והמאות--לכל נגיד

²ב ויאמר דויד לכל קהל ישראל אם עליכם טוב ומן יהוה אלהינו נפרצה נשלחה על אחינו הנשארים בכל ארצות ישראל ועמהם הכהנים והלוים בערי מגרשיהם ויקבצו אלינו

³ג ונסבה את ארון אלהינו אלינו כי לא דרשנהו בימי שאול

⁴ד ויאמרו כל הקהל לעשות כן כי ישר הדבר בעיני כל העם

⁵ה ויקהל דויד את כל ישראל מן שיחור מצרים ועד לבוא חמת להביא את ארון האלהים מקרית יערים

⁶ו ויעל דויד וכל ישראל בעלתה אל קרית יערים אשר ליהודה להעלות משם את ארון האלהים יהוה יושב הכרובים--אשר נקרא שם

⁷ז וירכיבו את ארון האלהים על עגלה חדשה מבית אבינדב ועזא ואחיו נהגים בעגלה

⁸ח ודויד וכל ישראל משחקים לפני האלהים--בכל עז ובשירים ובכנרות ובנבלים ובתפים ובמצלתים ובחצצרות

⁹ט ויבאו עד גרן כידן וישלח עזא את ידו לאחז את הארון--כי שמטו הבקר

¹⁰י ויחר אף יהוה בעזא ויכהו על אשר שלח ידו על הארון וימת שם לפני אלהים

¹¹יא ויחר לדויד כי פרץ יהוה פרץ בעזא ויקרא למקום ההוא פרץ עזא עד היום הזה

¹²יב ויירא דויד את האלהים ביום ההוא לאמר היך אביא אלי את ארון האלהים

¹³יג ולא הסיר דויד את הארון אליו אל עיר דויד ויטהו אל בית עבד אדם הגתי

¹⁴יד וישב ארון האלהים עם בית עבד אדם בביתו--שלשה חדשים ויברך יהוה את בית עבד אדם ואת כל אשר לו {ס}