Read כֶּתֶר אֲרָם צוֹבָא - Tanah Aleppo Codex אסתר 4 Bible Online

אסתר 4 - כֶּתֶר אֲרָם צוֹבָא - Tanah Aleppo Codex bible

אסתר 4

¹א ומרדכי ידע את כל אשר נעשה ויקרע מרדכי את בגדיו וילבש שק ואפר ויצא בתוך העיר ויזעק זעקה גדולה ומרה

²ב ויבוא עד לפני שער המלך כי אין לבוא אל שער המלך בלבוש שק

³ג ובכל מדינה ומדינה מקום אשר דבר המלך ודתו מגיע--אבל גדול ליהודים וצום ובכי ומספד שק ואפר יצע לרבים

⁴ד ותבואינה (ותבואנה) נערות אסתר וסריסיה ויגידו לה ותתחלחל המלכה מאד ותשלח בגדים להלביש את מרדכי ולהסיר שקו מעליו--ולא קבל

⁵ה ותקרא אסתר להתך מסריסי המלך אשר העמיד לפניה ותצוהו על מרדכי--לדעת מה זה ועל מה זה

⁶ו ויצא התך אל מרדכי--אל רחוב העיר אשר לפני שער המלך

⁷ז ויגד לו מרדכי את כל אשר קרהו ואת פרשת הכסף אשר אמר המן לשקול על גנזי המלך ביהודיים (ביהודים)--לאבדם

⁸ח ואת פתשגן כתב הדת אשר נתן בשושן להשמידם נתן לו--להראות את אסתר ולהגיד לה ולצוות עליה לבוא אל המלך להתחנן לו ולבקש מלפניו--על עמה

⁹ט ויבוא התך ויגד לאסתר את דברי מרדכי

¹⁰י ותאמר אסתר להתך ותצוהו אל מרדכי

¹¹יא כל עבדי המלך ועם מדינות המלך ידעים אשר כל איש ואשה אשר יבוא אל המלך אל החצר הפנימית אשר לא יקרא אחת דתו להמית לבד מאשר יושיט לו המלך את שרביט הזהב וחיה ואני לא נקראתי לבוא אל המלך--זה שלושים יום

¹²יב ויגידו למרדכי את דברי אסתר

¹³יג ויאמר מרדכי להשיב אל אסתר אל תדמי בנפשך להמלט בית המלך מכל היהודים

¹⁴יד כי אם החרש תחרישי בעת הזאת--רוח והצלה יעמוד ליהודים ממקום אחר ואת ובית אביך תאבדו ומי יודע--אם לעת כזאת הגעת למלכות

¹⁵טו ותאמר אסתר להשיב אל מרדכי

¹⁶טז לך כנוס את כל היהודים הנמצאים בשושן וצומו עלי ואל תאכלו ואל תשתו שלשת ימים לילה ויום--גם אני ונערתי אצום כן ובכן אבוא אל המלך אשר לא כדת וכאשר אבדתי אבדתי

¹⁷יז ויעבר מרדכי ויעש ככל אשר צותה עליו אסתר