Read כֶּתֶר אֲרָם צוֹבָא - Tanah Aleppo Codex עזרא 8 Bible Online

עזרא 8 - כֶּתֶר אֲרָם צוֹבָא - Tanah Aleppo Codex bible

עזרא 8

¹א ואלה ראשי אבתיהם והתיחשם העלים עמי במלכות ארתחשסתא המלך--מבבל {ס}

²ב מבני פינחס גרשם {ס} מבני איתמר דניאל {ס} מבני דויד חטוש {ס}

³ג מבני שכניה {ס} מבני פרעש זכריה ועמו התיחש לזכרים מאה וחמשים {ס}

⁴ד מבני פחת מואב אליהועיני בן זרחיה ועמו מאתים הזכרים {ס}

⁵ה מבני שכניה בן יחזיאל ועמו שלש מאות הזכרים {ס}

⁶ו ומבני עדין עבד בן יונתן ועמו חמשים הזכרים {ס}

⁷ז ומבני עילם ישעיה בן עתליה ועמו שבעים הזכרים {ס}

⁸ח ומבני שפטיה זבדיה בן מיכאל ועמו שמנים הזכרים {ס}

⁹ט מבני יואב עבדיה בן יחיאל ועמו מאתים ושמנה עשר הזכרים {ס}

¹⁰י ומבני שלומית בן יוספיה ועמו מאה וששים הזכרים {ס}

¹¹יא ומבני בבי זכריה בן בבי ועמו עשרים ושמנה הזכרים {ס}

¹²יב ומבני עזגד יוחנן בן הקטן ועמו מאה ועשרה הזכרים {ס}

¹³יג ומבני אדניקם אחרנים--ואלה שמותם אליפלט יעיאל ושמעיה ועמהם ששים הזכרים {ס}

¹⁴יד ומבני בגוי עותי וזבוד (וזכור) ועמו שבעים הזכרים {פ}

¹⁵טו ואקבצם אל הנהר הבא אל אהוא ונחנה שם ימים שלשה ואבינה בעם ובכהנים ומבני לוי לא מצאתי שם

¹⁶טז ואשלחה לאליעזר לאריאל לשמעיה ולאלנתן וליריב ולאלנתן ולנתן ולזכריה ולמשלם--ראשים וליויריב ולאלנתן מבינים

¹⁷יז ואוצאה (ואצוה) אותם על אדו הראש בכספיא המקום ואשימה בפיהם דברים לדבר אל אדו אחיו הנתונים (הנתינים) בכספיא המקום--להביא לנו משרתים לבית אלהינו

¹⁸יח ויביאו לנו כיד אלהינו הטובה עלינו איש שכל--מבני מחלי בן לוי בן ישראל ושרביה ובניו ואחיו שמנה עשר

¹⁹יט ואת חשביה--ואתו ישעיה מבני מררי אחיו ובניהם עשרים {ס}

²⁰כ ומן הנתינים שנתן דויד והשרים לעבדת הלוים--נתינים מאתים ועשרים כלם נקבו בשמות

²¹כא ואקרא שם צום על הנהר אהוא להתענות לפני אלהינו--לבקש ממנו דרך ישרה לנו ולטפנו ולכל רכושנו

²²כב כי בשתי לשאול מן המלך חיל ופרשים--לעזרנו מאויב בדרך כי אמרנו למלך לאמר יד אלהינו על כל מבקשיו לטובה ועזו ואפו על כל עזביו

²³כג ונצומה ונבקשה מאלהינו על זאת ויעתר לנו

²⁴כד ואבדילה משרי הכהנים שנים עשר--לשרביה חשביה ועמהם מאחיהם עשרה

²⁵כה ואשקולה (ואשקלה) להם את הכסף ואת הזהב ואת הכלים--תרומת בית אלהינו ההרימו המלך ויעציו ושריו וכל ישראל הנמצאים

²⁶כו ואשקלה על ידם כסף ככרים שש מאות וחמשים וכלי כסף מאה לככרים זהב מאה ככר

²⁷כז וכפרי זהב עשרים לאדרכנים אלף וכלי נחשת מצהב טובה שנים--חמודת כזהב

²⁸כח ואמרה אלהם אתם קדש ליהוה והכלים קדש והכסף והזהב נדבה ליהוה אלהי אבתיכם

²⁹כט שקדו ושמרו עד תשקלו לפני שרי הכהנים והלוים ושרי האבות לישראל--בירושלם הלשכות בית יהוה

³⁰ל וקבלו הכהנים והלוים משקל הכסף והזהב והכלים--להביא לירושלם לבית אלהינו {פ}

³¹לא ונסעה מנהר אהוא בשנים עשר לחדש הראשון--ללכת ירושלם ויד אלהינו היתה עלינו ויצילנו מכף אויב ואורב על הדרך

³²לב ונבוא ירושלם ונשב שם ימים שלשה

³³לג וביום הרביעי נשקל הכסף והזהב והכלים בבית אלהינו על יד מרמות בן אוריה הכהן ועמו אלעזר בן פינחס ועמהם יוזבד בן ישוע ונועדיה בן בנוי--הלוים

³⁴לד במספר במשקל לכל ויכתב כל המשקל בעת ההיא {פ}

³⁵לה הבאים מהשבי בני הגולה הקריבו עלות לאלהי ישראל פרים שנים עשר על כל ישראל אילים תשעים וששה כבשים שבעים ושבעה צפירי חטאת שנים עשר הכל עולה ליהוה {פ}

³⁶לו ויתנו את דתי המלך לאחשדרפני המלך ופחוות עבר הנהר ונשאו את העם ואת בית האלהים {ס}