Read כֶּתֶר אֲרָם צוֹבָא - Tanah Aleppo Codex דברי הימים ב 4 Bible Online

דברי הימים ב 4 - כֶּתֶר אֲרָם צוֹבָא - Tanah Aleppo Codex bible

דברי הימים ב 4

¹א ויעש מזבח נחשת--עשרים אמה ארכו ועשרים אמה רחבו ועשר אמות קומתו {ס}

²ב ויעש את הים מוצק עשר באמה משפתו אל שפתו עגול סביב וחמש באמה קומתו וקו שלשים באמה יסב אתו סביב

³ג ודמות בקרים תחת לו סביב סביב סובבים אתו עשר באמה מקיפים את הים סביב שנים טורים הבקר יצוקים במצקתו

⁴ד עומד על שנים עשר בקר שלשה פנים צפונה ושלושה פנים ימה ושלשה פנים נגבה ושלשה פנים מזרחה והים עליהם מלמעלה וכל אחריהם ביתה

⁵ה ועביו טפח--ושפתו כמעשה שפת כוס פרח שושנה מחזיק בתים שלשת אלפים יכיל {ס}

⁶ו ויעש כיורים עשרה ויתן חמשה מימין וחמשה משמאול לרחצה בהם את מעשה העולה ידיחו בם והים לרחצה לכהנים בו {ס}

⁷ז ויעש את מנרות הזהב עשר--כמשפטם ויתן בהיכל חמש מימין וחמש משמאול {ס}

⁸ח ויעש שלחנות עשרה וינח בהיכל חמשה מימין וחמשה משמאול ויעש מזרקי זהב מאה {ס}

⁹ט ויעש חצר הכהנים והעזרה הגדולה ודלתות לעזרה ודלתותיהם צפה נחשת

¹⁰י ואת הים נתן מכתף הימנית קדמה--ממול נגבה

¹¹יא ויעש חורם--את הסירות ואת היעים ואת המזרקות ויכל חירם (חורם) לעשות את המלאכה אשר עשה למלך שלמה בבית האלהים

¹²יב עמודים שנים והגלות והכתרות על ראש העמודים שתים והשבכות שתים--לכסות את שתי גלות הכתרות אשר על ראש העמודים

¹³יג ואת הרמונים ארבע מאות לשתי השבכות שנים טורים רמונים לשבכה האחת--לכסות את שתי גלות הכתרות אשר על פני העמודים

¹⁴יד ואת המכנות עשה ואת הכירות עשה על המכנות

¹⁵טו את הים אחד ואת הבקר שנים עשר תחתיו

¹⁶טז ואת הסירות ואת היעים ואת המזלגות ואת כל כליהם עשה חורם אביו למלך שלמה לבית יהוה--נחשת מרוק

¹⁷יז בככר הירדן יצקם המלך בעבי האדמה בין סכות ובין צרדתה

¹⁸יח ויעש שלמה כל הכלים האלה לרב מאד כי לא נחקר משקל הנחשת {ס}

¹⁹יט ויעש שלמה--את כל הכלים אשר בית האלהים ואת מזבח הזהב ואת השלחנות ועליהם לחם הפנים

²⁰כ ואת המנרות ונרתיהם לבערם כמשפט לפני הדביר--זהב סגור

²¹כא והפרח והנרות והמלקחים זהב הוא מכלות זהב

²²כב והמזמרות והמזרקות והכפות והמחתות זהב סגור ופתח הבית דלתותיו הפנימיות לקדש הקדשים ודלתי הבית להיכל--זהב