Read כֶּתֶר אֲרָם צוֹבָא - Tanah Aleppo Codex עזרא 10 Bible Online

עזרא 10 - כֶּתֶר אֲרָם צוֹבָא - Tanah Aleppo Codex bible

עזרא 10

¹א וכהתפלל עזרא וכהתודתו בכה ומתנפל לפני בית האלהים נקבצו אליו מישראל קהל רב מאד אנשים ונשים וילדים--כי בכו העם הרבה בכה {ס}

²ב ויען שכניה בן יחיאל מבני עולם (עילם) ויאמר לעזרא--אנחנו מעלנו באלהינו ונשב נשים נכריות מעמי הארץ ועתה יש מקוה לישראל על זאת

³ג ועתה נכרת ברית לאלהינו להוציא כל נשים והנולד מהם בעצת אדני והחרדים במצות אלהינו וכתורה יעשה

⁴ד קום כי עליך הדבר ואנחנו עמך חזק ועשה {פ}

⁵ה ויקם עזרא וישבע את שרי הכהנים הלוים וכל ישראל לעשות כדבר הזה--וישבעו

⁶ו ויקם עזרא מלפני בית האלהים וילך אל לשכת יהוחנן בן אלישיב וילך שם לחם לא אכל ומים לא שתה--כי מתאבל על מעל הגולה {ס}

⁷ז ויעבירו קול ביהודה וירושלם לכל בני הגולה--להקבץ ירושלם

⁸ח וכל אשר לא יבוא לשלשת הימים כעצת השרים והזקנים--יחרם כל רכושו והוא יבדל מקהל הגולה {ס}

⁹ט ויקבצו כל אנשי יהודה ובנימן ירושלם לשלשת הימים הוא חדש התשיעי--בעשרים בחדש וישבו כל העם ברחוב בית האלהים מרעידים על הדבר ומהגשמים {פ}

¹⁰י ויקם עזרא הכהן ויאמר אלהם אתם מעלתם ותשיבו נשים נכריות--להוסיף על אשמת ישראל

¹¹יא ועתה תנו תודה ליהוה אלהי אבתיכם--ועשו רצונו והבדלו מעמי הארץ ומן הנשים הנכריות

¹²יב ויענו כל הקהל ויאמרו קול גדול כן כדבריך (כדברך) עלינו לעשות

¹³יג אבל העם רב והעת גשמים ואין כח לעמוד בחוץ והמלאכה לא ליום אחד ולא לשנים--כי הרבינו לפשע בדבר הזה

¹⁴יד יעמדו נא שרינו לכל הקהל וכל אשר בערינו ההשיב נשים נכריות יבא לעתים מזמנים ועמהם זקני עיר ועיר ושפטיה עד להשיב חרון אף אלהינו ממנו--עד לדבר הזה {פ}

¹⁵טו אך יונתן בן עשהאל ויחזיה בן תקוה עמדו על זאת ומשלם ושבתי הלוי עזרם

¹⁶טז ויעשו כן בני הגולה ויבדלו עזרא הכהן אנשים ראשי האבות לבית אבתם וכלם בשמות וישבו ביום אחד לחדש העשירי לדריוש הדבר

¹⁷יז ויכלו בכל--אנשים ההשיבו נשים נכריות עד יום אחד לחדש הראשון {פ}

¹⁸יח וימצא מבני הכהנים אשר השיבו נשים נכריות מבני ישוע בן יוצדק ואחיו--מעשיה ואליעזר ויריב וגדליה

¹⁹יט ויתנו ידם להוציא נשיהם ואשמים איל צאן על אשמתם {ס}

²⁰כ ומבני אמר חנני וזבדיה {ס}

²¹כא ומבני חרם--מעשיה ואליה ושמעיה ויחיאל ועזיה

²²כב ומבני פשחור--אליועיני מעשיה ישמעאל נתנאל יוזבד ואלעשה {ס}

²³כג ומן הלוים--יוזבד ושמעי וקליה הוא קליטא פתחיה יהודה ואליעזר {ס}

²⁴כד ומן המשררים אלישיב ומן השערים שלם וטלם ואורי {ס}

²⁵כה ומישראל--מבני פרעש רמיה ויזיה ומלכיה ומימן ואלעזר ומלכיה ובניה {ס}

²⁶כו ומבני עילם--מתניה זכריה ויחיאל ועבדי וירימות ואליה {ס}

²⁷כז ומבני זתוא--אליועני אלישיב מתניה וירמות וזבד ועזיזא {ס}

²⁸כח ומבני בבי--יהוחנן חנניה זבי עתלי {ס}

²⁹כט ומבני בני--משלם מלוך ועדיה ישוב ושאל ירמות (ורמות) {ס}

³⁰ל ומבני פחת מואב עדנא וכלל בניה מעשיה מתניה בצלאל ובנוי ומנשה {ס}

³¹לא ובני חרם--אליעזר ישיה מלכיה שמעיה שמעון

³²לב בנימן מלוך שמריה {ס}

³³לג מבני חשם--מתני מתתה זבד אליפלט ירמי מנשה שמעי {ס}

³⁴לד מבני בני מעדי עמרם ואואל {ס}

³⁵לה בניה בדיה כלוהי (כלוהו)

³⁶לו וניה מרמות אלישיב

³⁷לז מתניה מתני ויעשו (ויעשי)

³⁸לח ובני ובנוי שמעי

³⁹לט ושלמיה ונתן ועדיה

⁴⁰מ מכנדבי ששי שרי

⁴¹מא עזראל ושלמיהו שמריה

⁴²מב שלום אמריה יוסף {ס}

⁴³מג מבני נבו--יעיאל מתתיה זבד זבינא ידו (ידי) ויואל בניה

⁴⁴מד כל אלה נשאי (נשאו) נשים נכריות ויש מהם נשים וישימו בנים {פ}