Read כֶּתֶר אֲרָם צוֹבָא - Tanah Aleppo Codex שמות 15 Bible Online

שמות 15 - כֶּתֶר אֲרָם צוֹבָא - Tanah Aleppo Codex bible

שמות 15

¹א אז ישיר משה ובני ישראל את השירה הזאת ליהוה ויאמרו {ר} לאמר {ס} אשירה ליהוה כי גאה גאה {ס} סוס {ר} ורכבו רמה בים {ס}

²ב עזי וזמרת יה ויהי לי {ר} לישועה {ס} זה אלי ואנוהו {ס} אלהי {ר} אבי וארממנהו {ס}

³ג יהוה איש מלחמה יהוה {ר} שמו {ס}

⁴ד מרכבת פרעה וחילו ירה בים {ס} ומבחר {ר} שלשיו טבעו בים סוף {ס}

⁵ה תהמת יכסימו ירדו במצולת כמו {ר} אבן {ס}

⁶ו ימינך יהוה נאדרי בכח {ס} ימינך {ר} יהוה תרעץ אויב {ס}

⁷ז וברב גאונך תהרס {ר} קמיך {ס} תשלח חרנך--יאכלמו כקש {ס}

⁸ח וברוח {ר} אפיך נערמו מים {ס} נצבו כמו נד {ר} נזלים {ס} קפאו תהמת בלב ים {ס}

⁹ט אמר {ר} אויב ארדף אשיג {ס} אחלק שלל תמלאמו {ר} נפשי-- {ס} אריק חרבי תורישמו ידי {ס}

¹⁰י נשפת {ר} ברוחך כסמו ים {ס} צללו כעופרת במים {ר} אדירים {ס}

¹¹יא מי כמכה באלם יהוה {ס} מי {ר} כמכה נאדר בקדש {ס} נורא תהלת עשה {ר} פלא {ס}

¹²יב נטית ימינך--תבלעמו ארץ {ס}

¹³יג נחית {ר} בחסדך עם זו גאלת {ס} נהלת בעזך אל נוה {ר} קדשך {ס}

¹⁴יד שמעו עמים ירגזון {ס} חיל {ר} אחז ישבי פלשת {ס}

¹⁵טו אז נבהלו אלופי {ר} אדום-- {ס} אילי מואב יאחזמו רעד {ס} נמגו {ר} כל ישבי כנען {ס}

¹⁶טז תפל עליהם אימתה {ר} ופחד {ס} בגדל זרועך ידמו כאבן {ס} עד {ר} יעבר עמך יהוה {ס} עד יעבר עם זו {ר} קנית {ס}

¹⁷יז תבאמו ותטעמו בהר נחלתך-- {ס} מכון {ר} לשבתך פעלת יהוה {ס} מקדש אדני כוננו {ר} ידיך {ס}

¹⁸יח יהוה ימלך לעלם ועד {ס}

¹⁹יט כי {ר} בא סוס פרעה ברכבו ובפרשיו בים {ס} וישב יהוה עלהם {ר} את מי הים {ס} ובני ישראל הלכו ביבשה בתוך הים {ר} {ש}

²⁰כ ותקח מרים הנביאה אחות אהרן את התף--בידה ותצאן כל הנשים אחריה בתפים ובמחלת

²¹כא ותען להם מרים שירו ליהוה כי גאה גאה סוס ורכבו רמה בים {ס}

²²כב ויסע משה את ישראל מים סוף ויצאו אל מדבר שור וילכו שלשת ימים במדבר ולא מצאו מים

²³כג ויבאו מרתה--ולא יכלו לשתת מים ממרה כי מרים הם על כן קרא שמה מרה

²⁴כד וילנו העם על משה לאמר מה נשתה

²⁵כה ויצעק אל יהוה ויורהו יהוה עץ וישלך אל המים וימתקו המים שם שם לו חק ומשפט ושם נסהו

²⁶כו ויאמר אם שמוע תשמע לקול יהוה אלהיך והישר בעיניו תעשה והאזנת למצותיו ושמרת כל חקיו--כל המחלה אשר שמתי במצרים לא אשים עליך כי אני יהוה רפאך {ס}

²⁷כז ויבאו אילמה--ושם שתים עשרה עינת מים ושבעים תמרים ויחנו שם על המים