Read כֶּתֶר אֲרָם צוֹבָא - Tanah Aleppo Codex שמות 1 Bible Online

שמות 1 - כֶּתֶר אֲרָם צוֹבָא - Tanah Aleppo Codex bible

שמות 1

¹א ואלה שמות בני ישראל הבאים מצרימה את יעקב איש וביתו באו

²ב ראובן שמעון לוי ויהודה

³ג יששכר זבולן ובנימן

⁴ד דן ונפתלי גד ואשר

⁵ה ויהי כל נפש יצאי ירך יעקב--שבעים נפש ויוסף היה במצרים

⁶ו וימת יוסף וכל אחיו וכל הדור ההוא

⁷ז ובני ישראל פרו וישרצו וירבו ויעצמו--במאד מאד ותמלא הארץ אתם {פ}

⁸ח ויקם מלך חדש על מצרים אשר לא ידע את יוסף

⁹ט ויאמר אל עמו הנה עם בני ישראל--רב ועצום ממנו

¹⁰י הבה נתחכמה לו פן ירבה והיה כי תקראנה מלחמה ונוסף גם הוא על שנאינו ונלחם בנו ועלה מן הארץ

¹¹יא וישימו עליו שרי מסים למען ענתו בסבלתם ויבן ערי מסכנות לפרעה--את פתם ואת רעמסס

¹²יב וכאשר יענו אתו כן ירבה וכן יפרץ ויקצו מפני בני ישראל

¹³יג ויעבדו מצרים את בני ישראל בפרך

¹⁴יד וימררו את חייהם בעבדה קשה בחמר ובלבנים ובכל עבדה בשדה--את כל עבדתם אשר עבדו בהם בפרך

¹⁵טו ויאמר מלך מצרים למילדת העברית אשר שם האחת שפרה ושם השנית פועה

¹⁶טז ויאמר בילדכן את העבריות וראיתן על האבנים אם בן הוא והמתן אתו ואם בת הוא וחיה

¹⁷יז ותיראן המילדת את האלהים ולא עשו כאשר דבר אליהן מלך מצרים ותחיין את הילדים

¹⁸יח ויקרא מלך מצרים למילדת ויאמר להן מדוע עשיתן הדבר הזה ותחיין את הילדים

¹⁹יט ותאמרן המילדת אל פרעה כי לא כנשים המצרית העברית כי חיות הנה בטרם תבוא אלהן המילדת וילדו

²⁰כ וייטב אלהים למילדת וירב העם ויעצמו מאד

²¹כא ויהי כי יראו המילדת את האלהים ויעש להם בתים

²²כב ויצו פרעה לכל עמו לאמר כל הבן הילוד היארה תשליכהו וכל הבת תחיון {פ}