Read כֶּתֶר אֲרָם צוֹבָא - Tanah Aleppo Codex דברי הימים א 17 Bible Online

דברי הימים א 17 - כֶּתֶר אֲרָם צוֹבָא - Tanah Aleppo Codex bible

דברי הימים א 17

¹א ויהי כאשר ישב דויד בביתו ויאמר דויד אל נתן הנביא הנה אנכי יושב בבית הארזים וארון ברית יהוה תחת יריעות

²ב ויאמר נתן אל דויד כל אשר בלבבך עשה כי האלהים עמך {ס}

³ג ויהי בלילה ההוא ויהי דבר אלהים אל נתן לאמר

⁴ד לך ואמרת אל דויד עבדי כה אמר יהוה לא אתה תבנה לי הבית לשבת

⁵ה כי לא ישבתי בבית מן היום אשר העליתי את ישראל עד היום הזה ואהיה מאהל אל אהל וממשכן

⁶ו בכל אשר התהלכתי בכל ישראל הדבר דברתי את אחד שפטי ישראל אשר צויתי לרעות את עמי לאמר למה לא בניתם לי בית ארזים

⁷ז ועתה כה תאמר לעבדי לדויד {ס} כה אמר יהוה צבאות אני לקחתיך מן הנוה מן אחרי הצאן--להיות נגיד על עמי ישראל

⁸ח ואהיה עמך בכל אשר הלכת ואכרית את כל אויביך מפניך ועשיתי לך שם כשם הגדולים אשר בארץ

⁹ט ושמתי מקום לעמי ישראל ונטעתיהו ושכן תחתיו ולא ירגז עוד ולא יוסיפו בני עולה לבלתו כאשר בראשונה

¹⁰י ולמימים אשר צויתי שפטים על עמי ישראל והכנעתי את כל אויביך ואגד לך ובית יבנה לך יהוה

¹¹יא והיה כי מלאו ימיך ללכת עם אבתיך והקימותי את זרעך אחריך אשר יהיה מבניך והכינותי את מלכותו

¹²יב הוא יבנה לי בית וכננתי את כסאו עד עולם

¹³יג אני אהיה לו לאב והוא יהיה לי לבן וחסדי לא אסיר מעמו כאשר הסירותי מאשר היה לפניך

¹⁴יד והעמדתיהו בביתי ובמלכותי עד העולם וכסאו יהיה נכון עד עולם

¹⁵טו ככל הדברים האלה וככל החזון הזה--כן דבר נתן אל דויד {פ}

¹⁶טז ויבא המלך דויד וישב לפני יהוה ויאמר מי אני יהוה אלהים ומי ביתי כי הביאתני עד הלם

¹⁷יז ותקטן זאת בעיניך אלהים ותדבר על בית עבדך למרחוק וראיתני כתור האדם המעלה--יהוה אלהים

¹⁸יח מה יוסיף עוד דויד אליך לכבוד את עבדך ואתה את עבדך ידעת

¹⁹יט יהוה--בעבור עבדך וכלבך עשית את כל הגדולה הזאת להדיע את כל הגדלות

²⁰כ יהוה אין כמוך ואין אלהים זולתך בכל אשר שמענו באזנינו

²¹כא ומי כעמך ישראל גוי אחד בארץ אשר הלך האלהים לפדות לו עם לשום לך שם גדלות ונראות--לגרש מפני עמך אשר פדית ממצרים גוים

²²כב ותתן את עמך ישראל לך לעם--עד עולם ואתה יהוה היית להם לאלהים

²³כג ועתה יהוה--הדבר אשר דברת על עבדך ועל ביתו יאמן עד עולם ועשה כאשר דברת

²⁴כד ויאמן ויגדל שמך עד עולם לאמר--יהוה צבאות אלהי ישראל אלהים לישראל ובית דויד עבדך נכון לפניך

²⁵כה כי אתה אלהי גלית את אזן עבדך לבנות לו בית על כן מצא עבדך להתפלל לפניך

²⁶כו ועתה יהוה אתה הוא האלהים ותדבר על עבדך הטובה הזאת

²⁷כז ועתה הואלת לברך את בית עבדך להיות לעולם לפניך כי אתה יהוה ברכת ומברך לעולם {פ}