Read כֶּתֶר אֲרָם צוֹבָא - Tanah Aleppo Codex שמות 16 Bible Online

שמות 16 - כֶּתֶר אֲרָם צוֹבָא - Tanah Aleppo Codex bible

שמות 16

¹א ויסעו מאילם ויבאו כל עדת בני ישראל אל מדבר סין אשר בין אילם ובין סיני--בחמשה עשר יום לחדש השני לצאתם מארץ מצרים

²ב וילינו (וילונו) כל עדת בני ישראל על משה ועל אהרן--במדבר

³ג ויאמרו אלהם בני ישראל מי יתן מותנו ביד יהוה בארץ מצרים בשבתנו על סיר הבשר באכלנו לחם לשבע כי הוצאתם אתנו אל המדבר הזה להמית את כל הקהל הזה ברעב {ס}

⁴ד ויאמר יהוה אל משה הנני ממטיר לכם לחם מן השמים ויצא העם ולקטו דבר יום ביומו למען אנסנו הילך בתורתי אם לא

⁵ה והיה ביום הששי והכינו את אשר יביאו והיה משנה על אשר ילקטו יום יום

⁶ו ויאמר משה ואהרן אל כל בני ישראל ערב--וידעתם כי יהוה הוציא אתכם מארץ מצרים

⁷ז ובקר וראיתם את כבוד יהוה בשמעו את תלנתיכם על יהוה ונחנו מה כי תלונו (תלינו) עלינו

⁸ח ויאמר משה בתת יהוה לכם בערב בשר לאכל ולחם בבקר לשבע בשמע יהוה את תלנתיכם אשר אתם מלינם עליו ונחנו מה לא עלינו תלנתיכם כי על יהוה

⁹ט ויאמר משה אל אהרן אמר אל כל עדת בני ישראל קרבו לפני יהוה כי שמע את תלנתיכם

¹⁰י ויהי כדבר אהרן אל כל עדת בני ישראל ויפנו אל המדבר והנה כבוד יהוה נראה בענן {פ}

¹¹יא וידבר יהוה אל משה לאמר

¹²יב שמעתי את תלונת בני ישראל--דבר אלהם לאמר בין הערבים תאכלו בשר ובבקר תשבעו לחם וידעתם כי אני יהוה אלהיכם

¹³יג ויהי בערב--ותעל השלו ותכס את המחנה ובבקר היתה שכבת הטל סביב למחנה

¹⁴יד ותעל שכבת הטל והנה על פני המדבר דק מחספס--דק ככפר על הארץ

¹⁵טו ויראו בני ישראל ויאמרו איש אל אחיו מן הוא--כי לא ידעו מה הוא ויאמר משה אלהם הוא הלחם אשר נתן יהוה לכם לאכלה

¹⁶טז זה הדבר אשר צוה יהוה לקטו ממנו איש לפי אכלו עמר לגלגלת מספר נפשתיכם--איש לאשר באהלו תקחו

¹⁷יז ויעשו כן בני ישראל וילקטו המרבה והממעיט

¹⁸יח וימדו בעמר--ולא העדיף המרבה והממעיט לא החסיר איש לפי אכלו לקטו

¹⁹יט ויאמר משה אלהם איש אל יותר ממנו עד בקר

²⁰כ ולא שמעו אל משה ויותרו אנשים ממנו עד בקר וירם תולעים ויבאש ויקצף עלהם משה

²¹כא וילקטו אתו בבקר בבקר איש כפי אכלו וחם השמש ונמס

²²כב ויהי ביום הששי לקטו לחם משנה--שני העמר לאחד ויבאו כל נשיאי העדה ויגידו למשה

²³כג ויאמר אלהם הוא אשר דבר יהוה--שבתון שבת קדש ליהוה מחר את אשר תאפו אפו ואת אשר תבשלו בשלו ואת כל העדף הניחו לכם למשמרת עד הבקר

²⁴כד ויניחו אתו עד הבקר כאשר צוה משה ולא הבאיש ורמה לא היתה בו

²⁵כה ויאמר משה אכלהו היום כי שבת היום ליהוה היום לא תמצאהו בשדה

²⁶כו ששת ימים תלקטהו וביום השביעי שבת לא יהיה בו

²⁷כז ויהי ביום השביעי יצאו מן העם ללקט ולא מצאו {ס}

²⁸כח ויאמר יהוה אל משה עד אנה מאנתם לשמר מצותי ותורתי

²⁹כט ראו כי יהוה נתן לכם השבת--על כן הוא נתן לכם ביום הששי לחם יומים שבו איש תחתיו אל יצא איש ממקמו--ביום השביעי

³⁰ל וישבתו העם ביום השבעי

³¹לא ויקראו בית ישראל את שמו מן והוא כזרע גד לבן וטעמו כצפיחת בדבש

³²לב ויאמר משה זה הדבר אשר צוה יהוה--מלא העמר ממנו למשמרת לדרתיכם למען יראו את הלחם אשר האכלתי אתכם במדבר בהוציאי אתכם מארץ מצרים

³³לג ויאמר משה אל אהרן קח צנצנת אחת ותן שמה מלא העמר מן והנח אתו לפני יהוה למשמרת לדרתיכם

³⁴לד כאשר צוה יהוה אל משה ויניחהו אהרן לפני העדת למשמרת

³⁵לה ובני ישראל אכלו את המן ארבעים שנה--עד באם אל ארץ נושבת את המן אכלו--עד באם אל קצה ארץ כנען

³⁶לו והעמר עשרית האיפה הוא {פ}