Read כֶּתֶר אֲרָם צוֹבָא - Tanah Aleppo Codex דברי הימים א 15 Bible Online

דברי הימים א 15 - כֶּתֶר אֲרָם צוֹבָא - Tanah Aleppo Codex bible

דברי הימים א 15

¹א ויעש לו בתים בעיר דויד ויכן מקום לארון האלהים ויט לו אהל

²ב אז אמר דויד לא לשאת את ארון האלהים כי אם הלוים כי בם בחר יהוה לשאת את ארון יהוה ולשרתו--עד עולם {פ}

³ג ויקהל דויד את כל ישראל אל ירושלם להעלות את ארון יהוה אל מקומו אשר הכין לו

⁴ד ויאסף דויד את בני אהרן ואת הלוים {ס}

⁵ה לבני קהת--אוריאל השר ואחיו מאה ועשרים {ס}

⁶ו לבני מררי--עשיה השר ואחיו מאתים ועשרים {ס}

⁷ז לבני גרשום--יואל השר ואחיו מאה ושלשים {ס}

⁸ח לבני אליצפן--שמעיה השר ואחיו מאתים {ס}

⁹ט לבני חברון--אליאל השר ואחיו שמונים {ס}

¹⁰י לבני עזיאל עמינדב השר--ואחיו מאה ושנים עשר {פ}

¹¹יא ויקרא דויד לצדוק ולאביתר הכהנים וללוים לאוריאל עשיה ויואל שמעיה ואליאל ועמינדב {ס}

¹²יב ויאמר להם אתם ראשי האבות ללוים התקדשו אתם ואחיכם והעליתם את ארון יהוה אלהי ישראל אל הכינותי לו

¹³יג כי למבראשונה לא אתם--פרץ יהוה אלהינו בנו כי לא דרשנהו כמשפט

¹⁴יד ויתקדשו הכהנים והלוים להעלות את ארון יהוה אלהי ישראל

¹⁵טו וישאו בני הלוים את ארון האלהים כאשר צוה משה כדבר יהוה--בכתפם במטות עליהם {פ}

¹⁶טז ויאמר דויד לשרי הלוים להעמיד את אחיהם המשררים בכלי שיר נבלים וכנרות ומצלתים--משמיעים להרים בקול לשמחה {פ}

¹⁷יז ויעמידו הלוים את הימן בן יואל ומן אחיו אסף בן ברכיהו {ס} ומן בני מררי אחיהם איתן בן קושיהו

¹⁸יח ועמהם אחיהם המשנים זכריהו בן ויעזיאל ושמירמות ויחיאל ועני אליאב ובניהו ומעשיהו ומתתיהו ואליפלהו ומקניהו ועבד אדם ויעיאל--השערים

¹⁹יט והמשררים הימן אסף ואיתן--במצלתים נחשת להשמיע

²⁰כ וזכריה ועזיאל ושמירמות ויחיאל ועני ואליאב ומעשיהו ובניהו--בנבלים על עלמות

²¹כא ומתתיהו ואליפלהו ומקניהו ועבד אדם ויעיאל ועזזיהו--בכנרות על השמינית לנצח

²²כב וכנניהו שר הלוים במשא--יסר במשא כי מבין הוא

²³כג וברכיה ואלקנה שערים לארון

²⁴כד ושבניהו ויושפט ונתנאל ועמשי וזכריהו ובניהו ואליעזר הכהנים מחצצרים (מחצרים) בחצצרות לפני ארון האלהים ועבד אדם ויחיה שערים לארון

²⁵כה ויהי דויד וזקני ישראל ושרי האלפים ההלכים להעלות את ארון ברית יהוה מן בית עבד אדם--בשמחה {פ}

²⁶כו ויהי בעזר האלהים את הלוים נשאי ארון ברית יהוה ויזבחו שבעה פרים ושבעה אילים

²⁷כז ודויד מכרבל במעיל בוץ וכל הלוים הנשאים את הארון והמשררים וכנניה השר המשא המשררים ועל דויד אפוד בד

²⁸כח וכל ישראל מעלים את ארון ברית יהוה בתרועה ובקול שופר ובחצצרות ובמצלתים משמעים בנבלים וכנרות

²⁹כט ויהי ארון ברית יהוה בא עד עיר דויד ומיכל בת שאול נשקפה בעד החלון ותרא את המלך דויד מרקד ומשחק ותבז לו בלבה {פ}