Read כֶּתֶר אֲרָם צוֹבָא - Tanah Aleppo Codex שמות 17 Bible Online

שמות 17 - כֶּתֶר אֲרָם צוֹבָא - Tanah Aleppo Codex bible

שמות 17

¹א ויסעו כל עדת בני ישראל ממדבר סין למסעיהם--על פי יהוה ויחנו ברפידים ואין מים לשתת העם

²ב וירב העם עם משה ויאמרו תנו לנו מים ונשתה ויאמר להם משה מה תריבון עמדי מה תנסון את יהוה

³ג ויצמא שם העם למים וילן העם על משה ויאמר למה זה העליתנו ממצרים להמית אתי ואת בני ואת מקני בצמא

⁴ד ויצעק משה אל יהוה לאמר מה אעשה לעם הזה עוד מעט וסקלני

⁵ה ויאמר יהוה אל משה עבר לפני העם וקח אתך מזקני ישראל ומטך אשר הכית בו את היאר--קח בידך והלכת

⁶ו הנני עמד לפניך שם על הצור בחרב והכית בצור ויצאו ממנו מים ושתה העם ויעש כן משה לעיני זקני ישראל

⁷ז ויקרא שם המקום מסה ומריבה על ריב בני ישראל ועל נסתם את יהוה לאמר היש יהוה בקרבנו אם אין {פ}

⁸ח ויבא עמלק וילחם עם ישראל ברפידם

⁹ט ויאמר משה אל יהושע בחר לנו אנשים וצא הלחם בעמלק מחר אנכי נצב על ראש הגבעה ומטה האלהים בידי

¹⁰י ויעש יהושע כאשר אמר לו משה--להלחם בעמלק ומשה אהרן וחור עלו ראש הגבעה

¹¹יא והיה כאשר ירים משה ידו--וגבר ישראל וכאשר יניח ידו וגבר עמלק

¹²יב וידי משה כבדים ויקחו אבן וישימו תחתיו וישב עליה ואהרן וחור תמכו בידיו מזה אחד ומזה אחד ויהי ידיו אמונה עד בא השמש

¹³יג ויחלש יהושע את עמלק ואת עמו לפי חרב {פ}

¹⁴יד ויאמר יהוה אל משה כתב זאת זכרון בספר ושים באזני יהושע כי מחה אמחה את זכר עמלק מתחת השמים

¹⁵טו ויבן משה מזבח ויקרא שמו יהוה נסי

¹⁶טז ויאמר כי יד על כס יה מלחמה ליהוה בעמלק--מדר דר {פ}