Read כֶּתֶר אֲרָם צוֹבָא - Tanah Aleppo Codex שמות 19 Bible Online

שמות 19 - כֶּתֶר אֲרָם צוֹבָא - Tanah Aleppo Codex bible

שמות 19

¹א בחדש השלישי לצאת בני ישראל מארץ מצרים--ביום הזה באו מדבר סיני

²ב ויסעו מרפידים ויבאו מדבר סיני ויחנו במדבר ויחן שם ישראל נגד ההר

³ג ומשה עלה אל האלהים ויקרא אליו יהוה מן ההר לאמר כה תאמר לבית יעקב ותגיד לבני ישראל

⁴ד אתם ראיתם אשר עשיתי למצרים ואשא אתכם על כנפי נשרים ואבא אתכם אלי

⁵ה ועתה אם שמוע תשמעו בקלי ושמרתם את בריתי--והייתם לי סגלה מכל העמים כי לי כל הארץ

⁶ו ואתם תהיו לי ממלכת כהנים וגוי קדוש אלה הדברים אשר תדבר אל בני ישראל

⁷ז ויבא משה ויקרא לזקני העם וישם לפניהם את כל הדברים האלה אשר צוהו יהוה

⁸ח ויענו כל העם יחדו ויאמרו כל אשר דבר יהוה נעשה וישב משה את דברי העם אל יהוה

⁹ט ויאמר יהוה אל משה הנה אנכי בא אליך בעב הענן בעבור ישמע העם בדברי עמך וגם בך יאמינו לעולם ויגד משה את דברי העם אל יהוה

¹⁰י ויאמר יהוה אל משה לך אל העם וקדשתם היום ומחר וכבסו שמלתם

¹¹יא והיו נכנים ליום השלישי כי ביום השלשי ירד יהוה לעיני כל העם--על הר סיני

¹²יב והגבלת את העם סביב לאמר השמרו לכם עלות בהר ונגע בקצהו כל הנגע בהר מות יומת

¹³יג לא תגע בו יד כי סקול יסקל או ירה יירה--אם בהמה אם איש לא יחיה במשך היבל המה יעלו בהר

¹⁴יד וירד משה מן ההר אל העם ויקדש את העם ויכבסו שמלתם

¹⁵טו ויאמר אל העם היו נכנים לשלשת ימים אל תגשו אל אשה

¹⁶טז ויהי ביום השלישי בהית הבקר ויהי קלת וברקים וענן כבד על ההר וקל שפר חזק מאד ויחרד כל העם אשר במחנה

¹⁷יז ויוצא משה את העם לקראת האלהים מן המחנה ויתיצבו בתחתית ההר

¹⁸יח והר סיני עשן כלו מפני אשר ירד עליו יהוה באש ויעל עשנו כעשן הכבשן ויחרד כל ההר מאד

¹⁹יט ויהי קול השפר הולך וחזק מאד משה ידבר והאלהים יעננו בקול

²⁰כ וירד יהוה על הר סיני אל ראש ההר ויקרא יהוה למשה אל ראש ההר ויעל משה

²¹כא ויאמר יהוה אל משה רד העד בעם פן יהרסו אל יהוה לראות ונפל ממנו רב

²²כב וגם הכהנים הנגשים אל יהוה יתקדשו פן יפרץ בהם יהוה

²³כג ויאמר משה אל יהוה לא יוכל העם לעלת אל הר סיני כי אתה העדתה בנו לאמר הגבל את ההר וקדשתו

²⁴כד ויאמר אליו יהוה לך רד ועלית אתה ואהרן עמך והכהנים והעם אל יהרסו לעלת אל יהוה--פן יפרץ בם

²⁵כה וירד משה אל העם ויאמר אלהם {ס}